Bewati Yini Ngaloku?

Bewutfutfwa njani umlilo endvulo?

INDZABA leseBhayibhelini letfolakala kuGenesisi 22:6 lemayelana na-Abrahama lobekalungiselela kuyokwenta umhlatjelo endzaweni lekhashane, itsi: “Watsatsa tinkhuni temhlatjelo wekushiswa, watetfwesa Isaka, umsa wakhe, yena waphatsa umlilo nemukhwa esandleni sakhe. Bahamba bobabili ndzawonye.”

LiBhayibheli alisho kutsi umlilo bewubaswa njani endvulo. Kodvwa nakucatjangwa ngalendzaba ya-Abrahama, lomunye umhlatiyi weliBhayibheli ukholelwa kutsi “kungenteka kutsi Abrahama bekaphetse umlilo” njengobe bekahamba na-Isaka. Ngako kungenteka kutsi loku lokukhulunywa ngako lapha bekungulelithulusi lebekaphetse ngalo lomlilo.

Nanobe kunjalo, labanye batsi bekungesimelula kucala umlilo endvulo. Bantfu bebakutfola kumelula kucala umlilo ngekutsi batfole sikhuni lesivutsako kubomakhelwane kunekutsi baticalele bona umlilo. Bafundzi labanyenti beliBhayibheli bakholelwa kutsi kungenteka Abrahama bekatfwele livasi nome libhodo lelilengiswako lebelinemalahle lavutsako lebekawatsatse emlilweni lobewubasiwe. (Isa. 30:14) Emalahle lavutsako lebekatfutfwa ngalendlela bekangasetjentiswa nobe nini nakusahanjwa ngekutsi ahlanganiswe netinsaba kuze kucalwe umlilo.