Emakhosi Labangako Esikhatsini Sekugcina
Letinye tiphrofetho letikulelishadi tikhuluma ngetintfo letenteka ngesikhatsi sinye. Tonkhe tifakazela kutsi siphila ‘esikhatsini sekugcina.’—Dan. 12:4.
ImiBhalo Semb. 11:7; 12:13, 17; 13:1-8, 12
Siphrofetho “Silo sasendle” sesibuse bantfu emhlabeni iminyaka lengetulu kwa-3 000. Ngesikhatsi sekuphela, inhloko yaso yesikhombisa yalimala. Ngekuhamba kwesikhatsi, lenhloko yelulama futsi “wonkhe umhlaba” walandzela lesilo. Sathane usebentisa lesilo kuze ‘alwe nalabo labasele.’
Kugcwaliseka Kwalesiphrofetho Ngemuva kwazamcolo, imibuso letitsa taJehova yacala kubusa bantfu. Ngemuva kweminyaka leminyenti, ngesikhatsi seMphi yeLive yekucala, umbuso wase-Britain waphelelwa ngemandla. Waphindze waba nemandla ngesikhatsi ucala kubambisana ne-United States. Kulesikhatsi sekuphela, Sathane uchubekile asebentisa yonkhe imibuso lelamhlabeni kuze ahluphe bantfu baNkulunkulu.
ImiBhalo Dan. 11:25-45
Siphrofetho Kulesikhatsi sekuphela inkhosi yasenyakatfo nenkhosi yaseningizimu talwa ngesikhatsi tibanga kubusa.
Kugcwaliseka Kwalesiphrofetho I-Germany yalwa neBritain ne-United States. Nga-1945, i-Soviet Union kanye nalabayisekelako yaba yinkhosi yasenyakatfo. Nga-1991, i-Soviet Union yaphelelwa ngemandla, futsi ngemuva kwesikhatsi letsite, i-Russia kanye nalabayisekelako yaba yinkhosi yasenyakatfo.
ImiBhalo Isa. 61:1; Mal. 3:1; Luk. 4:18
Siphrofetho Jehova utfuma “sitfunywa” sakhe kutsi ‘siyolungisa indlela’ ngaphambi kwekutsi uMbuso waMesiya ucale kubusa. Lesitfunywa sacala ngekutsi ‘sishumayele tindzaba letimnandzi kulabamphofu.’
Kugcwaliseka Kwalesiphrofetho Kusukela nga-1870, uMzalwane Russell kanye nebangani bakhe batimisela kufundza liBhayibheli kuze batfole loko lelikufundzisako. Ngabo-1880, babona kutsi kubalulekile ngetikhonti taNkulunkulu kutsi tishumayele. Bashicilela tihloko letitsi “Wanted 1,000 Preachers” nalesitsi “Anointed to Preach.”
ImiBhalo Mat. 13:24-30, 36-43
Siphrofetho Sitsa sahlanyela lukhula lolunyenti ensimini yakolo futsi lolukhula lwakhula lwambonya lokolo kwaze kwaba sikhatsi sekuvuna lapho lwehlukaniswa khona nakolo.
Kugcwaliseka Kwalesiphrofetho Kusukela ngabo-1800, wabese uyabonakala umehluko emkhatsini wemaKhristu eliciniso nemaKhristu mbumbulu. Kulesikhatsi sekuphela, emaKhristu eliciniso ayangena ebandleni futsi ayehlukaniswa nemaKhristu mbumbulu.
ImiBhalo Dan. 2:31-33, 41-43
Siphrofetho Tinyawo letakhiwe ngensimbi nelubumba, tesitfombe lesakhiwe ngetinsimbi letehlukahlukene.
Kugcwaliseka Kwalesiphrofetho Lubumba lumelela bantfu labavukelako lababuswa nguMbuso wemaNgisi nemaMelika. Lemibuso ayikhoni kusebentisa onkhe emandla ayo ngenca yalabantfu.
ImiBhalo Mat. 13:30; 24:14, 45; 28:19, 20
Siphrofetho “Kolo” ubutselwa “enyangweni” futsi ‘sisebenti lesetsembekile nalesihlakaniphile’ sibekwa kutsi sibe ngetulu kwaletinye “tisebenti.” ‘Tindzaba letimnandzi teMbuso’ tacala kushunyayelwa “emhlabeni wonkhe.”
Kugcwaliseka Kwalesiphrofetho Nga-1919, sisebenti lesetsembekile sabekwa kutsi sinakekele bantfu baNkulunkulu. Kusukela lapho, baFundzi beliBhayibheli bawenta ngekutimisela umsebenti wekushumayela. Lamuhla, BoFakazi baJehova bashumayela emaveni langetulu kwa-200 futsi bashicilela tincwadzi letisekelwe eBhayibhelini ngetilwimi letingetulu kwa-1 000.
ImiBhalo Dan. 12:11; Semb. 13:11, 14, 15
Siphrofetho Silo sasendle lesinetimphondvo letimbili sihamba embili ekutjeleni bantfu ‘ngemfanekiso wesilo sasendle’ futsi ‘siphefumulela lomfanekiso.’
Kugcwaliseka Kwalesiphrofetho I-Britain ne-United States ngiyo leyacala inhlangano yeTive Letihlangene. Lenhlangano beyisekelwa nanguletinye tive. Kusukela nga-1926 kuya ku-1933, inkhosi yasenyakatfo beyililunga lenhlangano yeTive Letihlangene. Bantfu bebanelitsemba lekutsi lenhlangano beyitawuletsa kuthula emhlabeni lokuyintfo lengakhona kwentiwa nguMbuso waNkulunkulu kuphela. Bantfu baphindze bakholwa nekutsi Mhlabuhlangene bekatawukwenta loko.
ImiBhalo Dan. 8:23, 24
Siphrofetho Inkhosi lenebuso lobutfukutsele beyitawenta “umonakalo lowesabekako.”
Kugcwaliseka Kwalesiphrofetho I-Britain ne-United States yabulala bantfu labanyenti futsi yenta nemonakalo lomkhulu. Nasi sibonelo, ngesikhatsi seMphi yeLive yesibili, i-United States yawisa emabhomu lamabili lamakhulu esiveni lebesisitsa sayo ne-Britain. Lamabhomu enta umonakalo lomkhulu kunalowake wenteka.
ImiBhalo Dan. 11:31; Semb. 17:3, 7-11
Siphrofetho ‘Silo sasendle lesibovu’ lesinetimphondvo letilishumu siphuma ‘emgodzini longenamkhawulo’ futsi siba yinkhosi yesiphohlongo. Incwadzi yaDanyela itsi lenkhosi ‘isinengiso lesingusona sibanga incitsakalo.’
Kugcwaliseka Kwalesiphrofetho Inhlangano yeTive Letihlangene yaphela ngeMphi yeLive yesibili. Ngemuva kwalemphi, kwase ‘kumiswa’ Mhlabuhlangene. Kwatsiwa Mhlabuhlangene utawuletsa kuthula emhlabeni lokuyintfo leyehlula inhlangano yeTive Letihlangene futsi lengakhona kwentiwa nguMbuso waNkulunkulu. Mhlabuhlangene utawuhlasela inkholo.
ImiBhalo 1 Thes. 5:3; Semb. 17:16
Siphrofetho Tive titawumemetela “kuthula nekulondzeka,” futsi “letimphondvo letilishumi” ‘nalesilo sasendle’ titawuhlasela “lengwadla” futsi tiyincobe. Ngemuva kwaloko, letive titawubhujiswa.
Kugcwaliseka Kwalesiphrofetho Tive titawutsi sekukhona kuthula nekulondzeka emhlabeni. Tive letisekela Mhlabuhlangene titawubhubhisa tonkhe tinhlangano tenkholo yemanga. Loku kutawube kukucala kwekuhlupheka lokukhulu. Lokuhlupheka lokukhulu kutawuphela ngesikhatsi Jesu abhubhisa lonkhe lelive laSathane nge-Armagedoni.
ImiBhalo Hez. 38:11, 14-17; Mat. 24:31
Siphrofetho Gogi utawuhlasela bantfu baNkulunkulu. Tingilosi titawubutsela ndzawonye “labakhetsiwe.”
Kugcwaliseka Kwalesiphrofetho Inkhosi yasenyakatfo, kanye nayo yonkhe imibuso yemhlaba, itawuhlasela bantfu baNkulunkulu. Ngemuva kwekucala kwalokuhlaselwa, labagcotjiwe labatawube basele batawuyiswa ezulwini.
ImiBhalo Hez. 38:18-23; Dan. 2:34, 35, 44, 45; Semb. 6:2; 16:14, 16; 17:14; 19:20
Siphrofetho Loyo “Lobekaligibele” “lihhashi lelimhlophe” utawucedzela ‘kuncoba kwakhe’ ngekutsi abhubhise Gogi kanye nelibutfo lakhe. “Lesilo sasendle” ‘sitawujikwa echibini lemlilo’ futsi litje lelikhulu litawuphihlita lesitfombe lesikhulu.
Kugcwaliseka Kwalesiphrofetho Jesu loyiNkhosi lebusako yeMbuso waNkulunkulu, utawusindzisa bantfu baNkulunkulu. Jesu akanye nalabangu-144 000 netingilosi, batawubhubhisa tive letitawube tihlasela bantfu baNkulunkulu. Liyawuphela kanjalo-ke lelive laSathane.