Lokuvela Emtatjeni Wetfu
Kulondvolota Tintfo Letiligugu Temlandvo Wetfu
BANTFU baJehova banemlandvo lomudze kanye nalojabulisako wekukhonta Nkulunkulu. Lomlandvo lojabulisa kakhulu awugcini ngekutfolakala etincwadzini tetfu, kodvwa ungatfolakala etitfombeni, ekulandziseni kwebantfu uphindze utfolakale nasetintfweni tebuciko letihlobene nekukhonta kwetfu, kushumayela kanye nemlandvo wetfu. Kodvwa yini lesiyizuzako ngekulondvolota tintfo letinjalo kanye nekuhlolisisa umlandvo wetfu? Tinhloko temindeni yaka-Israyeli wasendvulo bekufanele tifundzise bantfwana bato imitsetfo yaJehova kanye netento takhe letimangalisako, kute ‘babeke litsemba labo kuNkulunkulu.’—Hla. 78:1-7.
Kuhlolisisa umlandvo logciniwe bekuloku kunendzima lenkhulu ekufezweni kwenjongo yaJehova. Nasi sibonelo: Ngesikhatsi baphikisi betama kumisa umsebenti wekwakhiwa kwelithempeli eJerusalema, tikhulu tahlola imibhalo legcinwe emitatjeni yenhlokodolobha yaseMediya, i-Ekbatana, futsi loko kwatenta tatfola timphepha letabhalwa yiNkhosi Khuresi lebetiveta kuvunyelwa kwekwakhiwa kwalo. (Ezra 6:1-4, 12) Ngesizatfu saloko, lithempeli laphindze lakhiwa ngekuvumelana nentsandvo yaNkulunkulu. Imilandvo legciniwe yaphindze yasetjentiswa nguLukha, umbhali weliVangeli, ‘lowatifundzisisa kahle kusukela ekucaleni tindzaba.’—Luk. 1:1-4.
Sigungu Lesibusako sinendzaba nemlandvo wetfu webuKhristu. Likhuluma ngesidzingo seku-londvolota, sekubhala phansi kanye nesekundlulisela umlandvo wetfu webuKhristu, lelinye lilunga leSigungu Lesibusako latsi: “Kute sati kutsi siyaphi, kufanele sati imvelaphi yetfu.” Ngesizatfu saloko, endlunkulu lese-Brooklyn, e-New York, kumiswe Lihhovisi Lekugcinwa Kwemlandvo lelicondziswa yiKomidi Yekubhala.
“TITFOMBE” KANYE “NEMAGUGU ETFU LAGCINIWE”
Njengobe sikhatsi sichubeka, labanyenti betfu bafisa shengatsi ngabe bawugcina umlandvo lophelele wemndeni wabo. Ehhovisi Lekugcinwa Kwemlandvo, kwentiwa umsebenti lomkhulu wekulondvolota kanye nekubekwa kwemlandvo wetfu lomuhle futsi lokhulako. Titfombe letagcinwa ngekucophelela eMtatjeni wetfu tingatsatfwa njengencenye “yetitfombe letigciniwe.” Tincwadzi tetfu tekucala, nekulandzisa kwekucala kwebantfu lokujabulisako kanye netikhumbuto letiligugu, nako kusemkhatsini wemagugu lagcinwe eMtatjeni wetfu. Tintfo letinjalo ‘tingemagugu’ lasikhanyisela umlandvo wetfu webuKhristu, futsi tisisita kutsi sibuke likusasa letfu njengemaKhristu ngekuciniseka.
Siyakumema kutsi uhlole loko lokwentiwa Lihhovisi Lekugcinwa Kwemlandvo, ngekutsi ufundze sihloko lesisha lesitsi “Lokuvela Emtatjeni Wetfu.” Lesihloko sitawuvela njalo kumagazini lofundvwako we-Sicongosekulindza. Nasi sibonelo: Kumagazini lolandzelako, sihlela kushicilela kulandzisa lokungekwemfanekiso lokwentelwe kuphendvula imibuto letsi: Beyiyini i-Dawn Mobile? Beyisetjentiswa bobani? Beyisetjentiswa nini, futsi ngayiphi injongo?
Njenge-album lenetikhumbuto temndeni, lomtapo wemlandvo utasitjela lokunyenti ngatsi kanye nangabokhokho betfu bakamoya. Utasitjela ngekukholwa kanye nesibindzi salabo labebaphila ngembikwetfu, injabulo netinsayeya tekukhonta Babe wetfu wasezulwini lonelutsandvo kanye nangesicondziso saNkulunkulu nekusekela kwakhe bantfu bakhe. (Dut. 33:27) Siyaciniseka kutsi Jehova utawubusisa imetamo yetfu lechubekako yekulondvolota umlandvo wetfu wakamoya kute sibe nebunye lobukhulu futsi sibe nemandla ekwenta intsandvo yakhe.
[Libhokisi/Sitfombe ekhasini 31]
Luhlatiyo Lwawo
Kute kuhlelwe tincwadzi tebuKhristu, ema-DVD, kanye naletinye tintfo letisekelwe eBhayibhelini, babhali betfu, badvwebi, bacwaningi kanye nalabanye basebentisa imilandvo legciniwe emsebentini wabo. Ngesizatfu saloko, Lihhovisi Lekugcinwa Kwemlandvo litsatsa tinyatselo letidzingekile kute litfole futsi lilondvolote tintfo letinyenti letitsintsa umlandvo wetfu: Emitfonjeni lenjengemahhovisi emagatja, emahhovisi lehlukehlukene aseBethel, emabandleni, kubantfu kanye nakuletinye tindzawo. Cabanga ngaloku lokulandzelako:
Kutfolwa kanye Nekuhlatiywa Kwemlandvo: Kuchutjekwa kungetwa tintfo letehlukehlukene eMtatjeni wetfu. Linyenti laletintfo linikelwa nobe libolekwe emindenini lenebantfu labanemlandvo lomudze wekukhonta Jehova ngekwetsembeka. Kuhlatiya kanye nekucatsanisa leto tintfo kukhulisa indlela lesiwucondza ngayo umlandvo wetfu kanye newalabo labebaphila ngaleso sikhatsi.
Kugcinwa Kwemlandvo: Umtapo weLihhovisi Lekugcinwa Kwemlandvo wakhiwa tintfo letinyenti, letinye tato tinemakhulu eminyaka tikhona. Takheke ngendlela lengafanani kantsi atilingani nangebukhulu, futsi kufanele tigcinwe kahle kute tisetjentiswe esikhatsini lesitako.
Kulungiswa Kanye Nekulondvolotwa Kwawo: Tincwadzi kanye netintfo tebuciko lebetihlobene nekukhonta lesetonakele, tiyalungiswa futsi tilondvolotwe, kusetjentiswa indlela yekulungisa yelizinga lelisetulu. Timphepha, titfombe, ticephu tetindzaba, emafilimu kanye netintfo letitsetjuliwe, tiyagcinwa. Ngemuva kwaloko, tifakwa kubongcondvomshini, kute timphepha tekucala nobe tintfo letitsintsa umlandvo wetfu, tingonakaliswa.
Kubekwa Kanye Nekutfolwa Kwemlandvo Kubongcondvomshini: Umlandvo logciniwe ubekwa ngendlela lefanele futsi levikelekile, kute ungalahleki futsi ungonakaliswa kukhanya kanye nekuba manti. Kwakhiwe luhlelo lolutsite lwangcondvomshini lolusita ekucwaningeni kanye nasekutfoleni letintfo letiligugu letimayelana nemlandvo wetfu.
[Titfombe emakhasini 32]
1. Sitfombe se-“Photo-Drama of Creation.” 2. Luhla lwetikhokhelo. 3. Imoto lenembhobho. 4. Simbonyo se-Sicongosekulindza sa-April 15, 1912. 5. Incwadzi yekuboshwa kwa-J. F. Rutherford. 6. Umbhobho wemsakato i-WBBR. 7. Igilamafoni. 8. Sikhwama sekutfwala tincwadzi. 9. Emaphuzu labhalwa ngulotsite. 10. Ithelegramu leya ku-J. F. Rutherford.