“Umehluleli Wemhlaba Wonkhe” Uhlale Enta Lokulungile

1. Abrahama wakhombisa njani kutsi uyametsemba Jehova kutsi ulungile? (Buka sitfombe lesisekucaleni kwalesihloko.)

“ANGEKE yini umehluleli wemhlaba wonkhe ente kulunga?” (Gen. 18:25) Abrahama wabuta lombuto kute akhombise kutsi uyametsemba Jehova kutsi bekatayehlulela ngekulunga iSodoma neGomora. Bekaciniseka kutsi Jehova angeke ente intfo lengakalungi ngekutsi abhubhise “labalungile kanye nalababi.” Umbono lonjena bewungekho engcondvweni ya-Abrahama. Ngemuva kweminyaka lengu-400, Jehova nakatichaza yena watsi: “Yena uLidvwala, imisebenti yakhe iphelele; yebo, netindlela takhe tonkhe tilungile. Nkulunkulu lowetsembekile longakwenti lokubi, ucotfo akakhetsi muntfu.”​—Dut. 31:19; 32:4.

2. Yini lesenta sitsi Jehova uhlale enta lokulungile?

² Yini leyenta Abrahama wametsemba Jehova kutsi wehlulela ngekulunga ngaso sonkhe sikhatsi? Kungenca yekutsi Jehova usibonelo lesihle sekwenta lokulungile kanye nekuba cotfo. Ngalokuvamile, lamagama lamabili esiHebheru latsi “kulunga” kanye nalelitsi “cotfo” avame kuvela kanye kanye emiBhalweni yesiHebheru. Ngalokuyinhloko, kute umehluko emkhatsini wekulunga nekuba cotfo. Ngenca yekutsi Jehova uhlale atigcina timiso takhe tekulunga, indlela lehlulela ngayo tintfo itawuhlale ilungile. Ngetulu kwaloko, liVi laNkulunkulu litsi, “utsandza kulunga nebumsulwa.”​—Hla. 33:5.

3. Chaza kutsi bantfu baphatfwe njani kabi lamuhla.

³ Labo labanetinhlitiyo leticotfo bayadvudvuteka nabeva kutsi Jehova uhlale enta lokulungile ngisho nobe live lonkhe ligcwele kungalungi. Ngenca yalobubi lobukhona, bantfu labanyenti baye baphatfwa kabi. Nasi sibonelo, labanye bantfu baye babekwa emacala ngetintfo labangakatenti futsi baze bavalelwa nasemajele. Kusetjentiswa kwe-DNA kube ngiyo intfo lesite bantfu lebesebavalelwe ejele sikhatsi lesidze kutsi bakhululwe ngobe bebaboshelwe emacala labangakawenti. Ngisho nobe bantfu labanyenti beve buhlungu lobukhulu futsi batfukutsela ngenca yekutsi bebaboshelwe lite, kodvwa emaKhristu aye aphatfwa kabi ngisho nangalenye indlela lokulukhuni kuyibeketelela.

EBANDLENI

4. Kungavivinywa njani kukholwa kwemKhristu?

⁴ EmaKhristu alindzele kuphatfwa kabi bantfu labangasibo boFakazi. Nanobe kunjalo, kukholwa kwetfu kungavivinyeka nangabe siphatfwa kabi bantfu lesikanye nabo ebandleni. Utakwenta njani nangabe ukholelwa kutsi lomunye ebandleni ukuphatse kabi? Utakuvumela yini lokuphatfwa kabi kutsi kukutfukutselise?

5. Kungani umKhristu kungakafaneli amangale nangabe abona lomunye aphatfwa kabi nobe yena aphatfwa kabi nguloyo lakanye naye ebandleni?

⁵ Ngesizatfu sekutsi sinesono, manyenti ematfuba ekutsi basiphatse kabi labanye nekutsi natsi sibaphatse kabi labanye ebandleni. (1 Joh. 1:8) Nanobe timo letinjalo tingakavami, kodvwa emaKhristu akamangali nobe atfukutsele nakwenteka aphatfwa kabi. Lokujabulisako kutsi Jehova eVini lakhe usinikete tindlela letilula letingasisita kutsi sihlale setsembekile ngisho nobe siphatfwa kabi ngulabo lesikholwa nabo.​—Hla. 55:12-14.

6, 7. Ngukuphi kuphatfwa kabi lomunye umzalwane labhekana nako ebandleni, futsi ngubuphi buntfu lobamsita wakhona kusingatsa lesimo ngendlela lekahle?

⁶ Cabanga ngaloko lokwenteka kuWilli Diehl. Kusukela nga-1931, uMzalwane Diehl bekasolo akhonta ngekwetsembeka eBethel leseBern, eSwitzerland. Nga-1946, waya eklasini lesiphohlongo esikolweni saseGileyadi eNew York, leseMelika. Nasaphotfulile, wabelwa kutsi abe ngumbonisi wesigodzi eSwitzerland. Umzalwane Diehl nakalandzisa utsi: “NgaMay 1949, ngabhalela enhloko hhovisi yaseBern kutsi sengifuna kushada.” Laphendvula latsini lihhovisi laseBern? Latsi: “Sewutawuba lihlahlandlela lelivamile nje kuphela.” Umzalwane Diehl wachubeka watsi: “Besengingasavunyelwa kutsi ngibeke tinkhulumo . . . Labanye besebangasasibingeleli, futsi basiphatsa njengebantfu labayekelisiwe kuba boFakazi.”

⁷ Wenta njani uMzalwane  Diehl ngalesimo? Utsi: “Nobe kunjalo, besati kutsi kushada kuyintfo lemukelekile eBhayibhelini, ngako sathantaza futsi sabeka litsemba letfu kuJehova.” Ngekuhamba kwesikhatsi, lombono loliphutsa ngemshado lowabangela kutsi baphatfwe kabi walungiswa futsi emalungelo eMzalwane  Diehl abuyiselwa. Watfola umvuzo ngekwetsembela kwakhe kuJehova.a Sitawube senta kahle ngekutibuta umbuto lotsi: ‘Nakwenteka ngibhekana nesimo lesicishe sifane nalesi ngitawukhombisa yini kutsi ngetsembele kuNkulunkulu? Ngitawulindza Jehova yini kutsi angiphendvule nobe ngitawulungisa tintfo ngendlela lengicabanga ngayo?’​—Taga 11:2; fundza Mikha 7:7.

8. Yini lengasibangela kutsi sente liphutsa lekucabanga kutsi siphetfwe kabi nobe lomunye uphetfwe kabi?

⁸ Ngalesinye sikhatsi, kungenteka ucabange kutsi lomunye ebandleni ukuphetse kabi nobe lomunye ebandleni uphetfwe kabi. Loku kungahle kwentiwe kutsi sinesono nobe kwentiwe kutsi asinawo onkhe emaciniso ngaleyondzaba. Kungakhatsaliseki kutsi kuliciniso loko lesikucabangako nobe kuliphutsa, kuthantaza kuJehova kanye nekwetsembela kuye kutasisita kutsi ‘singamsoli’ Jehova.​—Fundza Taga 19:3.

9. Sitawucoca ngani kulesihloko nakulesilandzelako?

⁹ Asesicoce ngetibonelo letintsatfu tekuphatfwa kabi letenteka kubantfu baJehova endvulo. Kulesihloko sitawucoca ngemtukulu wa-Abrahama longuJosefa, nangendlela bomnakabo labamphatsa ngayo. Esihlokweni lesilandzelako, sitawubona kutsi yini Jehova layenta eNkhosini yaka-Israyeli lengu-Ahabi kanye naloko lokwenteka kumphostoli Phetro ngesikhatsi ase-Antiyokhi. Njengobe sitawube sicoca ngaletibonelo, yetama kutfola tifundvo letingakusita kutsi uhlale unake kukhonta Nkulunkulu futsi ugcine buhlobo bakho naye bubuhle, ikakhulukati nangabe ucabanga kutsi uphetfwe kabi.

JOSEFA​—UPHATFWA KABI

10, 11. (a) Josefa waphatfwa njani kabi? (b) Nguliphi litfuba lelavela ngalesikhatsi Josefa asejele?

¹⁰ Josefa, lobekasikhonti saJehova lesetsembekile, akaphatfwanga kabi nje kuphela bantfu langabati, kodvwa lokubuhlungu kutsi waphatfwa kabi nabomnakabo. Ngesikhatsi Josefa aselibhungu, bomnakabo bamtfumba base bayamtsengisa njengesigcila. Wamikiswa eGibhithe ngenkhani. (Gen. 37:23-28; 42:21) Ngemuva kwesikhatsi aseGibhithe, wacanjelwa emanga ekutsi bekafuna kudlwengula futsi wavalelwa ejele angakatekiswa licala. (Gen. 39:17-20) Kwaphela iminyaka lengu-13 solo asigcila futsi asiboshwa. Ngutiphi tifundvo lesingatifundza kuloko lokwenteka kuJosefa lokungasisita nangabe siphatfwa kabi ngulesikholwa naye?

¹¹ Josefa watfola litfuba lekucocela lebekaboshwe naye ngaloko lebekaboshelwe kona. Lesiboshwa besingumphatsi wetitja tenkhosi. Ngalesikhatsi boJosefa nemphatsi wetitja basesejele, lomphatsi wetitja wabhudza futsi Josefa walichaza leliphupho. Josefa nakamchazela lomphatsi wetitja leliphupho watsi utawubuyiselwa emsebentini wakhe lebekawenta endlini yaFaro. Ngesikhatsi Josefa asitwa nguNkulunkulu kutsi achaze leliphupho, naye watfola litfuba lekutsi achaze loko lokwenteka kuye. Kunyenti lesingakufundza kuloko Josefa lakusho nakuloko langazange akusho.​—Gen. 40:5-13.

12, 13. (a) Emavi Josefa lawasho kulomphatsi wetitja akhombisa njani kutsi bekangasuye umuntfu longenandzaba nekuphatfwa kabi? (b) Yini Josefa langazange ayisho ngalesikhatsi acoca nalomphatsi wetitja?

¹² Fundza Genesisi 40:14, 15. KulomBhalo, Josefa usebentisa ligama lelitsi “ngebiwa” kuze achaze loko lokwenteka kuye. Kusebaleni kutsi waphatfwa kabi. Josefa wakwenta kwacaca kutsi bekangakalenti lelicala lebekaboshelwe lona. Kungako acela umphatsi wetitja kutsi amkhulumele kuFaro. Wakwentelani loku? Josefa watsi: “Kuze angikhiphe nami ejele.”

¹³ Emavi aJosefa bekafanana newemuntfu longenandzaba yini nesimo sakhe? Cha. Bekati kahle kamhlophe kutsi bekaphetfwe kabi kakhulu. Wamchazela kahle lomphatsi wetitja konkhe lobekwentekile, njengobe bekungenteka amsite kulesimo lebekakuso. Kodvwa, kute eBhayibhelini lapho kuvetwa khona kutsi kukhona lamcocela kutsi abetfunjwe bomnakabo. Akacocelanga ngisho naFaro. Ecinisweni, ngalesikhatsi bomnakabo Josefa befika eGibhithe futsi babuyisana naJosefa, Faro wabemukela kahle waphindze wabatjela kutsi babuye batohlala eGibhithe futsi bajabulele “konkhe lokuhle” kwaseGibhithe.​—Gen. 45:16-20.

14. Yini lengasisita kutsi singakhulumi kabi ngalabanye ngisho nobe siphetfwe kabi ebandleni?

¹⁴ Nangabe umKhristu akholelwa kutsi uphetfwe kabi, kufanele acaphele kutsi angakhulumi kabi kulabanye. Kuliciniso kutsi singaya kuyofuna lusito emadvodzeni lamadzala elibandla futsi siwatjele nangabe lilunga lelibandla lente sono lesibi. (Lev. 5:1) Nanobe kunjalo, nangabe loku kungafaki sono lesibi, kungaba kahle kutsi sicatulule loko kungevani ngaphandle kwekufaka lomunye umuntfu, ngisho nemadvodza lamadzala. (Fundza Matewu 5:23, 24; 18:15) Shengatsi nasilungisa tinkinga singatilungisa ngendlela liBhayibheli lelisho ngayo. Ngalesinye sikhatsi singatfola kutsi kute lapho siphetfwe kabi khona. Sitawujabula kakhulu nangabe singakasenti saba sibi kakhulu simo ngekutsi sikhulume kabi ngemzalwane wetfu! Khumbula kutsi nobe ngabe siphetfwe kabi nobe asikaphatfwa kabi, kukhuluma kabi ngalomunye ngeke kusilungise simo. Kwetsembeka kuJehova kanye nakubazalwane betfu kutasisita kutsi singalenti liphutsa lelifana naleli. Umhlabeleli nakakhuluma ngemuntfu “lonetindlela letimsulwa,” watsi “akahlebi ngelulwimi lwakhe. Akabanyembenyi labanye bantfu, akamhlazisi namakhelwane wakhe.”​—Hla. 15:2, 3; Jak. 3:5.

CABANGA NGEBUHLOBO BAKHO LOBULIGUGU NAJEHOVA

15. Buhlobo Josefa lebekanabo naJehova baba sibusiso njani kuye?

¹⁵ Sitfola sifundvo lesibalulekile ebuhlotjeni Josefa lebekanabo naJehova. Kuleminyaka lengu-13 asejele, Josefa wakhombisa kutsi unembono waJehova ngetintfo. (Gen. 45:5-8) Akazange amsole Jehova ngaloko lobekumehlele. Nanobe angakukhohlwanga lokubi lokwenteka kuye, kodvwa akazange atfukutseliswe ngulokuphatfwa kabi. Lokubaluleke nakakhulu kutsi akazange avumele kuba nesono kwalabanye kanye nekuphatfwa kabi kutsi kulimate buhlobo bakhe naJehova. Kwetsembeka kwaJosefa kwamenta wabona Jehova alungisa tintfo ngekulunga futsi abusisa yena nemndeni wakhe.

16. Kungani kubalulekile kutsi sisondzele kuJehova nangabe siphetfwe kabi nguloyo lesikholwa naye?

¹⁶ Ngendlela lefanako, natsi kufanele sibutsatse njengalobubalulekile buhlobo betfu naJehova futsi sibuvikele. Asingalokotsi sivumele kuba nesono kwebazalwane betfu kusehlukanise naNkulunkulu lesimtsandzako nalesimkhontako. (Rom. 8:38, 39) Kunaloko, nangabe siphetfwe kabi ngulomunye lesikholwa naye, kufanele silingise Josefa, sisondzele kakhulu kuJehova futsi silwele kubuka tintfo ngendlela yakhe. Nasesikwente konkhe loko lokushiwo liBhayibheli kute silungise simo, kufanele sishiyele konkhe kuJehova, sinelitsemba lekutsi ngesikhatsi sakhe lesifanele nangendlela yakhe utasilungisa leso simo.

METSEMBE “UMEHLULELI WEMHLABA WONKHE”

17. Singakhombisa njani kutsi siyametsemba “umehluleli wemhlaba wonkhe”?

¹⁷ Nasisaphila nje kulelive lelibi, kufanele sigadze kutsi sitawuphatfwa kabi. Ngalesinye sikhatsi, ungase ubone shengatsi wena nobe lomunye lomatiko uphetfwe kabi ebandleni. Ungakuvumeli kutsi kulimate buhlobo bakho naNkulunkulu. (Hla. 119:165) Kunaloko, njengetikhonti taJehova setsembela kuye ngemthantazo. Ngesikhatsi lesifanako siyakwemukela kutsi kungenteka site onkhe emaciniso ngendzaba. Siyati nekutsi tinkinga tibangelwa kutsi sinesono. Njengobe sesifundzile ngaJosefa, akukafaneli sikhulume kabi ngalabanye ngobe loko kungenta simo sibe sibi nakakhulu. Ngako, kunekutsi setame kulungisa tintfo ngendlela yetfu, asilwele kwetsembela kuJehova futsi silindzele yena kutsi alungise timo. Siyaciniseka kutsi nasenta njalo, Jehova utasemukela futsi asibusise njengoba enta nakuJosefa. Siyetsemba nekutsi Jehova longuMehluleli “wemhlaba wonkhe,” utawuhlale enta tintfo ngendlela lekahle ngoba tindlela “takhe tonkhe tilungile.”​—Gen. 18:25; Dut. 32:4.

18. Sitawucoca ngani esihlokweni lesilandzelako?

¹⁸ Esihlokweni lesilandzelako sitawucoca ngaletinye tibonelo letimbili tekuphatfwa kabi kwebantfu baJehova basendvulo. Kucoca ngaletibonelo kutasisita sibone kutsi kutfobeka kanye nekutsetselela kuhlobene njani nembono waJehova ngekulunga.