Ngangingehlukani nesibhamu sami

KUPHILA KWAMI KWESIKHATSI LESENGCILE:

Ngatalelwa endzaweni lengephandle kwelidolobha laseRome futsi ngakhulela khona, endzaweni lehlala bantfu labaphuyile. Kuphila kwakulukhuni. Angizange sengimbone make longitalako futsi bengite buhlobo lobuhle nababe. Ngakhula ngifundza indlela yekuphila yasesitaladini.

Ngesikhatsi ngineminyaka lelishumi budzala, besengivele ngicalile kweba. Nangineminyaka lengu-12 budzala, ngabaleka ekhaya kwekucala ngca. Tikhatsi letinyenti babe bekangilandza emaphoyiseni futsi ahambe nami ekhaya. Ngangivame kucabana nebantfu, nginebudlova futsi ngitfukutselele wonkhe umhlaba. Ngesikhatsi ngineminyaka lengu-14 budzala, ngahamba siphelane ekhaya. Ngacala kusebentisa tidzakamiva futsi ngahlala esitaladini. Njengobe bengite indzawo yekulala, bengigcekeza imoto futsi ngilale kuyo kuze kube sentsatsakusa. Bengibese ngibuka indzawo lenemanti lapho bengitawugeza khona.

Ngaba nelikhono lekweba, futsi ngangeba yonkhe intfo kusukela etikhwameni kuye ekugcekezeni tindlu ebusuku kanye netindzawo tekungenisa tivakashi. Ngadvuma kabi futsi ngekushesha ngamenywa licembu lelibi letigebengu kutsi ngibe lilunga lalo, lelangivulela “litfuba” lekutfutfukela ekugcekezeni emabhange. Ngesizatfu sekutsi ngangisidlova, ngekushesha ngaba lilunga lelihlonishwako lalelicembu. Ngangingehlukani nesibhamu sami; ecinisweni ngangisifaka ngaphansi kwemcamelo nangilele. Budlova, kusebentisa tidzakamiva, kweba, kwetfuka kanye nekutiphatsa lokubi besekuyindlela yami yekuphila. Bengihlale ngifunwa ngemaphoyisa. Ngaboshwa tikhatsi letinyenti, futsi ngacitsa iminyaka leminyenti ngiphuma ngingena ejele.

INDLELA LIBHAYIBHELI LELAKUGUCULA NGAYO KUPHILA KWAMI:

Ngalelinye lilanga ngiphuma ejele, ngakhetsa kuvakashela make wami lomncane. Bengingati kutsi yena kanye nebantfwana bakhe lababili sebaBoFakazi BaJehova. Bangimema kutsi ngiye nabo emhlanganweni waBoFakazi. Ngekulangatelela lokukhulu, ngahamba nabo. Ngesikhatsi sifika eHholweni LeMbuso, ngacela kuhlala ngasemnyango kute ngibone bonkhe bantfu labangenako nalabaphumako. Nangaleso sikhatsi, bengisiphetse sibhamu sami.

Lowo mhlangano wakushintja kuphila kwami. Ngiyakhumbula ngicabanga kutsi mhlawumbe ngikulenye iplanethi. Ngavuselwa bantfu labanemusa nalebebamomotseka. Ngiwukhumbula kahle umusa wabo nebungani babo. Ecinisweni loku bekwehluke kakhulu kuloko lebengikwetayele!

Ngacala kufundza liBhayibheli naBoFakazi. Njengobe ngangichubeka ngifundza, kwacaca kutsi kufanele ngiyishintje ngalokuphelele indlela lengiphila ngayo. Ngasebentisa seluleko lesikuTaga 13:20 lesitsi: “Lohambisana nebantfu labahlakaniphile naye ugcina asahlakaniphile; kodvwa umngani wetilima uyawuhlupheka.” Ngabona kutsi kwakudzingeka ngitehlukanise nalelicembu. Bekungasimelula kukwenta loko, kodvwa ngelusito lwaJehova ngaphumelela.

Ngacala kuhlanta kuphila kwami. Ngemuva kwekwenta imetamo leminyenti, ngayekela kubhema lugwayi nekusebentisa tidzakamiva. Ngahhula tinwele tami letindze, ngalahla emacici ami futsi ngayekela nekusebentisa lulwimi lolubi. Kwekucala ngca ekuphileni kwami, ngakhona kulawula tento tami.

Angizange sengikujabulele kufundza nekutadisha, ngako bengikutfola kuyinsayeya kunaka nangifundza liBhayibheli. Nanobe kunjalo, njengobe bengenta imetamo, kancane kancane ngacala kumtsandza Jehova, futsi kunalokutsite lokwashintja ngekhatsi kimi​—nembeza wami wacala kungihlupha. Ngangivame kuba nemiva lengakalungi, ngingabata kutsi Jehova angangicolela kuto tonkhe tintfo letimbi lengitentile. Kuleso sikhatsi ngatfola indvudvuto ekufundzeni ngendlela Jehova layitsetselela ngayo iNkhosi Davide ngemuva kwekwenta tono letinkhulu.​—2 Samuweli 11:1–12:13.

Lenye insayeya bekukucocela labanye ngekukholwa kwami nangishumayela emtini ngemuti. (Matewu 28:19, 20) Ngangesaba kutsi ngitawutfola umuntfu lengamlimata nome lengamphatsa kabi esikhatsini lesendlulile. Kodvwa kancane kancane ngakhona kukuncoba kwesaba kwami. Ngacala kutfola kwenetiseka ekusiteni labanye kutsi bafundze ngaBabe wetfu lomuhle wasezulwini, lotsetselela kakhulu.

INDLELA LENGIZUZE NGAYO:

Kufundza ngaJehova kukusindzisile kuphila kwami! Bangani bami labanyenti bakadzeni sebafile nobe basejele, kodvwa mine ngijabulela kuphila lokwenetisa mbamba kanye nelikusasa lengibuke embili kulo. Ngifundze kutfobeka, kulalela kanye nekulawula intfukutselo yami. Ngaleso sizatfu, ngijabulela kuba nebuhlobo lobuhle nebantfu lengiphila nabo. Ngiyajabula emshadweni wami naCarmen, umfati wami lomuhle. Sobabili sitfola injabulo lenyenti ngekusita labanye kutsi bafundze liBhayibheli.

Nyalo ngenta umsebenti lokahle, ngalesinye sikhatsi utsintsa emabhange, kodvwa esikhundleni sekutsi ngiwagcekeze, ngiyawahlanta!