Ungahlala Utfobekile Ngisho Nobe Ulingwa

1-3. Lomphrofethi waJehova lobekavela kaJuda wehluleka kwentani futsi waba yini umphumela? (Buka sitfombe lesisekucaleni kwalesihloko.)

NGESIKHATSI sekubusa kweNkhosi Jerobowamu, Jehova watfumela umphrofethi wakhe kaJuda kute ayomikisa umlayeto wesahlulelo lesibuhlungu kulenkhosi lesihlubuki yaka-Israyeli. Ngekutfobeka, lomphrofethi waNkulunkulu wawendlulisela ngekwetsembeka lomlayeto futsi Jehova wamvikela kulenkhosi lebeyitfukutsele.​—1 Khos. 13:1-10.

² Nasabuyela emuva lomphrofethi, wahlangana nalomunye mkhulu lobekachamuka eBetheli. Lomkhulu wenta shengatsi ungumphrofethi waJehova. Wayenga lomphrofethi waNkulunkulu kutsi angawulaleli umyalo waJehova lobewutsi: ‘Kufanele angakudli kudla, angawanatsi nemanti akhona, ngisho nendlela lete ngayo angabuyi ngayo.’ Jehova wamtfukutselela lomphrofethi. Kamuva, lomphrofethi waJehova nasabuyela ekhaya wahlangana nelibhubesi futsi lambulala.​—1 Khos. 13:11-24.

³ Yini leyenta lomphrofethi lobekatfobekile weca umyalo waNkulunkulu, wavumela kukhohliswa ngulomkhulu? LiBhayibheli alisitjeli. Kungenteka kutsi wakhohlwa kutsi bekumelwe ahambe ‘naNkulunkulu ngentfobeko.’ (Fundza Mikha 6:8.) EBhayibhelini, kuhamba naJehova kusho kumetsemba, kusekela bukhosi bakhe nekwenta loko lakushoko. Umuntfu lotfobekile uyati kutsi njalo kumelwe akhulume naBabe wakhe lonelutsandvo, longuJehova. Lomphrofethi bekufanele abute Jehova ngaleticondziso letinsha lebesekatitfola kulomkhulu kodvwa imiBhalo ayisho kutsi wakwenta loko. Ngaletinye tikhatsi, natsi kumelwe sente tincumo letimatima futsi kungahle kungacaci kahle loko lokufanele sikwente. Kufuna ticondziso taJehova ngekutfobeka kungasisita kutsi sigweme kwenta emaphutsa lamakhulu.

4. Sitawucoca ngani kulesihloko?

⁴ Esihlokweni lesendlulile sifundze ngekutsi kubaluleke ngani kutsi emaKhristu atfobeke kanye nangekutsi singatfobeka njani. Nobe kunjalo, ngutiphi timo letingavivinya kutfobeka kwetfu? Singabukhombisa kanjani lobuntfu lobuhle kute sihlale sitfobekile ngisho nalapho sisetimeni letimatima? Kute siphendvule lemibuto, sitawucoca ngetimo letintsatfu letingavivinya kutfobeka kwetfu futsi sitawuphindze sibone kutsi singenta kanjani ngekuhlakanipha esimeni ngasinye.​—Taga 11:2.

NANGABE TIMO TETFU TISHINTJA

5, 6. Bhazilayi wakhombisa njani kutsi utfobekile?

⁵ Kushintja kwetimo kanye nekushintja kwetabelo tetfu kungakuvivinya kutfobeka kwetfu. Ngesikhatsi Davide amema Bhazilayi lobekaneminyaka lengu-80 budzala kutsi ayohlala esigodlweni, Bhazilayi kufanele kube wativa ahlonipheke kakhulu. Kwemukela lesimemo saDavide bekutamenta ajabulele kuba sedvute nenkhosi. Nobe kunjalo, Bhazilayi wasala lesimemo. Kungani? Kungenca yekutsi besekakhulile, ngako watjela Davide kutsi abengafuni kuba ngumtfwalo enkhosini. Ngenca yaloko, Bhazilayi watsi akube nguKhimhamu indvodzana yakhe lotsatsa lesikhundla sakhe.​—2 Sam. 19:31-37.

⁶ Kutfobeka kwenta Bhazilayi wenta sincumo lesihlakaniphile. Akazange asale lesimemo saDavide ngenca yekutsi abecabanga kutsi akafaneleki noma ngenca yekutsi abefuna kuhlala yedvwana. Kunaloko walijabulela lelilungelo futsi wemukela kulinganiselwa kwemandla akhe kanye netimo takhe. Abengafuni kwemukela tabelo letingetulu kwemandla akhe. (Fundza Galathiya 6:4, 5.) Nangabe sinaka kakhulu kuba setikhundleni, kuvelela, kwatiwa, noma kunakwa, loko kungasenta sitibone sincono kunalabanye, siphindze siticatsanise nalabanye futsi loko kungabangela kutsi sidvumateke. (Gal. 5:26) Nobe kunjalo, kutfobeka kungasisita kutsi sinake loko lesingakhona kukwenta kute sikhatimulise Nkulunkulu futsi sente konkhe lokusemandleni etfu kuze sisite labanye.​—1 Khor. 10:31.

7, 8. Kutfobeka kungasisita njani kutsi singetsembeli ekuhlakanipheni kwetfu?

⁷ Kuba nemisebenti lemikhulu kuvame kuta nemalungelo lamakhulu futsi loko kungavivinya bucotfo betfu. Ngesikhatsi Nehemiya eva ngesimo sebantfu eJerusalema, wathantaza kuJehova ngalokusuka enhlitiyweni. (Neh. 1:4, 11) Tibusiso taJehova tabonakala ngalesikhatsi iNkhosi Athazeksesi abeka Nehemiya kutsi abe ngumbusi wesifundza. Nanobe Nehemiya abesesikhundleni lesiphakeme, eme kahle kutemnotfo futsi aneligunya leliphakeme, akazange etsembele ekuhlakanipheni kwakhe. Wachubeka ahamba naNkulunkulu. Abehlala afuna sicondziso saJehova ngekutsi afundze uMtsetfo waNkulunkulu. (Neh. 8:1, 8, 9) Nehemiya akazange atiphakamise ngetulu kwalabanye, kunaloko wabaphatsa kahle.​—Neh. 5:14-19.

⁸ Sibonelo sekutfobeka saNehemiya sisisita kutsi singatetsembi kakhulu nangabe sitfola letinye tabelo noma sitfola emalungelo lamanyenti. Lomdzala ebandleni lowetsembele ekuhlakanipheni kwakhe, angase acale kusingatsa tinkinga telibandla angakafuni sicondziso saJehova kucala ngemthantazo. Labanye bangase bente tincumo kucala bese bacela Jehova kutsi abusise leto tincumo tabo. Loko kungasho kutsi batfobekile yini? Umuntfu lotfobekile uhlale abeka Jehova kucala ekuphileni kwakhe futsi acabangela nemsebenti lanawo elungiselelweni laNkulunkulu. Emakhono etfu akufanele abe ngulabaluleke kakhulu. Nangabe sibhekene nenkinga, kufanele sicaphele singetsembeli ekuhlakanipheni kwetfu. (Fundza Taga 3:5, 6.) Njengetinceku taNkulunkulu, silwela kwenta imisebenti lesinayo emndenini nobe ebandleni kunekutsi silwele kuvelela.​—1 Thim. 3:15.

NANGABE SISOLWA NOBE SIDVUNYISWA

9, 10. Kutfobeka kungasisita njani nangabe sisolwa ngaphandle kwesizatfu?

⁹ Kungahle kube lukhuni kulawula indlela lesitiva ngayo nangabe sisolwa ngaphandle kwesizatfu. Hana abehlala akhala ngenca yekutsi Phenina lobekangumgcaki wakhe, abevamise kukhuluma emagama latamvisa buhlungu. Nanobe Hana abengabatfoli bantfwana, indvodza yakhe beyimtsandza. Kamuva, ngesikhatsi athantaza ethempelini, uMphristi loMkhulu Eli wacabanga kutsi udzakiwe. Cabanga nje! Nome kunjalo, ngekutfobeka Hana watibamba futsi indlela lamphendvula ngayo Eli yakhombisa kutsi uyamhlonipha. Umthantazo wakhe lotsintsa inhlitiyo uyatfolakala eBhayibhelini. Lomthantazo unemavi lakhombisa kukholwa, uphindze ube nemavi ekudvumisa newekubonga.​—1 Sam. 1:5-7, 12-16; 2:1-10.

¹⁰ Kutfobeka kungaphindze kusisite kutsi ‘sichubeke sincoba lokubi ngalokuhle.’ (Rom. 12:21) Kuphila kulelive laSathane kumatima, ngako kufanele sicaphele kutsi asitfukutseliswa bantfu labenta tintfo letimbi. (Hla. 37:1) Nangabe bazalwane nobe bodzadzewetfu ebandleni benta tintfo letingasiphatsi kahle, singeva buhlungu kakhulu. Kodvwa umuntfu lotfobekile ulingisa Jesu. LiBhayibheli litsi: “Naketfukwa akazange aphindzisele ngekwetfuka . . . , kodvwa watibeka kuloyo lowehlulela ngekulunga.” (1 Phet. 2:23) Jesu bekati kutsi kuphindzisela kwaJehova. (Rom. 12:19) Ngako ke, emaKhristu ayalwa kutsi atitfobe futsi ‘angaphindziseli lokubi ngalokubi.’​—1 Phet. 3:8, 9.

11, 12. (a) Kutfobeka kungasisita njani nasidvunyiswa? (b) Kutfobeka kufanele kusisite njani nasikhetsa indlela yekugcoka neyekutilungisa kanye nendlela lesitiphatsa ngayo?

¹¹ Kudvunyiswa kakhulu nako kungavivinya kutfobeka kwetfu. Cabanga ngendlela Esta latiphatsa ngayo ngesikhatsi atsatfwa ayiswa esigodlweni. Bekusiphashaphasha sentfombi, kunguphuma langa sikotse futsi bekaniketwe timonyo letisezingeni lelisetulu lebekatatigcobisa umnyaka wonkhe. Bekahlala naletinye tintfombi lebetivela etindzaweni letinyenti tasePheresiya, nato lebetifuna kukhetfwa yinkhosi kutsi tibe yindlovukazi. Nanobe kunjalo, bekatfobekile. Akazange atigcabhe nome atikhukhumete ngisho nalapho inkhosi seyikhetse yena kutsi abe yinkhosikati yayo.​—Esta 2:9, 12, 15, 17.

¹² Kutfobeka kusisita kutsi sihlale sigcoka kahle, siphindze sitilungise kahle futsi sitiphatse ngendlela lekahle nalenhloniphekile. Siyacaphela kutsi kutsandvwa bantfu, asikutfoli ngekutigabatisa noma ngekufuna kunakwa ngalokute sidzingo kodvwa sikutfola ngekukhombisa umoya “wekuthula nalomuhle.” (Fundza 1 Phetro 3:3, 4; Jer. 9:23, 24) Nangabe sitigcabha kuyobonakala endleleni lesenta ngayo tintfo. Nasi sibonelo: Singase sitjele labanye ngemalungelo lakhetsekile lesinawo, sibatjele nangelwati lolutsite lwetintfo letiyimfihlo noma sibacocele ngelilungelo lesinalo lekwatana nebazalwane labanemalungelo lakhetsekile. Nobe singase sichaze tintfo ngendlela yekutsi kudvunyiswe tsine kube shengatsi ngitsi lesati kakhulu kantsi nalabanye basifakile sandla. Nakuloku Jesu wasibekela sibonelo lesihle. Sibonelo saloku kutsi letinye tintfo lebekatikhuluma bekaticaphuna nome atifundze njengobe tibhaliwe emiBhalweni yesiHebheru. Abekhuluma ngaleyondlela kute tilaleli takhe tati kutsi lakushoko bekungaveli kuye kodvwa bekuvela kuJehova.​—Joh. 8:28.

KUBEKETELELA TIMO LESINGACINISEKI NGATO

13, 14. Kutfobeka kungasisita njani kutsi sente tincumo letihlakaniphile?

¹³ Kutfobeka kwetfu kungaphindze kuvivinywe lapho kufanele sente tincumo letitsite. Ngalesikhatsi umphostoli Pawula ahlala eKhesariya, umphrofethi Agabusi wamtjela kutsi nangabe achubeka nekuya eJerusalema, abetawugcina aboshiwe. Abengase abulawe nekubulawa. Ngekwesaba loko, bazalwane bancenga Pawula kutsi angahambi. Nobe kunjalo, Pawula akazange asishintje sincumo sakhe. Akazange atetsembe kakhulu noma angenwe ngemanti emadvolweni ngenca yekwesaba. Wetsembela kuJehova ngalokuphelele futsi bekakulungele kufeza sabelo sakhe nomaphi lapho Jehova abetamtfuma khona. Nabeva ngaloku, ngekutfobeka labazalwane bayekela kuphikisana nesincumo saPawula sekuya eJerusalema.​—Imis. 21:10-14.

¹⁴ Kutfobeka kungaphindze kusisite kutsi sente tincumo letihlakaniphile ngisho noma singeke sati kahle kutsi umphumela utoba yini. Nasi sibonelo: Nangabe singenela umsebenti wasikhatsi sonkhe, singase sitibute imibuto lenjengekutsi, sitawenta njani nakungenteka sigule? Sitakwenta njani nangabe batali betfu badzinga lusito? Sitawutinakekela njani tidzingo tetfu nasesikhulile? Kute umthantazo noma lucwaningo lesingalwenta lolungasiphendvulela imibuto lenjengalena. (Shu. 8:16, 17) Kwetsembela kwetfu kuJehova kungasisita semukele ngisho nekulinganiselwa kwemandla etfu. Ngemuva kwekube sesicwaningile, saphindze seva nemibono yalabanye, sacela nesicondziso saNkulunkulu ngemthantazo, kufanele bese sitsatsa sinyatselo, sente loko umoya waJehova lotsi asikwente. (Fundza Umshumayeli 11:4-6.) Loko kutakwenta kutsi Jehova asibusise futsi aphindze asisite sitibekele imigomo lemihle.​—Taga 16:3, 9.

INDLELA LESINGAKHOMBISA NGAYO KUTFOBEKA

15. Kulingisa buntfu baJehova kungasisita kanjani kutsi sihlale sitfobekile?

¹⁵ Njengobe kutfobeka kukahle kangaka, singakukhombisa njani ngelizinga lelikhulu? Asesicoce ngetindlela letine. Kwekucala, sitokhombisa kutfobeka kuJehova ngekutsi silingise buntfu bakhe lobuphakeme kanye nekuhlonipha sikhundla sakhe. (Isa. 8:13) Asikhumbule kutsi sihamba naNkulunkulu uMninimandla Onkhe, hhayi nje ingelosi noma lenye indvodza. Kukwati loko kutasisita kutsi sititfobe “ngephansi kwesandla saNkulunkulu lesinemandla.”​—1 Phet. 5:6.

16. Kuzindla ngelutsandvo lwaJehova kungasikhutsata njani kutsi sitfobeke?

¹⁶ Kwesibili, kuzindla ngelutsandvo lwaJehova kutasisita kutsi sikhombise kutfobeka. Umphostoli Pawula watsi Jehova unika titfo temtimba letingakabaluleki “ludvumo lolukhulu.” (1 Khor. 12:23, 24) Ngendlela lefanako, Jehova ukhatsalela ngamunye wetfu kungakhatsaliseki kutsi sinekulinganiselwa lokunganani. Akasicatsanisi nalabanye nome asigodlele lutsandvo lwakhe nangabe senta emaphutsa. Ngenca yekutsi Jehova uyasitsandza, singativa sivikelekile lapho simkhonta.

17. Kutawuba namuphi umphumela nangabe sifuna lokuhle kulabanye?

¹⁷ Kwesitsatfu, nangabe silingisa Jehova ngekutsi sibuke lokuhle kulabanye, sitawujabulela kakhulu umsebenti lesiwentela Nkulunkulu. Kunekutsi sifune kuvelela nobe sifune kutsi tintfo tentiwe ngitsi kuphela, sitawuhlale sitfobekile ngekutsi sifune lusito lwalabanye futsi sitisebentise teluleko tabo. (Taga 13:10) Sitawujabula kanye nabo nabatfola emalungelo latsite. Sitawuphindze sidvumise Jehova njengoba sibona indlela labusisa ngayo “bonkhe bazalwane emhlabeni.”​—1 Phet. 5:9.

18. Singabacecesha kanjani bonembeza betfu kute babe nebuntfu baNkulunkulu?

¹⁸ Kwesine, kutiphatsa kwetfu lokuhle nalokuhloniphekile kutawutfutfuka nangabe sicecesha bonembeza betfu ngetimiso teliBhayibheli. Kutfobeka kutawusenta sikhone kwehlulela kahle nangabe sibuka tintfo ngendlela Nkulunkulu latibuka ngayo. Nasitadisha liBhayibheli njalo, sithantaze njalo siphindze sikusebentise loko lesikufundzako, kancane kancane sitawuba nabonembeza labahlantekile. (1 Thim. 1:5) Singaphindze sifundze nekubeka tidzingo talabanye kucala kunetetfu. Nangabe senta loko lasifundzisa kona Jehova, usitsembisa kutsi ‘utawucedzela kuceceshwa kwetfu,’ aphindze asisite sikhombise kutfobeka kanye nalobunye buntfu baNkulunkulu.​—1 Phet. 5:10.

19. Yini letasisita kutsi sihlale sitfobekile kuze kube phakadze?

¹⁹ Ngesento sinye nje sekungalaleli, lomphrofethi wakaJuda walahlekelwa kuphila kwakhe kanye nebuhlobo bakhe lobuhle naNkulunkulu. Nobe kunjalo, singakhona kuhlala sitfobekile ngisho nobe sivivinywa. Tinceku taNkulunkulu letetsembekile tangesikhatsi lesendlulile kanye netangesikhatsi setfu tiye takhombisa kutsi singakhona kutfobeka. Nasichubeka sihamba naJehova, sitawutfobeka nakakhulu. (Taga 8:13) Kunobe ngabe yini lesiyentako nyalo, kuhamba naNkulunkulu kulilungelo lelikhulu lesingeke silicatsanise nalutfo. Khombisa kubonga ngalelo lungelo futsi uchubeke wenta konkhe lokusemandleni akho kutsi uhambe ngentfobeko naJehova kuze kube phakadze.