Sicinisekiso Lesinemandla Lesisitfola Eluhlavini Loluncane LwesiHebheru

Singaciniseka mbamba yini kutsi tonkhe tetsembiso taNkulunkulu titawufezeka? Jesu bekaciniseka, futsi timfundziso takhe tasita tilaleli takhe kutsi tibe nekukholwa. Cabanga ngemfanekiso lawusho eNshumayelweni yakhe yaseNtsabeni lobhalwe kuMatewu 5:18 lotsi: “Ngicinisile ngitsi kini, ngisho nobe lizulu nemhlaba kungendlula, kodvwa luhlavu loluncane lweligama lolukuloMtsetfo ngeke lususwe kudzimate kube kulapho sekugcwaliseke konkhe loku.”

Luhlavu loluncane lwemagama esiHebheru lolutsi י (yod) luphindze lube luhlavu lwekucala leligama laNkulunkulu lelitsi Jehova (Tetragrammaton).a Ngetulu kwemagama kanye netinhlavu tawo letiseMtsetfweni waNkulunkulu, baFarisi kanye nebabhali bebatsatsa “luhlavu” ngalunye njengalolubalulekile.

Jesu watsi kungamane kwendlule emazulu nemhlaba kunekutsi luhlavu loluncane lweligama lolusemtsetfweni waNkulunkulu lungafezeki. Ecinisweni imiBhalo isicinisekisa kutsi emazulu nemhlaba ayohlala akhona kuze kube phakadze. (Tihlabelelo 78:69) Ngako lamavi aJesu lanemandla akhombisa kutsi ngisho nemininingwane lemincane lesemtsetfweni waNkulunkulu itawugcwaliseka.

Nkulunkulu Jehova unendzaba yini nemininingwane lemincane? Unayo. Cabanga ngaloku: Ema-Israyeli asendvulo bekatjelwe kutsi angephuli ngisho nalinye litsambo lemvu yeliPhasika. (Eksodusi 12:46) Mhlawumbe loko bekungabonakala kungakabaluleki. Ema-Israyeli bekati yini kutsi kungani kufanele angephuli ngisho nalinye litsambo lemvu yePhasika? Kungenteka bekangati. Noma kunjalo, Jehova Nkulunkulu bekati kutsi loku bekusiphrofetho sekutsi kute ngisho nalinye litsambo laMesiya lebelitawephulwa nakabulawa elugodvweni lekuhlushwa.​—Tihlabelelo 34:20; Johane 19:31-33, 36.

Emavi aJesu asifundzisani? Natsi singaciniseka ngalokuphelele kutsi tonkhe tetsembiso taNkulunkulu Jehova titawufezeka. Sitfola sicinisekiso lesinemandla eluhlavini loluncane lwesiHebheru!