Sigodzi sase-Ela
Indzaba YaDavide NaGoliyathi—Iyinganekwane Yini?
Labanye bantfu bayatibuta kutsi indzaba yaDavide naGoliyathi iliciniso yini noma yindzaba nje leyinganekwane. Wake watibuta yini loku nawusafundza lendzaba? Nangabe wake, sicela ucabangisise nganayi imibuto lemitsatfu lelandzelako.
1 | Ukhona yini umuntfu longacishe abe ngemamitha lamatsatfu budze?
LiBhayibheli litsi Goliyathi abecishe abe ngemamitha lamatsatfu budze. (1 Samuweli 17:4) Labanye batsi ngeke kwenteke kutsi Goliyathi angaba mudze kangaka, kepha asewucabange ngaloku: Etikhatsini talamuhla umuntfu lomudze kakhulu lokwabhalwa ngaye bekangetulu kwemamitha langu-2.7. Ngeke sekwenteke yini kutsi Goliyathi abe mudze ngemasentimitha langu-15 kulomuntfu lobekangemamitha langu-2.7 budze? Bekaphuma esiveni semaRefa, lobekubantfu lebebatiwa ngemitimba lengakavami. Tincwadzi temlandvo taseGibhithe tangelikhulu lesi-13 B.C.E. tachaza kutsi esigodzini saseKhenani bekunetingwazi letesabekako lebetingetulu kwemamitha langu-2.4 budze. Ngako vele kungenteka kutsi Goliyathi abemudze kakhulu.
2 | Abengumuntfu mbamba yini Davide?
Kunesikhatsi lapho khona tati tazama kwenta indzaba yeNkhosi Davide ibe yinganekwane, kepha loko kwaba lukhuni kukwenta. Bacwaningi batfole imibhalo lekhuluma “ngendlu yaDavide.” Ngetulu kwaloko, naJesu Khristu wakhuluma ngaDavide njengemuntfu lowake waphila mbamba. (Matewu 12:3; 22:43-45) Kufika kwaJesu njengaMesiya lokusekelwe emlandvweni weliBhayibheli kukhomba kutsi usitukulwane saDavide. (Matewu 1: 6-16; Lukha 3: 23-31) Ngako Davide abengumuntfu mbamba.
3 | Letintfo lokukhulunywa ngato kulendzaba tenteka endzaweni lekhona mbamba yini?
LiBhayibheli litsi Davide naGoliyathi balwela eSigodzini sase-Ela. Kepha liphindze likucacise nakakhulu nalitsi emaFilisti abekanekise emkhatsini wemadolobha lamabili, laseSokho nelaseAzekha. Ema-Israyeli bekeme kulelinye ligcuma, nemaFilisti eme kulelinye. Betikhona mbamba yini letindzawo?
Naka naku lokushiwo ngulenye indvodza lesandza kuvakashela lendzawo, itsi: Lobekasivakashisa ungumuntfu longakholelwa eBhayibhelini, wasiyisa eSigodzini sase-Ela. Senyuka ngendlela leya esicongweni salentsaba. Nasisabuka lesigodzi, safundza umbhalo wa-1 Samuweli 17:1-3. Wabese ukhombisa ngesheya kwalesigodzi, watsi: “Lapha ngesencele senu tindzala taseSokho. Wagucuka, wase utsi: ‘Lapha ngesekudla senu tindzala taseAzekha. EmaFilisti abekanekise emkhatsini walamadolobha nakuletintsaba lenitibonako. Kungenteka lasime khona bekukanekise ema-Israyeli.’ Ngacabanga kutsi boSawula naDavide bebeme lapho ngime khona. Satsi nasisuka kuleligcuma sehlela kulomfula lowomile, lobewugcwele ematje. Ngabese ngicabanga Davide agobondzela abutsa ematje lashelelako lasihlanu, linye lawo lelabulala Goliyathi.” Njengalabanye, lendvodza lebeyivakashile yatsintseka kakhulu ngekutsi tindzaba letitfolakala eBhayibhelini tiliciniso.
Kute sizatfu sekungabata kutsi lendzaba iliciniso. Ikhuluma ngebantfu netindzawo letikhona mbamba. Lokubaluleke kakhulu kutsi lendzaba iseBhayibhelini, ngako-ke ivela kuNkulunkulu weliciniso “longeke acale emanga.”—Thithusi 1:2; 2 Thimothi 3:16.