Bewati Yini Ngaloku?

Ngetikhatsi tekubhalwa kweliBhayibheli, kwakubaluleke ngani kutsi umuntfu adzabule tingubo takhe?

IMIBHALO ichaza timo letinyenti lapho umuntfu lotsite adzabula tingubo takhe khona. Sento lesinjalo singabamangalisa bantfu esikhatsini lesiphila kuso. Nobe kunjalo, kumaJuda bekuyindlela yekukhombisa imiva lejulile lebeyibangelwe kudzabuka, lusizi, kutiva uhlazekile, kutfukutselela nobe kulila.

Sibonelo saloku kutsi Rubeni ‘wadzabula tingubo takhe’ nakatfola kutsi lisu lakhe lekukhulula Josefa umnakabo alikaphumeleli ngobe Josefa abesatsengiswe kutsi ayewuba sigcili. Uyise wabo Jakobe, ‘wadzabula tingubo takhe’ ngesikhatsi acabanga kutsi Josefa udliwe silwane sesiganga. (Gen. 37:18-35) Jobe ‘wadzabula tingubo takhe’ ngesikhatsi atjelwa kutsi bonkhe bantfwana bakhe babulewe. (Jobe 1:18-20) Sitfunywa ‘lebesidzabule tingubo taso’ saya ku-Eli umPhristi Lomkhulu kute simtjele kutsi ema-Israyeli ehluliwe emphini, emadvodzana lamabili a-Eli abulewe nekutsi libhokisi lesivumelwane litfunjiwe. (1 Sam. 4:12-17) Ngesikhatsi Josiya afundzelwa emavi eMtsetfo futsi abona emaphutsa lentiwe bantfu bakhe, ‘wadzabula tingubo takhe.’—2 Khos. 22:8-13.

Ngesikhatsi kutsetfwa licala laJesu, Khayafase umPhristi Lomkhulu “wadzabula tingubo takhe tangetulu” nakeva shengatsi uhlanjalatiwe. (Mat. 26:59-66) Ngekusho kwemtsetfo wenkholo lowasungulwa baholi bemaJuda, nome ngubani lobekeva kuhlanjalatwa libito laNkulunkulu, bekabophekile kutsi adzabule tingubo takhe. Lenye inkholelo leyaba khona ngemuva kwekubhujiswa kwelithempeli eJerusalema beyitsi “loyo lova kuhlanjalatwa Libito LaNkulunkulu esikhatsini setfu, akudzingeki kutsi adzabule tingubo takhe, ngobe umuntfu utawugcine sekete tingubo, sekanetidvwedvwe nje kuphela.”

Kuliciniso kutsi sento sekudzabula tingubo besingasho lutfo kuNkulunkulu ngaphandle nangabe loyo muntfu abeva buhlungu mbamba. Kungako Jehova atjela bantfu bakhe kutsi ‘badzabule tinhlitiyo tabo, hhayi tingubo tabo futsi babuyele kuye.’—Jow. 2:13.