Umlayeto lobalulekile loseBhayibhelini umayelana neMbuso waNkulunkulu. Jehova utawusebentisa loMbuso kuze afeze injongo yakhe yasekucaleni ngemhlaba. Uyini loMbuso? Sati njani kutsi sewuyabusa? Yini losoyifezile? Yini lotayenta esikhatsini lesitako? Lesifundvo kanye naletimbili letilandzelako titawuphendvula lemibuto.

1. Uyini uMbuso waNkulunkulu futsi ngubani iNkhosi yawo?

LoMbuso unguhulumende lowamiswa nguJehova Nkulunkulu. INkhosi yawo, Jesu Khristu, ibusa isezulwini. (Matewu 4:17; Johane 18:36) Nalikhuluma ngaJesu liBhayibheli litsi: ‘Utawuba yiNkhosi . . . phakadze.’ (Lukha 1:32, 33) Njengobe Jesu ayiNkhosi yeMbuso waNkulunkulu, utawubusa wonkhe umuntfu losemhlabeni.

2. Bobani lababusa naJesu?

Jesu akabusi yedvwana. Bantfu ‘bato tonkhe tinhlanga, tilwimi, bantfu netive . . . batawuba ngemakhosi etikwemhlaba.’ (Sembulo 5:9, 10) Bangakhi labatawubusa naKhristu? Kusukela Jesu eta emhlabeni, emaKhristu lamanyenti aba balandzeli bakhe. Nobe kunjalo, bangu-144 000 kuphela labatawubusa naJesu ezulwini. (Fundza Sembulo 14:1-4.) Onkhe lamanye emaKhristu lasemhlabeni atawuba takhamuti taloMbuso.—Tihlabelelo 37:29.

3. Yini leyenta uMbuso waNkulunkulu ube ncono kunabohulumende bebantfu?

Ngisho nobe babusi lababantfu betama kwenta tintfo letinhle, bete emandla ekwenta yonkhe intfo labayifunako. Batsatselwa sikhundla ngulabanye babusi lokungenteka baticabangela bona futsi abafuni kusita bantfu labababusako. Nobe kunjalo, iNkhosi yeMbuso waNkulunkulu, Jesu, ngeke itsatselwe sikhundla ngulomunye umuntfu. Nkulunkulu ‘ubeke uMbuso longeke uze ubhujiswe.’ (Danyela 2:44) Jesu utawubusa emhlabeni wonkhe, futsi ngeke aze akhetse. Unelutsandvo, umusa nekulunga futsi utawufundzisa bantfu kutsi baphatsane ngendlela lefanako, batsandzane, babenemusa futsi baphatsane kahle.—Fundza Isaya 11:9.

4. Hulumende lonemandla utawubusa emhlabeni wonkhe

Jesu Khristu unemandla lamakhulu kwendlula nobe ngabe ngumuphi  umbusi lowake waba khona emlandvweni. Fundza Matewu 28:18, bese nicoca ngalombuto:

• Emandla aJesu ekubusa makhulu ngayiphi indlela kwendlula emandla ebabusi lababantfu?

Bohulumende bebantfu bashintja njalo, futsi umbusi ngamunye ubusa incenye letsite yemhlaba. UMbuso waNkulunkulu wona-ke? Fundza Danyela 7:14, bese nicoca ngalemibuto:

• Kukahle ngani kutsi uMbuso waNkulunkulu ‘ngeke uze ubhujiswe’?

• Kukahle ngani kutsi utawubusa umhlaba wonkhe?

5. Bohulumende bebantfu kufanele batsatselwe sikhundla

Kungani uMbuso waNkulunkulu kufanele utsatse sikhundla sabohulumende bebantfu? Dlala le-VIDEO, bese nicoca ngalombuto lolandzelako.

I-VIDEO: Uyini UMbuso WaNkulunkulu?—Incenye (1:41)

• Kubusa kwebantfu kube namiphi imiphumela?

Fundza Umshumayeli 8:9, bese nicoca ngalemibuto:

• Ucabanga kutsi kufanele yini uMbuso waNkulunkulu utsatse sikhundla sabohulumende bebantfu? Usho ngani?

6. UMbuso waNkulunkulu unebabusi labasati kahle simo setfu

Ngenca yekutsi iNkhosi yetfu, Jesu, yake yaphila emhlabeni, iyakhona “kuvelana natsi ebutsakatsakeni betfu.” (KumaHebheru 4:15) Emadvodza nebafati labangu-144 000 labatawubusa naJesu, bakhetfwe nguJehova “kuto tonkhe tinhlanga, tilwimi, bantfu netive.”—Sembulo 5:9.

• Kuyakudvudvuta yini kwati kutsi Jesu akanye nabo bonkhe latawubusa nabo bayati kutsi kunjani kuphila emhlabeni? Yini lekwenta udvudvuteke?

7. UMbuso waNkulunkulu unemitsetfo lencono kuneyabohulumende bebantfu

Bohulumende bebantfu babeka imitsetfo lesita iphindze ivikele bantfu balelolive. NeMbuso waNkulunkulu unemitsetfo lokufanele ilandzelwe bantfu labangephansi kwawo. Fundza 1 KubaseKhorinte 6:9-11, bese nicoca ngalemibuto:

• Ucabanga kutsi umhlaba utawuba njani lapho wonkhe umuntfu sekalalela umtsetfo waNkulunkulu wekutiphatsa?a

• Ucabanga kutsi Jehova unalo yini lilungelo lekulindzela kutsi bantfu labangephansi kweMbuso wakhe bahloniphe lemitsetfo? Usho ngani?

• Yini lekhombisa kutsi bantfu labangayilaleli lemitsetfo bangashintja?—Buka vesi 11.

LOKO LESICOCE NGAKO

UMbuso waNkulunkulu unguhulumende mbamba losezulwini lotawubusa umhlaba wonkhe.

Yini Loyifundzile?

• Bobani babusi beMbuso waNkulunkulu?

• UMbuso waNkulunkulu uncono ngayiphi indlela kunabohulumende bebantfu?

• Ngutiphi letinye tintfo Jehova lalindzele kutsi tentiwe bantfu labangephansi kweMbuso wakhe?

LOKUNYE LONGAKUHLOLA

Fundza loko Jesu lakusho mayelana nekutsi ukuphi uMbuso waNkulunkulu.

“Usenhlitiyweni Yakho Yini UMbuso WaNkulunkulu?” (Sihloko lesiku-internet)

Yini leyenta BoFakazi BaJehova betsembeke eMbusweni waNkulunkulu kunekwetsembeka emibusweni yebantfu?

Kutinikela EMbusweni WaNkulunkulu (1:43)

Fundza loko liBhayibheli lelikushoko mayelana nalabangu-144 000, labakhetfwe nguJehova kutsi babuse kanye naJesu.

“Bobani Labaya Ezulwini?” (Sihloko lesiku-internet)

Yini leyacinisekisa lomunye wesifazane lobekaboshiwe kutsi Nkulunkulu utawenta umhlaba ube nekulunga?

“Indlela Engathola Ngayo Ikhambi Lokungabi Nabulungisa (Phaphama! yaNovember 1, 2013 letfolakala ngesiZulu)

UMbuso waNkulunkulu wacala kubusa ezulwini nga-1914, lokungumnyaka emalanga ekugcina ekubusa kwebantfu lacala ngawo. Sati njani? Sitawubuka tiphrofetho teliBhayibheli naloko lokwentekako emhlabeni, kanye nendlela bantfu lebebasolo batiphatsa ngayo kusukela nga-1914.

1. Yini leyaphrofethwa liBhayibheli?

Ngekusho kweliBhayibheli encwadzini yaDanyela, uMbuso waNkulunkulu bewutawucala kubusa nakuphela sikhatsi lesibitwa ngekutsi “tikhatsi letingu-7.” (Danyela 4:16, 17) Ngekuhamba kwesikhatsi Jesu wasibita ngekutsi “sikhatsi lesibekiwe setive,” futsi wafundzisa kutsi besisengakapheli. (Lukha 21:24) Njengobe sitawubona, letikhatsi letingu-7 taphela nga-1914.

2. Yini leyentekako emhlabeni futsi bantfu batiphetse njani kusukela nga-1914?

Bafundzi baJesu bambuta: “Sitawubona ngani kutsi sesikhatsi sekuba khona kwakho nesekuphela kwalelive?” (Matewu 24:3) Jesu wabaphendvula ngekubatjela tintfo letinyenti lebetitakwenteka ngemuva kwekutsi acale kubusa ezulwini njengeNkhosi yeMbuso waNkulunkulu. Letinye tato betifaka ekhatsi timphi, indlala, kanye nekutamatama kwemhlaba. (Fundza Matewu 24:7.) LiBhayibheli laphindze laphrofetha kutsi indlela bantfu bebatatiphatsa ngayo ‘ngemalanga ekugcina’ beyitakwenta kube ‘matima kubhekana’ nekuphila. (2 KuThimothi 3:1-5) Letimo kanye nendlela bantfu labatiphatsa ngayo kucale kubonakala kakhulu kusukela nga-1914.

3. Yini lebangele kutsi timo tibe timbi kangaka kusukela kwacala kubusa uMbuso waNkulunkulu?

Ngekushesha nje ngemuva kwekutsi Jesu acale kuba yiNkhosi yeMbuso waNkulunkulu, walwa naSathane nemadimoni akhe ezulwini, futsi Sathane wehlulwa. LiBhayibheli litsi “wajikijelwa phansi emhlabeni, netingilosi takhe tajikijelwa phansi kanye naye.” (Sembulo 12:9, 10, 12) Sathane utfukutsele kakhulu ngobe uyati kutsi utawubhujiswa. Ngako nguye lobangela buhlungu nekuhlupheka emhlabeni wonkhe. Loku kusisita sibone kutsi kungani timo titimbi kangaka emhlabeni! UMbuso waNkulunkulu utawucedza tonkhe letinkinga.

CHUBEKA UFUNISISA

4. Kubalwa kwetikhatsi lotashiwo liBhayibheli lokusenta sifike ku-1914

I-VIDEO: UMbuso WaNkulunkulu Wacala Kubusa Nga-1914 (5:02)

Nkulunkulu wabangela Nebukhadnezari iNkhosi yaseBhabhulona yasendvulo kutsi iphuphe liphupho lebelikhombisa loko lebekutakwenteka esikhatsini lesitako. Leliphupho kanye nenchazelo leyashiwo nguDanyela kukhombisa kutsi belikhuluma ngembuso waNebukhadnezari kanye neMbuso waNkulunkulu.—Fundza Danyela 4:17.a

Fundza Danyela 4:20-26, bese usebentisa lelishadi kuze uphendvule lemibuto lelandzelako:

• (A) Yini Nebukhadnezari layibona kuleliphupho lakhe?—Buka vesi 20 na-21.

• (B) Kutakwentekani kulesihlahla?—Buka vesi 23.

• (C) Bekutakwentekani nakuphela ‘letikhatsi letingu-7’?—Buka vesi 26.

Leliphupho Lelimayelana Nesihlahla Lihlobana Njani NeMbuso WaNkulunkulu?

SIPHROFETHO (Danyela 4:20-36)

Bukhosi

(A) Sihlahla lesikhulu

Bukhosi buyaphatamiseka

(B) “Juba lesihlala,” usiyekele kuze kuphele “tikhatsi letingu-7”

Bukhosi buyabuyiselwa

(C) “Utawuphindze ube yinkhosi”

Kugcwaliseka kwekucala kwalesiphrofetho . . .

• (D) Besimelela bani lesihlahla?—Buka vesi 22.

• (E) Baphazamiseka njani bukhosi bakhe?—Fundza Danyela 4:29-33.

• (F) Yini leyenteka kuNebukhadnezari nakuphela “tikhatsi letingu-7”?—Fundza Danyela 4:34-36.

KUGCWALISEKA KWEKUCALA

Bukhosi

(D) Nebukhadnezari inkhosi yaseBhabhulona

Bukhosi buyaphatamiseka

(E) Ngemuva kwemnyaka wa-606 B.C.E., Nebukhadnezari walahlekelwa yingcondvo futsi akazange asakhona kubusa kwaze kwaphela iminyaka lengu-7

Bukhosi buyabuyiselwa

(F) Ingcondvo yaNebukhadnezari yabuya waphindze wacala kubusa

Kugcwaliseka kwesibili kwalesiphrofetho . . .

• (G) Lesihlahla besimelela bani?—Fundza 1 Tikhronike 29:23.

• (H) Kwaphazamiseka njani kubusa kwabo? Sati njani kutsi lobukhosi bebusolo buphazamisekile ngesikhatsi Jesu aseselamhlabeni?—Fundza Lukha 21:24.

• (I) Lobukhosi babuyiselwa nini futsi kuphi?

KUGCWALISEKA KWESIBILI

Bukhosi

(G) Emakhosi aka-Israyeli lebekamelela bukhosi baNkulunkulu

Bukhosi buyaphatamiseka

(H) IJerusalema iyabhujiswa futsi luhla lwemakhosi aka-Israyeli lwaphazamiseka iminyaka lengu-2 520

Bukhosi buyabuyiselwa

(I) Jesu ucala kubusa ezulwini njengeNkhosi yeMbuso waNkulunkulu

5. Kusukela nga-1914, tintfo tashintja emhlabeni

Dlala le-VIDEO.

I-VIDEO: Kusukela Nga-1914, Tintfo Tashintja Emhlabeni (1:10)

Jesu waphrofetha kutsi timo betitawuba njani emhlabeni nasekayiNkhosi. Fundza Lukha 21:9-11, bese nicoca ngalombuto:

• Ngutiphi timo letishiwo ngulombhalo lotibonile nobe love ngato?

Umphostoli Pawula wachaza kutsi bantfu bebatawuba njani ngemalanga ekugcina ekubusa kwebantfu. Fundza 2 KuThimothi 3:1-5, bese nicoca ngalombuto:

• Uke wababona yini bantfu labatiphatsa ngalendlela lamuhla?

6. Kubusa kweMbuso waNkulunkulu kufanele kusikhutsate

Fundza Matewu 24:3, 14, bese nicoca ngalemibuto:

• Ngumuphi umsebenti lobalulekile lokhombisa kutsi uMbuso waNkulunkulu sewuyabusa?

• Ungahlanganyela njani kulomsebenti?

UMbuso waNkulunkulu sewuyabusa, futsi lilanga lotawubusa ngalo ngalokuphelele emhlabeni selisondzele. Fundza KumaHebheru 10:24, 25, bese nicoca ngalombuto:

• Yini ngamunye wetfu lokufanele ayente ‘njengobe sibona lilanga lisondzela’?

LOKO LESICOCE NGAKO

Tiphrofetho teliBhayibheli, kulandzelana kwetikhatsi, kanye naloko lokwentekako emhlabeni kufakazela kutsi uMbuso waNkulunkulu sewuyabusa. Sikhombisa kutsi siyakukholelwa loku ngekushumayela ngawo nangekuya emihlanganweni yelibandla.

Yini Loyifundzile?

• Yini leyenteka nakuphela tikhatsi letingu-7 letaphrofethwa liBhayibheli encwadzini yaDanyela?

• Yini lekwenta uciniseke kutsi uMbuso waNkulunkulu wacala kubusa nga-1914?

• Ungakhombisa njani kutsi uyakholelwa kutsi uMbuso sewuyabusa?

LOKUNYE LONGAKUHLOLA

Fundza kutsi tati temlandvo kanye nalabanye, batsi umhlaba ushintje njani kusukela nga-1914.

“When Morals Declined Dramatically” (Awake!, ya-April 2007 letfolakala ngesiNgisi)

Fundza kutsi siphrofetho lesikuMatewu 24:14 sakutsintsa njani kuphila kwalenye indvodza.

“Kute Lebengikutsandza Kakhulu Kwendlula I-Baseball!” (Sicongosekulindza No. 3 2017)

Sati njani kutsi siphrofetho lesisencwadzini yaDanyela sehluko 4 sikhuluma ngeMbuso waNkulunkulu?

“UMbuso WaNkulunkulu Wacala Nini Kubusa? (Incenye 1)” (Sicongosekulindza, saNovember 1, 2014)

Yini lekhombisa kutsi “tikhatsi letingu-7” lokukhulunywa ngato kuDanyela sehluko 4 taphela nga-1914?

“UMbuso WaNkulunkulu Wacala Nini Kubusa? (Incenye 2)” (Sicongosekulindza, saJanuary 1, 2015)

UMbuso waNkulunkulu sewuvele uyabusa. Madvutane utawukwenta lushintjo lolukhulu emhlabeni. Ase sibone letinye tintfo letinhle longatilangatelela ngephansi kwaloMbuso.

1. UMbuso waNkulunkulu utakuletsa njani kuthula nekulunga emhlabeni?

Jesu, loyiNkhosi yeMbuso waNkulunkulu, utawubhubhisa bantfu lababi nabohulumende emphini ye-Amagedoni. (Sembulo 16:14, 16) Ngaleso sikhatsi, lesetsembiso lesilandzelako lesiseBhayibhelini sitawufezeka ngalokuphelele: “Ngemuva nje kwesikhashana, bantfu lababi ngeke basaba khona.” (Tihlabelelo 37:10) Asebentisa loMbuso, Jesu utawuciniseka kutsi kugcwala kuthula nekulunga emhlabeni.—Fundza Isaya 11:4.

2. Kuphila kutawuba njani nase kwenteka intsandvo yaNkulunkulu emhlabeni?

Nasekubusa uMbuso waNkulunkulu, “labalungile batawudla lifa lemhlaba, futsi bahlale kuwo kuze kube phakadze.” (Tihlabelelo 37:29) Ticabange sewuphila emhlabeni lapho khona wonkhe umuntfu sekalungile futsi atsandza Jehova nalabanye bantfu! Kute lotawugula, futsi wonkhe umuntfu utawuphila phakadze.

3. Yini letawufezwa nguMbuso waNkulunkulu nasekubhujiswe bantfu lababi?

Nasebabhujisiwe bantfu lababi, Jesu utawubusa njengeNkhosi iminyaka lengu-1 000. Ngaleso sikhatsi, yena kanye nalabangu-144 000 latawubusa nabo, batawusita bantfu labasemhlabeni kutsi babe bete sono. Naseyiphelile iminyaka lengu-1 000, umhlaba wonkhe utawuba lipharadisi lelihle futsi bonkhe bantfu batawujabula ngobe batawube balalela imitsetfo yaJehova. Jesu utawubese ubuyisela uMbuso kuBabe wakhe, Jehova. ‘Libito [laJehova] litawungcweliswa’ ngendlela lebelingakaze lingcweliswe ngayo. (Matewu 6:9, 10) Kutawube sekubonakele kutsi Jehova unguMbusi lokahle nalonendzaba nebantfu bakhe. Jehova utawubese ubhubhisa Sathane, nemadimoni, kanye nalabo labakhetsa kuvukela bukhosi baKhe. (Sembulo 20:7-10) Timo letikahle letitawuletfwa nguMbuso waNkulunkulu titawubakhona kuze kube phakadze.

CHUBEKA UFUNISISA

4. UMbuso waNkulunkulu utawususa bohulumende bebantfu

“Umuntfu ubuse lomunye umuntfu wase uyamlimata.” (Umshumayeli 8:9) Jehova utawusebentisa uMbuso wakhe kuze alungise umonakalo lobangelwe ngulokungalungi.

Fundza Danyela 2:44 na-2 KubaseThesalonika 1:6-8, bese nicoca ngalemibuto:

• Yini Jehova neNdvodzana yakhe, Jesu labatayenta kubohulumende bebantfu kanye nalabo lababasekelako?

• Loko lokufundzile ngaJehova nangaJesu kukucinisekisa njani kutsi loko labatakwenta kutawuba nekulunga?

5. Jesu uyiNkhosi lekahle kakhulu

Njengobe ayiNkhosi yeMbuso waNkulunkulu, Jesu utawukwenta tintfo letinyenti kakhulu kuze asite bantfu bakhe labasemhlabeni. Dlala le-VIDEO kuze ubone indlela Jesu lakhombise ngayo kutsi ufuna kusita bantfu nekutsi Nkulunkulu umnikete emandla ekwenta njalo.

I-VIDEO: Jesu Wakhombisa Kutsi Yini Letawufezwa NguloMbuso (1:13)

Tintfo letentiwa nguJesu ngesikhatsi alapha emhlabeni, takhombisa loko bekutawukwentiwa nguloMbuso. Kuletibusiso letibalwe lapha, ngutiphi wena lotilangatelela ngalokukhetsekile? Fundza imibhalo lesisita sati lokunyenti ngaletibusiso.

6. UMbuso waNkulunkulu utawuletsa likusasa lelihle

I-VIDEO: Emantjontjo Elikusasa Lelihle (4:38)

Fundza Tihlabelelo 145:16, bese nicoca ngalombuto:

• Kukwenta utive njani kwati kutsi Jehova ‘utawuniketa tintfo letiphilako loko letikufisako’?

LOKO LESICOCE NGAKO

UMbuso waNkulunkulu utawufeza loko Nkulunkulu lafuna ukufeze. Utawushintja lomhlaba ube lipharadisi leligcwele bantfu labalungile labatawukhonta Jehova kuze kube phakadze.

Yini Loyifundzile?

• UMbuso waNkulunkulu utalingcwelisa njani libito laJehova?

• Yini lesenta sikholelwe kutsi uMbuso waNkulunkulu utatifeza tetsembiso letiseBhayibhelini?

• Ngutiphi tintfo lotilangatelela ngalokukhetsekile letitawufezwa nguloMbuso?

LOKUNYE LONGAKUHLOLA

Tfola kutsi iyini i-Amagedoni.

“Iyini Imphi Ye-Amagedoni?” (Sihloko lesiku-internet)

Fundza ngaloko lokutakwenteka ngesikhatsi sekubusa kwaJesu kweminyaka lengu-1 000 kanye nangemuva kwaso.

“Yini Eyokwenzeka Ngosuku Lokwahlulela?” (Sicongosekulindza,  saSeptember 1, 2012 lesitfolakala ngesiZulu)

Buka kutsi imindeni ingaticabanga njani indzawonye epharadisi.

Tibone UsePharadisi (1:50)

Esihlokweni lesitsi “Ngangihlushwa Yimibuzo Eminingi,” tfola kutsi livukela mbuso lasitfola njani sisombululo belisifuna.

“IBhayibheli Lishintsha Ukuphila” (Sicongosekulindza, saJanuary 1, 2012, letfolakala ngesiZulu)