“Benginjengelufudvu Esigujini Salo”

NGESIKHATSI semkhankaso wekushumayela lobewuphutfuma lowatsatsa emalanga layimfica nga-August nome nga-September 1929, bashumayeli labangetulu kwa-10 000 basakateka kulo lonkhe laseMelika. Bahambisa tincwadzi nabobhukwana labayikota yesigidzi. Kulabamemeteli beMbuso bekunema-colporteurs layinkhulungwane. Linani lawo laselandze kakhulu. I-Bulletina yatsi “ngeke ukukholwe” kutsi linani lemahlahlandlela seliphindzeke katsatfu kusukela nga-1927 kuya ku-1929.

Ngasekupheleni kwabo-1929, umnotfo wawa kakhulu. NgaLesibili nga-October 29, 1929, kwevakala tindzaba letetfusako tekwehla kwentsengo yemanani etintfo eMakethe Yemasheya eMelika, lokwatsintsa simo semnotfo emhlabeni wonkhe, kwabangela Kucindzeteleka Lokukhulu. Emabhange awa njengobe abengasenayo imali. Emapulazi avalwa. Emafemu lamakhulu nawo avalwa. Tigidzi tebantfu taphelelwa ngumsebenti. Nga-1933, sibalo sekudliwa kwetindlu sakhula, kangangekutsi bekudliwa tindlu letingu-1 000 ngelilanga eMelika.

Bashumayeli basikhatsi sonkhe bebatawenta njani kulesikhatsi lesimatima kangaka? Lokunye lokwabasita kuba namahamba nendlwana. Bebahlala mahhala kuye futsi bangawukhokhi umtselo, labomahamba nendlwana basita emahlahlandlela lamanyenti kutsi anake kakhulu umsebenti wekushumayela futsi aphile ngemadlana lencane labekanayo.b Ngesikhatsi semhlangano wesigodzi, lomahamba nendlwana wafana nelikamelo lasehhotela. Nga-1934 i-Bulletin yakhuluma ngemininingwane yetindlu letincane tekuhlala letatincono letatinemaphayiphi emanti, sitofu sekupheka, umbhedze logocwako nekwekushisisa indlu nakumakhata.

Bashumayeli emhlabeni wonkhe labakhona kubhekana netinkinga benta lisu lekwakha bomahamba nendlwana. Victor Blackwell nakakhumbula utsi: “Nowa abengakwati kwakha umkhumbi futsi nami bengingakaze ngakhe mahamba nendlwana futsi bengite lwati lekuwakha.” Nanobe kunjalo wawakha.

Avery naLovenia Bristow bebanemoto lengumahamba nendlwana. Avery watsi: “Bengifana nelufudvu esigujini salo—bengihlale nginendzawo yekufihla inhloko.” BakaBristows lebebanamahamba nendlwana lofakwe i-tar-paper elubondzeni, baba ngemahlahlandlela naHarvey na-Anne Conrow. Ticucu tale-tar-paper betidzilika njalo nabatfutsela kulenye indzawo. Avery nakakhumbula utsi: “Solo kwatsi nhlo, kute lowake wabona mahamba nendlwana lonjengalona futsi kute lowaphindze wabona lofanana nawo.” Avery watsi bakaConrows nemadvodzana abo lamabili “bangumndeni lojabula kakhulu kunayo yonkhe lengake ngayibona.” Harvey Conrow wabhala watsi: “Asikaze seswele lutfo futsi sitiva sivikelekile njengobe senta umsebenti waJehova futsi sinakekelwa nguye ngelutsandvo.” Ngekuhamba kwesikhatsi lomndeni wakaConrows waya eSikolweni saseGileyadi futsi wabelwa ePeru kutsi ube titfunywa telivangeli.

Umndeni wakaBattainos nawo waba ngemamahlahlandlela. Ngemuva kwekutsi Giusto naVincenza batfole kutsi batawuba nemntfwana, bashintja imoto yabo yeluhlobo lwe-A Ford yanga-1929 yaba ngumahamba nendlwana “lebeyicishe ifanane nelihhotela lelintofontofo” nayicatsaniswa nemathende labebake bahlala kuwo. Bachubeka esabelweni sabo lebebasitsandza nentfombatanyana yabo, bashumayela emaTaliyane labehlala eMelika.

Bantfu labanyenti bebatilalela tindzaba letimnandzi kodvwa njengobe bebaphuyile futsi bangasebenti, bebangakavami kunikela ngemali nabatsatsa tincwadzi letisekelwe eBhayibhelini. Esikhundleni saloko, bebanikela nganome ngabe yini labebanayo. Emahlahlandlela lamabili abala tintfo letehlukehlukene letanikelwa ngulabebatsandza kufundza, atfola kutsi betitinhlobo letingu-64. Loluhla lwaletintfo “belufanana neluhla lwetintfo tasesitolo.”

Fred Anderson wahlangana nemlimi lobekafuna letinye tincwadzi tetfu wase unikela ngetibuko lebetitenina. Epulazini lelilandzelako, satfola lenye indvodza lebeyitsandza tincwadzi tetfu kodvwa yatsi: “Ngite tibuko tekufundza.” Ngesikhatsi ifaka tibuko tamakhelwane wayo lesefika nato, yakhona kufundza kahle yaphindze yanikelela letincwadzi naletibuko.

Herbert Abbott abephetse lihhoko lelincane letinkhukhu emotweni yakhe. Ngemuva kwekutsi banikele ngetinkhukhu letitsatfu nome letine, abetitsatsa ayotitsengisa emakethe bese utsatsa leyomali etse imoto. Wabhala watsi: “Bekunetikhatsi lapho besihle sibabete imali, kodvwa loko akuzange kusiyekelise. Nasinaphethiloli emotweni besikhona kuchubeka nemsebenti wetfu futsi setsembele kuJehova.”

Kwetsembela kuJehova ngekutimisela lokukhulu kwabasita bantfu bakhe kuleyo minyaka yebumatima. Maxwell na-Emmy Lewis basindza ngekulambisa ngesikhatsi kunesiphepho lesasihambisana nemvula ngesikhatsi mahamba nendlwana wabo ujubeka emkhatsini ujutjwa sihlahla lesawa. Maxwell wabhala watsi: “Tintfo letifana naleti atizange tisiphazamise, bekumane nje kutehlakalo futsi besingakucabangi nakancane kuyekela. Kwakunemsebenti lomnyenti lokwakufanele siwente futsi besitimisele kuwenta.” Basitwa bangani lababatsandzako, Maxwell na-Emmy bawakha kabusha nangekutimisela lomahamba nendlwana wabo.

Kuletikhatsi lesiphila kuto letimatima, lomoya wekutidzela uyabonakala etigidzini taboFakazi BaJehova labanenshisekelo. Njengalamhlahlandlela, natsi sitimisele kuchubeka nemsebenti wekushumayela adzimate Jehova atsi sekwenele.