Umbuto Lovela Kubafundzi . . .

Yini Leyenta BoFakazi BaJehova Bashumayele Emtini Ngemuti?

▪ EBhayibhelini, kunalomyalo lolandzelako Jesu lawuniketa balandzeli bakhe: “Ngako-ke hambani, nente tive tonkhe tibe bafundzi bami . . . nibafundzise.” (Matewu 28:19, 20) Onkhe emaKhristu kufanele yini awugcine lomyalo? Bafundzi baJesu bekucala bebati kutsi uyasebenta kubo. Sibonelo saloko kutsi umphostoli Phetro watsi: “[Jesu] wasitfuma kutsi sishumayele kubantfu, sifakaze.” (Imisebenti 10:42) Umphostoli Pawula wabhala: “Vele ngimelwe kulishumayela. Kodvwa maye kimi, nangingalishumayeli liVangeli!”—1 Khorinte 9:16.

BoPawula, Phetro kanye nemaKhristu ekucala bawulalela lomyalo waJesu. Benta umsebenti wekushumayela waba ngumsebenti lobaluleke kuyendlula yonkhe. (Imisebenti 5:28-32, 41, 42) BoFakazi BaJehova lamuhla betama kwenta lokufananako. Bashumayela umlayeto lofanana nalowo lowashunyayelwa nguJesu, lomayelana ‘neMbuso welizulu.’—Matewu 10:7.

Bobani lokufanele bashunyayelwe? Jesu wachaza kutsi kufanele kushunyayelwe bonkhe bantfu endzaweni yonkhe. Watjela bafundzi bakhe, watsi: “Niyawuba bofakazi bami . . . kuze kube ngusekugcineni kwemhlaba.” (Imisebenti 1:8) Waphindze washo kusenesikhatsi kutsi nalisengakapheli lelive lelibi, “leliVangeli ngembuso liyawushunyayelwa emhlabeni wonkhe.” (Matewu 24:14) EmaKhristu ekucala enta konkhe lokusemandleni kute akhulume nabo bonkhe bantfu, hhayi nje kuphela bantfu labebawajwayele nobe bantfu labebangenayo inkholo. (Kholose 1:23; 1 Thimothi 2:3, 4) Ngendlela lefananako, boFakazi BaJehova benta imetamo yekufinyelela bantfu bonkhe.a

Nguyiphi indlela lephumelela kancono yekushumayela lomlayeto lomayelana neMbuso waNkulunkulu? Jesu, umuntfu lobekanelwati loluncono ngaloko, watfumela bafundzi bakhe emadolobheni, emaphandleni nasemakhaya. (Matewu 10:7, 11, 12) Ngemuva kwekufa nekuvuka kwaJesu, bafundzi bakhe bachubeka nekushumayela “emitini yebantfu.” (Imisebenti 5:42) Njengobe kwenta Jesu, labafundzi bashumayela nome ngukuphi lapho bekunebantfu khona ngisho nasetindzaweni tesive. (Johane 4:7-26; 18:20; Imisebenti 17:17) Lamuhla, boFakazi BaJehova basebentisa tindlela letifananako kute bashumayele bonkhe bantfu.

Jesu waveta kutsi akusibo bonkhe bantfu labatawulalela. (Matewu 10:14; 24:37-39) Loko kufanele kuwaphatamise yini emaKhristu kulomsebenti wekushumayela? Cabanga nganasi sifananiso: Nakungatsiwa usecenjini lebatakuli ngemuva kwekutamatama kwemhlaba lokukhulu, ungayekela yini kufuna bantfu labadzinga kutakulwa ngesizatfu sekutsi bambalwa labatfolakele? Chake, ungetama kuphikelela nangabe kusenelitsemba lekutsi ukhona umuntfu losengamtakula. Jesu wayala bafundzi bakhe kutsi baphikelele nangabe lisekhona litsemba lekutfola labatsite labatatilalela tindzaba letimnandzi teMbuso waNkulunkulu. (Matewu 10:23; 1 Thimothi 4:16) Ngekuchubeka bafuna labanjalo emtini ngemuti, boFakazi BaJehova bakhombisa kutsi bayamtsandza Nkulunkulu nabomakhelwane babo nekutsi kusindza kwabomakhelwane babo kutawuya ngekutsi bayawuva futsi bayawulalela yini umlayeto lomayelana neMbuso.—Matewu 22:37-39; 2 Thesalonika 1:8.

Lomagazini lowufundzako wendlulisela umlayeto weliBhayibheli. Kute ufundze kabanti, sicela ukhulume naboFakazi BaJehova esikhatsini lesitako nabakuvakashele nome ubhalele bashicileli balomagazini.

[Umbhalo longentansi]