I-Watchtower ONLINE LIBRARY
I-Watchtower ONLINE LIBRARY
WeSicongosekulindza
SiSwati
  • LIBHAYIBHELI
  • LOKUTFOLAKALAKO
  • IMIHLANGANO
  • w12 7/1 emakh. 27-29
  • Kufanele Yini Uwetsembe Umbono Wakho Ngemuntfu Nawucala Kumbona?

Kute i-video kulolokukhetsile.

Siyacolisa. Kube nenkinga nayisavuleka le-video.

  • Kufanele Yini Uwetsembe Umbono Wakho Ngemuntfu Nawucala Kumbona?
  • Sicongosekulindza Simemetela UMbuso WaJehova—2012
  • Tihlokwana
  • Tincwadzi Letinemaphuzu Lafanako
  • Kwehlulela Ususela Endleleni Umuntfu Labukeka Ngayo
  • Kubukeka Kungase Kukhohlise
  • Labanye Bakushintja Kucabanga Kwabo
  • Ungehluleli Labanye Ngendlela Lababukeka Ngayo
    Sicongosekulindza Simemetela UMbuso WaJehova (Lofundvwako)—2018
  • Nkulunkulu Ukhetsa Davide
    INcwadzi Yami Yetindzaba TeliBhayibheli
  • Ungubani Jesu Khristu?
    Lingasifundzisani LiBhayibheli?
  • Ngubani Jesu Khristu?
    Lifundzisani Mbambambamba LiBhayibheli?
Sicongosekulindza Simemetela UMbuso WaJehova—2012
w12 7/1 emakh. 27-29

Kufanele Yini Uwetsembe Umbono Wakho Ngemuntfu Nawucala Kumbona?

DOKOTELA lotsite bekatiphumulele endlini yakhe, abukele luhlelo lwe-TV, lebekukhulunywa kulo nendvuna yembuso wase-Ireland. Ngemuva kwekubukisisa buso balendvuna, lodokotela wabona lokutsite lebekukhombisa kutsi lendvuna inesimila. Wayeluleka kutsi ihambe iyopotjolwa ngekushesha.

Kwatfolakala kutsi lodokotela bekacinisile. Lodokotela bekanelikhono lekubona kugula kwemuntfu ngekumbuka. Labanye bantfu banemuva wekutsi banelikhono lelifananako ekuboneni similo semuntfu, buntfu bakhe kanye nekwetsenjwa kwakhe, nabacala kumbona.

Emakhulwini eminyaka leyendlulile, labanye basebentise isayensi kute batfole buntfu bemuntfu ngekubuka indlela lakheke ngayo. Loko bakubita ngekutsi yi-physiognomy, i-Encyclopædia Britannica lekuchaza ngekutsi “yisayensi lengemanga lephatselene nebuntfu lobubonakala ebusweni nome endleleni umtimba lowakheke ngayo.” Ngelikhulu lesi-19 leminyaka, tati tenhlalo yebantfu nemasiko njenga-Francis Galton, longumzala wa-Charles Darwin kanye netati tebucala letinjengaCesare Lombroso waseTaliyane, taveta imibono lefananako netindlela lesetingasasebenti.

Bantfu labanyenti solo bakholelwa kutsi kungenteka ukhone kwati buntfu balomunye umuntfu ngekumane nje ubuke indlela lakheke ngayo. Kufanele sikwetsembe yini loku?

Kwehlulela Ususela Endleleni Umuntfu Labukeka Ngayo

Sibonelo sekwehlulela ngembono lobanawo nawucala kubona umuntfu siyatfolakala eBhayibhelini encwadzini yaSamuweli Wekucala. Nkulunkulu Jehova watjela umphrofethi Samuweli kutsi agcobe lilunga lemndeni waJese njengenkhosi yaka-Israyeli yesikhatsi lesitako. Lombhalo utsi: “Batsi nabefika, Samuweli wabona Eliyabe, wase ucabanga utsi: ‘Impela logcotjiwe waSimakadze nguye lona losembikwaSimakadze.’ Kodvwa Simakadze wakhuluma kuSamuweli, watsi: ‘Ungabheki kubukeka nebudze bakhe, ngobe yena ngimalile. Simakadze akabuki tona tintfo letinakwa ngumuntfu. Umuntfu ubuka lingaphandle lemuntfu, kodvwa Simakadze ubuka inhlitiyo.’” Kwashiwo lokufananako nasemadvodzaneni aJese lasitfupha. Ekugcineni, ngendlela leyehlukile kuloko bekucatjangwa ngulomphrofethi naJese, Nkulunkulu wakhetsa indvodzana yaJese yesiphohlongo—Davide—lobekangumfana lomncane kutsi abe yinkhosi yesikhatsi lesitako futsi kute lobekacabanga kutsi kutawugcotjwa yena.—1 Samuweli 16:6-12.

Tintfo atikashintji nalamuhla. Eminyakeni lembalwa leyendlulile eJalimane, phrofesa wetebucala wenta luhlolo lobelufaka ekhatsi bafundzi betemtsetfo labangu-500. “Bekunetivakashi” letingu-12 lebetingatiwa ngulabafundzi. Kuletivakashi, bekunemphatsi wemaphoyisa waleyondzawo, umshushisi wakhona, umphatsi timali wasenyuvesi, lokhulumela sive, bameli, tisebenti tasenkantolo kanye netigebengu letintsatfu lebetilahlwe ngemacala. Ngekubuka indlela labetibukeka ngayo kanye netintfo letivakashi letatsi tiyatitsandza, labafundzi bekufanele bakhetse kuletivakashi kutsi ngutiphi lebetilahlwe ngemacala, tente buphi bucala, nekutsi sivakashi ngasinye besenta msebenti muni.

Waba yini umphumela? Bafundzi labacishe babe ngemaphesenti langu-75 bakhona kutibona letigebengu letintsatfu. Emaphesenti langu-60 alabafundzi atsi tivakashi letiyimfica titephulamtsetfo kantsi atisito. Munye umfundzi kulabasikhombisa watsi umshushisi wendzawo ushushumbisa tidzakamiva futsi umfundzi munye kulabatsatfu watsi umphatsi wemaphoyisa ulisela. Kwehlulela ngendlela umuntfu labukeka ngayo kungase kube liphutsa. Kungani kunjalo?

Kubukeka Kungase Kukhohlise

Nasicala kubona umuntfu, sivame kuncuma kutsi ungumuntfu lonjani ngalokwenteka kitsi esikhatsini lesendlulile. Etimeni letinjalo, sivame kwehlulela ngalesikucabangako. Ngaphandle kwekumehlulela ngekubukeka kwakhe, umuntfu singase simehlulele ngebuve bakhe, luhlunga lwakubo, sikhundla sakhe nome inkholo.

Nangabe loko lesikucabangako ngalomuntfu kuliciniso, siyatincoma ngekutsi umbono wetfu uliciniso futsi loko kusenta siciniseke kutsi singawetsemba umbono wetfu ngemuntfu nasicala kumbona. Nome kunjalo, nasesibonile kutsi besinembono loliphutsa ngaye nasicala kumbona, senta njani? Nangabe setsembekile, kufanele siwulahle lombono loliphutsa labesinawo ngaye futsi simehlulele ngalangiko. Nasingenti njalo, singase sivise labanye buhlungu nobe sibakhube ngesizatfu sekutsi sibona likhono letfu lekwehlulela lincono.

Kwehlulela umuntfu ngendlela labukeka ngayo kungalimata lowehlulelako nalowehlulelwako. Nasi sibonelo saloko, ngesikhatsi saJesu emaJuda lamanyenti awazange avume kutsi Jesu unguMesiya lotsenjisiwe. Kungani enta njalo? Abesekela umbono wawo endleleni Jesu labekabukeka ngayo futsi abetibonela indvodzana yembati wasendzaweni. Nanobe abekhangwa ngemavi aJesu lahlakaniphile kanye nemisebenti yakhe yemandla, abemkhobosa ngobe loko labekakucanga ngaye bekusekelwe emagameni ekutjelwa. Simo sawo sengcondvo senta kutsi Jesu awashiye ayoshumayela kulenye indzawo, waze watsi: “Umphrofethi uhlonishwa nome kukuphi, ngaphandle kwasendzaweni yakubo, nakubantfu bakubo.”—Matewu 13:54-58.

Lawo maJuda abengemalunga esive lebesesikulindze sikhatsi lesidze kufika kwaMesiya. Siphetfo lafinyelela kuso nawacala kumbona sawavimbela kutsi angamboni Mesiya nase afikile lokwabangela kutsi Nkulunkulu angasawemukeli. (Matewu 23:37-39) Babandlululwa ngendlela lefananako nebalandzeli baJesu. Bantfu labanyenti bebangakholwa kutsi lelicembu lelincane lebadwebi labebalibukela phansi bantfu labafundzile kanye nebaholi benkholo yebuJuda, belingasho lokutsite lokubalulekile. Labantfu labachubeka betsemba umbono wabo ngemuntfu nabacala kumbona, balahlekelwa litfuba lelihle lekuba balandzeli beNdvodzana yaNkulunkulu.—Johane 1:10-12.

Labanye Bakushintja Kucabanga Kwabo

Bebakhona bantfu labebaphila ngesikhatsi Jesu asesemhlabeni labatitfoba nabatibonela ngewabo tintfo Jesu latenta, bashintja indlela labacabanga ngayo. (Johane 7:45-52) Emkhatsini walabantfu, bekunemalunga lamanyenti emndeni wakhaboJesu lacale angetsembi kutsi lilunga lemndeni wakubo kungenteka linguMesiya. (Johane 7:5) Kuyajabulisa kutsi ngekuhamba kwesikhatsi, bakushintja kucabanga kwabo futsi bakholwa nguye. (Imisebenti 1:14; 1 Khorinte 9:5; Galathiya 1:19) Ngendlela lefananako, ngekuhamba kweminyaka labanye eRoma labebamelele sive semaJuda bebafuna kutivela umphostoli Pawula akhuluma kunekutsi betsembe emahemuhemu labekasakatwa titsa temaKhristu. Ngemuva kwekutsi sebativele, labanye babo baba ngemakholwa.—Imisebenti 28:22-24.

Nalamuhla, bantfu labanyenti banembono loliphutsa ngaboFakazi BaJehova. Kwentiwa yini loko? Etikhatsini letinyenti, akwentiwa kutsi batihlolele bona emaciniso nobe batihlolele bona kutsi tinkholelo netimfundziso taboFakazi tisekelwe emibhalweni yini. Esikhundleni saloko, kwentiwa kutsi abakholwa kutsi boFakazi BaJehova baphetse liciniso nakutiwa endzabeni yenkholo. Njengobe sesichazile, loko kufanana ncamashi nembono bantfu labebanawo ngemaKhristu angesikhatsi sebaphostoli.

Akumangalisi kutsi letinkhulumo letingatsandzeki nobe letona ligama laboFakazi ticondziswa kubantfu labatimisele kulandzela sibonelo saJesu. Kungani kungasimangalisi loku? Kungobe Jesu wabecwayisa balandzeli bakhe beliciniso watsi: “Niyawutondvwa bantfu bonkhe ngenca yelibito lami.” Wase ubakhutsata ngalamavi latsi: “Kodvwa lokhutsatelako kuze kubesekupheleni, uyawusindziswa.”—Matewu 10:22.

Ngesizatfu sekutsi balalela umyalo waJesu, boFakazi BaJehova lamuhla bayatimisela kute batjele bantfu emhlabeni wonkhe tindzaba letimnandzi letimayelana neMbuso waNkulunkulu. (Matewu 28:19, 20) Bantfu labangafuni kulalela batilahlekisela litfuba lekuhamba ngendlela leya ekuphileni lokuphakadze. (Johane 17:3) Kutsiwani ngawe? Utawuvuma yini kucondziswa ngumbono loba nawo ngemuntfu nawucala kumbona nemagama ekutjelwa nome utatinika sikhatsi sekuhlatiya onkhe emaciniso ngaboFakazi BaJehova? Khumbula: Kubukeka kungase kukhohlise, nemibono lesinayo ingaba liphutsa, kodwa kuhlolisisa onkhe emaciniso ngendzaba kungakumangalisa.—Imisebenti 17:10-12.

[Sitfombe ekhasini 27]

Umbono emaJuda lamanyenti laba nawo nakacala kubona Jesu, wawenta angamemukeli njengaMesiya

[Sitfombe ekhasini 29]

Indlela lotsatsa ngayo boFakazi BaJehova isekelwe embonweni lonawo ngabo yini nome emacinisweni?

    Tincwadzi TesiSwati (2002-2025)
    Phuma
    Ngena
    • SiSwati
    • Share
    • Khetsa Lokufunako
    • Copyright © 2025 I-Watch Tower Bible and Tract Society of Pennsylvania
    • Imibandzela Yekuyisebentisa
    • Kusetjentiswa Kwemininingwane Yakho
    • Privacy Settings
    • JW.ORG
    • Ngena
    Share