‘Ngitawukwati Njani Kushumayela?’
Emhlabeni wonkhe, sinetibonelo letinyenti tebazalwane nabodzadze labahlanganyela emsebentini wekushumayela ngekwetsembeka, nangetulu kwetinkinga temphilo letinkhulu labahlangabetana nato. Cabanga ngesibonelo sa-Dalia, lohlala e-Vilnius, lokuyinhloko dolobha yase-Lithuania.
Dalia, ngudzadze loseminyakeni yabo-30. Kusukela atalwa, bekahlushwa sifo lesilimata bucopho (i-cerebral apoplexy). Lesifo samenta wakhubateka futsi waba nenkinga yekungavakali kahle nakakhuluma. Ngaleso sizatfu, ngemalunga emndeni wakhe kuphela lakhona kumuva kahle nakakhuluma. Dalia uhlala na-Galina, make wakhe lomnakekelako. Nanobe kuphila kwa-Dalia bekusolo kugcwele bumatima kanye nekukhatsateka, ulondvolota simo sengcondvo lesihle. Ukwenta njani loko?
Galina uyachaza: “Nga-1999, umzala wami Apolonija wasivakashela. Sacaphela kutsi Apolonija, longulomunye waboFakazi BaJehova, bekalati kahle liBhayibheli, futsi Dalia wacala kumbuta imibuto leminyenti. Ngekushesha, wacala sifundvo seliBhayibheli naye. Ngaletinye tikhatsi bengihlanganyela nabo kulesifundvo kute ngichaze lokushiwo ngu-Dalia. Ngabona kutsi konkhe lakufundzako bekumzuzisa sibili. Ngekushesha, nami ngacela sifundvo seliBhayibheli.”
Njengobe Dalia besekacale kuwacondza emaciniso eliBhayibheli, bekanembuto lobewumkhatsata kakhulu. Ekugcineni, wabhoboka, wase utsi ku-Apolonija: “Umuntfu lokhubateke njengami, angakwati njani kushumayela?” (Mat 28:19, 20) Apolonija, wamcinisekisa ngemusa Dalia watsi: “Ungesabi, Jehova utakusita.” Nembala, Jehova wamsita.
Ngako-ke, ukwati njani Dalia kushumayela? Usebentisa tindlela letehlukehlukene. Bodzadze labangemaKhristu bayamsita kutsi abhale tincwadzi letinemilayeto yeliBhayibheli. Kwekucala, Dalia usho loko lakucabangako kulabodzadze, bese bona bakubhala phansi loko lakushoko. Dalia uphindze ashumayele ngekutfumela imilayeto ngamahlalekhikhini wakhe. Nangabe simo selitulu sisihle, emalunga elibandla lakulo ahamba naye kute acoce nebantfu lababatfola emapaki kanye nasesitaladini.
Dalia kanye namake wakhe bachubeka batfutfuka ngekwakamoya. Bobabili sebatinikele kuJehova futsi babhajatiswe nga-November 2004. Nga-September 2008, kwasungulwa licembu lelikhuluma lulwimi lwesi-Polish, e-Vilnius. Njengobe lelicembu belinesidzingo sebamemeteli beMbuso labengetiwe, Dalia namake wakhe bacala kuhlanganyela nalo. Dalia utsi: “Ngaletinye tinyanga ngiyakhatsateka nangingakayi ensimini. Kodvwa ngemuva kwekuthandaza kuJehova ngaloko, ngekushesha kuba khona lohlela kuya nami ensimini.” Dalia utiva njani ngesimo lakuso? Naku lakushoko: “Lesifo sami singente ngakhubateka emtimbeni, kodvwa asikangikhubati engcondvweni. Ngijabula kakhulu kutsi ngiyakwati kutjela labanye ngaJehova!”