Bewati Yini?

Umlandvo uyifakazela njani indzima yaBhelshasari waseBhabhulona?

SEKUPHELE iminyaka leminyenti baphikisi beliBhayibheli batsi ayizange seyibe khona iNkhosi Bhelshasari lokukhulunywa ngayo encwadzini yaDanyela. (Dan. 5:1) Bebakukholelwa loku, ngobe labacwaninga ngemlandvo kute bufakazi lababutfola bekutsi kwake kwaba neNkhosi Bhelshasari. Nobe kunjalo, loko kwashintja nga-1854. Kungani?

Ngalowo mnyaka, lobekangummeleli welive laseBritain J. G. Taylor, wavakashela indzawo lebeyilidolobha lase-Uri futsi nyalo lendzawo seyibitwa ngekutsi yiningizimu Iraq. Kulendzawo, bekunesicongo lesiphakeme kakhulu futsi J. G. Taylor watfola tincetu telubumba letimbalwa. Lucetu ngalunye belungaba ngu-10 cm budze futsi belubhalwe ngendlela yakadzeni. Lolunye lucetu belunemagama emthantazo weNkhosi yaseBhabhulona Nabonidasi kanye nendvodzana yakhe lendzala Bhelshasari. Ngisho nebaphikisi imbala bekufanele bavumelane naloku: kutfolakala kwaletincetu bekufakazela kutsi wake waba khona Bhelshasari.

Nobe kunjalo, liBhayibheli liyaveta kutsi Bhelshasari bekakhona futsi bekayinkhosi. Baphikisi bachubeka bangabata. Nasi sibonelo, cishe ngemnyaka wa-1875, sosayensi lobekutsiwa nguWilliam Talbot wabhala lobekushiwo ngulabanye lebebatsi “Bhelshasari wabusa ngesikhatsi sinye nababe wakhe Nabonidasi. Kodvwa konkhe loku kute bufakazi.”

Lenkinga yacatululeka ngesikhatsi kulolunye lwaletincetu kutfolakala kutsi babe waBhelshasari, lokuyiNkhosi Nabonidasi, kwaphela iminyaka leminyenti angekho eBhabhulona. Yini leyenteka ngesikhatsi angekho? I-Encyclopaedia Britannica itsi “Ngesikhatsi Nabonidasi atfunjwa, waniketa Bhelshasari bukhosi kanye nencenye lenkhulu yemasotja akhe.” Ngako Bhelshasari wabusa eBhabhulona ngaleso sikhatsi. Ngako, bosomlandvo kanye Alan Millard losati setilwimi baveta kutsi bekukahle “ngencwadzi yaDanyela kutsi ibite Bhelshasari ‘ngenkhosi.’”

Liciniso likutsi tikhonti taNkulunkulu, tinebufakazi lobuyinhloko bekutsi incwadzi yaDanyela yetsembekile futsi iphefumelelwe nguNkulunkulu.—2 Thim. 3:16.