Lillo Tsa Jeremia
5 Jehova, hopola ntho e re hlahetseng.
Sheba ’me u bone kamoo re seng re se na seriti kateng.+
2 Lefa la rona le fuoe basele, matlo a rona a fuoe balichaba.+
3 Re se re le likhutsana.* Bo-’mè ba rona ba joaloka bahlolohali.+
4 Re lokela ho reka metsi ao re a noang.+ Le patsi ea rona rea e reka.
5 Lira tsa rona li re behile merebele.
Re khathetse empa ha re fuoe monyetla oa ho phomola.+
6 Re itšetlehile ka Egepeta+ le Asiria+ e le hore re fumane lijo tse lekaneng.
7 Baholo-holo ba rona ba entseng sebe ha ba sa le eo. Empa rona re tlameha ho jara liphoso tsa bona.
8 Re se re busoa ke bahlanka. Ha ho motho ea re pholosang matsohong a bona.
9 Re fumana lijo ka ho beha bophelo ba rona kotsing+ hobane ho na le batho ba hlometseng ka lisabole lefeelleng.
10 Matlalo a rona a chesa joaloka khanare ea mollo hobane re bolaoa ke tlala.+
11 Ba tlotlolotse* basali ba Sione le baroetsana ba metse ea Juda.+
12 Likhosana li fanyehiloe ka matsoho a tsona.+ Le banna-baholo ha baa hlomphuoa.+
13 Bahlankana ba jere maloala ’me bashanyana ba thekesela ba nkile patsi e boima.
14 Banna ba baholo ba tlohile keiting ea motse.+ Bahlankana ha ba sa bapala ’mino oa bona.+
15 Lipelo tsa rona li bohloko. Tantši ea rona e fetohile masoabi.+
16 Likorone li oele lihloohong tsa rona. Ho malimabe rona hobane re entse sebe.
17 Kahoo, lipelo tsa rona li bohloko.+
Hape ka lebaka la lintho tsena, mahlo a rona a lerootho.+
18 Kaha Thaba ea Sione e senyehile,+ liphokojoe li se li lalasa ho eona.
19 Ha e le uena, Jehova, u tla lula u le teng kamehla le mehla.
U busa ka ho sa feleng.+
20 Ke hobane’ng ha ho se mohla u re hopolang? Hape ke hobane’ng ha u re lahlile nako e telele hakaale?+
21 Re boelanye le uena Jehova ’me re tla khutla hang-hang.+
Etsa hore lintho tsohle li tšoane le mehleng ea pele.+
22 Empa u re lahlile.
U lula u re halefetse.+