Sihlahla Lesijutjiwe Singaphindze Sihlume Yini?

NASICATSANISWA nesihlahla lesihle semsedari saseLebanoni, sihlahla semncuma lesinesicu lesicangene singase singabonakali sisihle kangako. Kodvwa iyamangalisa indlela tihlahla temncuma letikhona ngayo kuchubeka tiphila ngisho nangaphansi kwetimo letimatima. Letinye setiphile iminyaka lecishe ibe ngu-1 000. Timphandze tesihlahla semncuma tingena ekujuleni kwemhlabatsi, futsi lesihlahla singaphindze sihlume ngisho nobe sicu saso sijutjiwe. Nangabe nje timphandze taso tisaphila, singaphindze sikhule.

Jobe indvodza leyetsembekile abeciniseka kutsi ngisho angafa, utawuphindze aphile. (Jobe 14:13-15) Wabekisa ngesihlahla, lokungenteka bekusihlahla semncuma, kute akhombise kutsi uyaciniseka kutsi Nkulunkulu angakhona kumvusa. Jobe watsi: “Nangabe sihlahla sesijutjiwe, likhona litsemba lekutsi singahle siphindze sihlume futsi.” Nalina ngemuva kwesomiso, sicu semncuma lesomile singaphindze sihlume futsi “kumile emahlumela njengesihlahla” lesisha.​—Jobe 14:7-9.

Njengobe nje nemlimi alangatelela kubona sihlahla semncuma lebesijutjiwe sihluma, Jehova Nkulunkulu uyakulangatelela kuvusa tinceku takhe kanye nalabanye labanyenti. (Matewu 22:31, 32; Johane 5:28, 29; Imisebenti 24:15) Cabanga nje kutsi sitawujabula kangakanani nasemukela labavusiwe futsi sibabone sebaphindze baphila!