Ngubani lowadala Nkulunkulu?

Bona ngeliso lengcondvo babe akhuluma nendvodzana yakhe leneminyaka lesikhombisa. Utsi: “Kadzeni, Nkulunkulu wadala umhlaba nato tonkhe tintfo letikuwo, waphindze wenta lilanga, inyeti netinkhanyeti.” Lomntfwana ucabanga ngaletintfo kwesikhashana bese ubuta babe wakhe utsi: “Babe, ngubani lowadala Nkulunkulu?”

Lobabe uphendvula atsi: “Kute umuntfu lowadala Nkulunkulu. Abesolo akhona.” Lemphendvulo lemelula iyamenetisa lomntfwana ngaleso sikhatsi. Kodvwa njengobe achubeka akhula, uyachubeka atibuta lombuto. Ukutfola kumatima kucondza kutsi umuntfu angaba khona njani ngaphandle kwesicalo. Phela nendzawo yonkhe inaso sicalo. Uyatibuta: ‘Nkulunkulu yena wavelaphi?’

LiBhayibheli liwuphendvula njani lombuto? Liwuphendvula ngendlela lobabe losesibonelweni setfu lawuphendvula ngayo. Mosi wabhala: “Yebo, Simakadze! . . . Ngaphambi kwekudalwa kwetintsaba, yebo, ungakawudali nemhlaba, kusukela phakadze kuze kube phakadze, wena Nkulunkulu ukhona.” (Tihlabelelo 90:1, 2) Ngendlela lefananako, nemphrofethi Isaya wababata watsi: “Awati yini? Awukeva yini? Simakadze unguNkulunkulu waphakadze, uMdali wemikhawulo yemhlaba.” (Isaya 40:28) Ngendlela lafananako, incwadzi yaJuda itsi Nkulunkulu abesolo akhona “kusukela endvulo, nanyalo, kuze kube phakadze.”​—Juda 25.

Lemibhalo ikhombisa kutsi Nkulunkulu ‘uyiNkhosi yaphakadze,’ njengobe nemphostoli Pawula amchaza. (1 Thimothi 1:17) Loko kusho kutsi Nkulunkulu abesolo akhona, ngisho nobe singacabanga ngasiphi sikhatsi sasendvulo. Futsi utawuchubeka akhona nasesikhatsini lesitako. (Sembulo 1:8) Ngako, kuba khona kwakhe phakadze kuyincenye leyinhloko yebunguye bakhe njengobe anguSomandla.

Kungani sikutfola kumatima kucondza lendzaba? Kungobe kuphila kwetfu lokufishane kusenta singasicondzi sikhatsi Jehova lasiphilile. Ngenca yekutsi Nkulunkulu uphila phakadze, kuye iminyaka leyinkhulungwane ilingana nelilanga linye. (2 Phetro 3:8) Ase sibekise: Intsetse lephila emalanga langaba ngu-50 nje kuphela, ingakucondza njani kuphila kwetfu lokutsatsa iminyaka lengu-70 nobe lengu-80? Angeke ikucondze. Kungako liBhayibheli litsi sifanana netintsetse nasicatsaniswa neMdali wetfu Lomkhulu. Ngisho nelikhono letfu lekucabanga lincane nalicatsaniswa nelaNkulunkulu. (Isaya 40:22; 55:8, 9) Kungako kungasimangalisi kutsi kunetincenye taJehova umuntfu lehlulekako kuticondza.

Nanobe lamavi latsi Nkulunkulu uphila phakadze kumatima kuwacondza, siyabona kutsi aliciniso. Nangabe Nkulunkulu adalwe ngumuntfu lotsite, kusho kutsi loyo muntfu unguMdali. Nanobe kunjalo, njengobe liBhayibheli lichazile, nguJehova ‘lowadala tonkhe tintfo.’ (Sembulo 4:11) Ngetulu kwaloko, siyati kutsi indalo yonkhe lekhona nyalo ekucaleni beyingekho. (Genesisi 1:1, 2) Yavelaphi? Bekudzingeke kutsi umuntfu lowayidala abe khona. Bekakhona ngisho nangaphambi kwekutsi kudalwe letinye tidalwa letihlakaniphile, letifaka ekhatsi iNdvodzana lekuphela kwayo kanye netingilosi. (Jobe 38:4, 7; Kholose 1:15) Kuyacaca kutsi nguye labekakhona kusukela ekucaleni. Angeke kwenteke kutsi wadalwa; ngobe kute lokunye lebekukhona lebekungamdala.

Kudalwa kwetfu kanye naletinye tintfo kubufakazi bekutsi Nkulunkulu uphila phakadze. Loyo lowenta indalo yonkhe inyakate, naLoyo lowenta umtsetfo loyicondzisako, kufanele kutsi abesolo akhona. Nguye kuphela labengenta tonkhe tintfo tiphile.​—Jobe 33:4.