Injabulo Letfolakala Ngekuphila Kuphila Lokumelula
DANIEL naMIRIAM bashada ngaSeptember 2000 futsi bahlala edolobheni laseBarcelona, eSpain. Daniel utsi: “Besiphila imphilo levamile. Umsebenti wetfu bewenta kutsi kube melula kudla lapho sifuna kudlela khona, sivakashe kulamanye emave futsi sigcoke netimphahla letisezingeni lelisetulu. Besiwenta nemsebenti wekushumayela.” Nanobe kunjalo, tintfo tase tiyashintja.
Emhlanganweni wesifundza wa-2006, Daniel watsintfwa yinkhulumo lebeyiphendvula umbuto lotsi: “Ngabe senta konkhe lesingakwenta yini kute sisite labo ‘labayawubulawa’ kutsi bahambe endleleni leya ekuphileni lokuphakadze?” (Taga 24:11) Lenkhulumo yagcizelela kutsi kufanele simemetele umlayeto loseBhayibhelini losindzisa kuphila. (Imis. 20:26, 27) Daniel utsi: “Ngeva shengatsi Jehova bekakhuluma nami.” Lenkhulumo beyiphindze ikhulume ngekutsi kutfutfukisa lizinga lesiwenta ngalo umsebenti wekushumayela kuletsa injabulo. Daniel bekakwati loku kutsi kuliciniso. Miriam besekavele alihlahlandlela futsi besekajabulela tibusiso letinyenti.
Daniel utsi: “Ngabona kutsi besekusikhatsi sekutsi ngente lushintjo lolukhulu.” Wakwenta loko. Wanciphisa sikhatsi semsebenti wekutiphilisa, waba lihlahlandlela futsi wacabanga ngenjabulo yena naMiriam lebebatayitfola ngekuyokhonta lapho kunesidzingo lesikhulu sebamemeteli beMbuso.”
KWACALA TINKINGA KWALANDZELA TINDZABA LETIJABULISAKO
NgaMay 2007, Daniel naMiriam bawuyekela umsebenti wabo wekutiphilisa futsi batfutsela ePanama, lokulive lebebake balivakashela. Insimu yabo lensha beyihlanganisa tichingi letinyenti taseBocas del Toro Archipelago letiselwandle lwaseCaribbean, lakuhlala khona bantfu bemdzabu labangemaNgabe. Daniel naMiriam bebacabanga kutsi kusebentisa imali lebebayigcinile kungabasita kutsi bahlale ePanama tinyanga letisiphohlongo.
Bebahamba kuletichingi basebentisa umkhumbi kanye nemabhayisikili, futsi balukhumbula kahle luhambo lwabo lwekucala ngemabhayisikili lobelungemakhilomitha langu-32, bahamba emagcumeni lenyukelako, elangeni lebelishisa likhipha umkhovu etjeni. Daniel waphose waculeka ngenca yekudzinwa. Nobe kunjalo, imindeni yemaNgabe lebebayivakashela, beyibemukela kahle, ikakhulukati lapho sebakwati kusho emagama lambalwa ngelulwimi lwendzawo. Kungakapheli sikhatsi lesidze, besebachuba tifundvo teliBhayibheli letingu-23.
Ngalesikhatsi seyiphelile lemali lebebatigcinele yona, injabulo yabo yagucuka yaba lusizi. Daniel utsi: “Sigcwele tinyembeti emehlweni, sacabanga kubuyela emuva eSpain. Besiva buhlungu kutsi besesitawushiya bantfu lebesifundza nabo liBhayibheli.” Nobe kunjalo, ngemuva kwenyanga, batfola tindzaba letijabulisako. Miriam utsi: “Satfola simemo sekuba ngemahlahlandlela lakhetsekile. Sajabula kakhulu ngobe sakhona kuchubeka sisesabelweni setfu!”
INJABULO LENKHULU LABAYITFOLA
Ngenca yekutsi inhlangano yenta lushintjo, nga-2015 Daniel naMiriam bacelwa kutsi sale baba ngemahlahlandlela lavamile. Benta njani? Betsembela esetsembisweni lesikuTihlabelelo 37:5 lesitsi: “Nikela indlela yakho kuSimakadze, umetsembe, yena-ke uyawukutsatsela tinyatselo.” Bawutfola umsebenti wekutiphilisa kute batisekele njengobe bangemahlahlandlela futsi lamuhla bakhonta ebandleni laseVeraguas lelisePanama.
Daniel utsi: “Ngalesikhatsi sisengakahambi eSpain, besingaciniseki kutsi singakhona yini kuphila imphilo lemelula. Kodvwa lamuhla siyakhona kukwenta loku, futsi kute lesikweswele.” Yini lebajabulisa kakhulu? Batsi: “Kusita bantfu labatfobekile kutsi bati Jehova kujabulisa kwengca nobe ngabe yini!”