Ezekiele

16 Jehova a bua le ’na hape a re: 2 “Mor’a motho, bolella Jerusalema liketso tsa eona tse nyonyehang.+ 3 Bolella Jerusalema hore Jehova ’Musi oa Lintho Tsohle o re: ‘U tsoa Kanana ebile u hlahetse teng. Ntate oa hao e ne e le Moamore+ ’mè oa hao e le Mohethe.+ 4 Letsatsing leo u hlahileng ka lona, lelana la hao la mokhubu ha lea ka la khaoloa. Ha oa ka oa hlatsuoa ka metsi e le hore u hloeke kapa oa tlotsoa ka letsoai ebile ha oa ka oa phutheloa ka masela. 5 Ha oa ka oa etsetsoa lintho tsena hobane ho ne ho se na motho ea u utloelang bohloko. Ha ho na motho ea neng a u qenehela. Ho e-na le hoo, letsatsing leo u hlahileng ka lona, u ile oa lahleloa har’a naha hobane u ne u hloiloe.

6 Ha ke feta, ke ile ka u bona u raha-raha ka har’a mali a hao eaba ke re ho uena: ‘Tsoela pele u phela.’ Ke ile ka pheta mantsoe ao ha u ntse u le ka har’a mali a hao ka re: ‘Tsoela pele u phela.’ 7 Ke ile ka u etsa sechaba se seholo joaloka lijalo tse melang masimong, u ile oa hola hantle oa ba moholo oa ba oa roala mekhabiso. Matsoele a hao a ile a tiea le moriri oa hao oa hola empa u ne u ntse u hlobotse.

8 Jehova ’Musi oa Lintho Tsohle o re: “Ha ke feta ke ile ka u bona, ka hlokomela hore u lilemong tsa ho bontšoa lerato. Ka u koahela ka seaparo* sa ka+ hobane u ne u sa apara eaba ke etsa selekane le uena ’me oa ba oa ka. 9 Ka boela ka u hlatsoa ka metsi ka tlosa mali a hao eaba ke u tlotsa ka oli.+ 10 Ka u apesa liaparo tsa theko e phahameng, ka u apesa seaparo se nang le mekhabiso ka ba ka u roesa lieta tsa letlalo.* Ka u roesa lesela le letle la line hloohong. 11 Ke ile ka u khabisa, ka u roesa lifaha matsohong le molaleng. 12 Ke ile ka boela ka u roesa masale nkong le litsebeng. Ka u roesa korone e ntle hloohong. 13 U ne u ikhabisa ka khauta le silevera, liaparo tsa hao li entsoe ka line e ntle, li e-na le mokhabiso o motle ebile e le tsa theko e phahameng. U ne u ja phofo e sitsoeng hantle, mahe a linotši le oli. U ile oa hola ’me oa ba motle,+ oa tšoaneloa ke ho ba mofumahali.”

14 Jehova ’Musi oa Lintho Tsohle o re: “Botumo ba hao bo ile ba qala ho fihla le har’a lichaba+ ka lebaka la botle ba hao. Botle ba hao bo ne bo tsoteha hobane ke ne ke behile khanya ea ka holim’a hao.”+

15 U ile oa qala ho itšepa haholo hobane u le motle+ eaba u ba letekatse ka lebaka la botumo ba hao.+ U ne u robala le batho bohle ba fetang ka tsela+ ’me oa inehella bona ka lebaka la botle ba hao. 16 U ile oa nka liaparo tse ling tsa hao, oa khabisa libaka tse phahameng tseo u neng u etsetsa botekatse ho tsona.+ Lintho tse joalo ha lia lokela ho etsahala ebile u se ke oa hlola u li etsa. 17 U ile oa boela oa nka mabenyane* a matle a entsoeng ka khauta le silevera tseo ke u fileng tsona, oa iketsetsa litšoantšo tsa banna eaba u etsa botekatse le tsona.+ 18 Oa nka liaparo tsa hao tse khabisitsoeng, oa li* koahela ka tsona eaba u li fa oli le libano tsa ka.+ 19 Oa li fa bohobe boo ke ileng ka u fa bona hore u bo je, bo entsoeng ka phofo e sitsoeng hantle, oli le mahe a linotši. U ile oa li fa tsona e le nyehelo e monko o monate.*+ Ke eona ntho eo u ileng oa e etsa,’ ke Jehova ’Musi oa Lintho Tsohle ea chong.

20 ‘U ile oa nka bara le barali bao u ntsoaletseng bona,+ oa etsetsa litšoantšo tseo mahlabelo ka bona.+ Na liketso tsee tsa hao tsa botekatse ha lia lekana? 21 U ile oa bolaea bana ba ka oa ba oa fana ka bona e le mahlabelo ka ho ba chesa.+ 22 Ha u ntse u etsa botekatse le lintho tsohle tse nyonyehang, u ile oa lebala hore ha u ne u le ngoana, u ne u hlobotse ’me u sa apara ebile u raha-raha ka har’a mali a hao. 23 U malimabe. U malimabe hobane u entse lintho tsena tsohle tse mpe,’+ ke Jehova ’Musi oa Lintho Tsohle ea chong. 24 ‘U ile oa ikahela sebaka sa ho rapela melimo ea bohata mabaleng ’ohle a motse e le hore u rapele litšoantšo tsa hao tsa bohata. 25 Oa ikahela libaka tse phahameng sebakeng se bonoang ke motho e mong le e mong, seterateng se seng le se seng. U fetotse botle ba hao ntho e nyonyehang hobane u ne u ipapatsa ho motho e mong le e mong ea fetang ka tsela.+ U ile oa eketsa liketso tsa hao tsa botekatse.+ 26 Oa etsa botekatse le baahisani ba hao ba nang le takatso e feteletseng ea ho etsa thobalano e leng Baegepeta.+ U ile oa ’na oa nkutloisa bohloko ka liketso tse sa feleng tsa botekatse. 27 Ka lebaka leo, ke tla u fa kotlo ke be ke etse hore u se ke oa ba le lijo.+ Ke tla fana ka uena ho basali ba u hloileng+ e leng Bafilista ba neng ba soabisoa ke boitšoaro ba hao bo bobe, e le hore ba etse ntho eo ba e batlang ka uena.+

28 Kaha u ne u sa khotsofale, u ile oa etsa botekatse le Baasiria+ empa le ka mor’a hore u etse botekatse le bona, u ne u ntse u sa khotsofala. 29 U ile oa fetela pele le naheng ea bo-rakhoebo* le ho Bakalde+ oa etsa botekatse le bona. Leha ho le joalo, ha oa ka oa khotsofala. 30 U ne u feteletse* ha u etsa lintho tsena tsohle, u itšoere joaloka letekatse le tellang,’ ke Jehova ’Musi oa Lintho Tsohle ea chong.+ 31 ‘Empa ha u ikahela libaka tse phahameng sebakeng se bonoang ke batho bohle seterateng se seng le se seng le mabaleng ’ohle a motse, u ne u se joaloka letekatse hobane u ne u hana ho pataloa. 32 U mosali ea febang, ea robalang le banna ba bang eseng le monna oa hae.+ 33 Batho ke bona ba fang matekatse limpho+ empa uena u file batho ba neng ba robala le uena limpho+ ebile u ba fa tjotjo hore ba tle ho uena ba tsoa libakeng tsohle e le hore ba tl’o etsa botekatse le uena.+ 34 Ha u tšoane le basali ba bang ba matekatse. Ha ho na motho ea etsang botekatse joaloka uena. Uena u patala batho ba tlang ho uena, ha se bona ba u patalang. U etsa lintho ka tsela e fapaneng.

35 Uena letekatse,+ mamela mantsoe a Jehova. 36 Jehova ’Musi oa Lintho Tsohle o re: “Kaha u bontšitse hore u na le takatso e feteletseng ea ho etsa thobalano ebile batho ba u bone u sa apara nakong eo u neng u etsa botekatse le batho bao u neng u ba rata, hammoho le melimo ea litšoantšo e nyonyehang*+ eo u ileng oa e etsetsa mahlabelo ka mali a bara ba hao,+ 37 ke bokella batho bohle bao u neng u ba rata, bao u kileng oa etsa botekatse le bona le batho bohle bao u ba hloileng. Ke tla ba bokella ho tsoa libakeng tsohle hore ba u loantše ke be ke etse hore ba u bone u sa apara letho.+

38 Ke tla u fa kotlo e tšoanelang basali ba febang+ le basali ba bolaeang.+ U tla bolaoa ka sehloho hobane ha oa ntšepahalla.+ 39 Ke tla nehelana ka uena ho bona ’me ba tla liha libaka tsa hao tse phahameng.+ Ba tla u hlobolisa liaparo tsa hao,+ ba nke mabenyane* a hao a matle+ ba be ba u siee u hlobotse. 40 Ba tla tlisa batho ba bangata hore ba u loantše,+ ba tla u tlepetsa ka majoe+ ba be ba u bolaee ka lisabole tsa bona.+ 41 Ba tla chesa matlo a hao+ ’me ba u ahlole ka pel’a basali ba bangata. Ke tla felisa botekatse ba hao+ ebile u tla khaotsa ho patala batho. 42 Ke tla ntšetsa khalefo ea ka ho uena+ ho fihlela ke khotsofala. Ka mor’a moo, bohale ba ka bo tla fokotseha.+ Ha ke sa tla hlola ke u halefela.”

43 Jehova ’Musi oa Lintho Tsohle o re: “U lebetse hore ke ile ka u hlokomela u sa le ngoana+ ’me u nkhalefisitse ka ho etsa lintho tsena tsohle tse mpe. Kahoo, ke tla etsa hore u fumane litla-morao tsa liketso tsa hao ’me ha u sa tla hlola u etsa liketso tsa hao tse mpe le tse nyonyehang.

44 Batho ba sebelisang maele ba tla sebelisa maele a latelang ho uena: ‘Ngoan’a lekhala o tsamaea ka lekeke joaloka ’m’ae.’+ 45 U futsitse ’mè oa hao, ea neng a hloile monna oa hae le bana ba hae. U tšoana hantle le bana beno, ba neng ba hloile banna ba bona le bana ba bona. ’Mè oa hao e ne e le Mohethe, ntate oa hao eena e le Moamore.+

46 Ausi oa hao ke Samaria+ ’me o lula lehlakoreng le ka leboea ho uena le barali ba hae.+ Ngoan’eno e monyenyane ea lulang ka boroa ho uena le barali ba hae,+ ke Sodoma.+ 47 Ha oa etsa feela lintho tse mpe tseo ba neng ba li etsa le ho latela liketso tsa bona tse nyonyehang empa ka mor’a nako e seng kae feela, u ne u se u etsa lintho tse fetang tseo ba neng ba li etsa.”+ 48 Jehova ’Musi oa Lintho Tsohle o re, “Kea hlapanya hore ngoan’eno Sodoma le barali ba hae, ha baa etsa lintho tse mpe tse tšoanang le tseo uena le barali ba hao le li entseng. 49 Sebe seo ngoan’eno Sodoma a se entseng ke sena: Eena le barali ba hae+ ba ne ba ikhohomosa,+ ba e-na le lijo tse ngata+ ebile ba phela hamonate ba sa tšoenyehe ka letho.+ Leha ho le joalo, ba ne ba sa thuse batho ba hlokang thuso le ba futsanehileng.+ 50 Ha baa ka ba tlohela ho ikhohomosa+ le ho etsa lintho tse nyonyehang ka pel’a ka.+ Kahoo, ke ile ka bona ho hlokahala hore ke ba felise.+

51 Samaria le eena+ ha a etsa le halofo ea libe tseo u li entseng. U ile oa ’na oa etsa lintho tse nyonyehang ho ba feta, hoo bana beno ba ileng ba bonahala ba lokile ka lebaka la liketso tsohle tse nyonyehang tseo u li entseng.+ 52 U tla tlotlolleha hobane u ile oa lumellana le boitšoaro ba bana beno. Ba lokile ho u feta hobane u entse lintho tse nyonyehang ho ba feta. Ka lebaka leo, itšoabele hobane u entse hore ho bonahale eka bana beno ba lokile.

53 Ke tla bokella batlamuoa ba hao le batlamuoa ba bona e leng batlamuoa ba Sodoma le barali ba hae le batlamuoa ba Samaria le barali ba hae.+ 54 Ke tla etsa joalo e le hore u tle u tlotlollohe u be u soabele hore u ile oa ba tšelisa. 55 Bana beno e leng Sodoma le barali ba hae le Samaria le barali ba hae, ba tla khutlela boemong boo ba neng ba le ho bona pele. Le uena le barali ba hao le tla khutlela boemong ba lona ba pele.+ 56 Ha u ntse u ikhohomosa, u ne u khella ngoan’eno Sodoma fatše hoo u neng u sa bue le ka eena. 57 Ka nako eo, bokhopo ba hao bo ne bo e-s’o hlahelle.+ Hona joale Basiria le baahisani ba bona, Bafilista+ hammoho le ba le potolohileng baa le soma. 58 Le tla fumana litla-morao tsa liketso tsa lona tse nyonyehang,” ke Jehova ea chong.

59 Jehova ’Musi oa Lintho Tsohle o re: “Ke tla u fa kotlo ka lebaka la lintho tseo u li entseng+ hobane ha oa tšepahalla selekane sa ka.+ 60 Empa ’na nke ke ka lebala selekane seo ke ileng ka se etsa le uena ha u sa le ngoana. Ke tla boela ke etse selekane se sa feleng le uena.+ 61 U tla hopola boitšoaro ba hao ’me u soabe+ ha u amohela bana beno ba baholo le ba banyenyane ho uena. Ke tla u fa bona hore e be barali ba hao empa eseng ka lebaka la selekane seo ke se entseng le uena.

62 Ke tla etsa selekane le uena ’me u tla tseba hore ke ’na Jehova. 63 Ha ke u etsetsa sehlabelo sa ho tšoareloa libe ho sa tsotellehe lintho tsohle tseo u li entseng,+ u tla hopola lintho tseo u li entseng ’me u tla soabela le ho bula molomo,”+ ke Jehova ’Musi oa Lintho Tsohle ea chong.’”