Liproverbia

26 Joalokaha ho sa lebelloa hore lehloa le khethehe hlabula, le hore pula e ne nakong ea kotulo,

Motho ea se nang kelello+ ha a tšoaneloe ke tlhompho.

 2 Feela joalokaha nonyana e e-na le lebaka la ho baleha le lefokotsane le e-na le lebaka la ho fofa,

Motho ha a bitsetsoe bomalimabe ntle ho lebaka.*

 3 Sephali se shapa pere, tonki e huloa ka tomo,+

Thupa eona e shapa mekokotlo ea batho ba se nang kelello.+

 4 U se ke oa araba motho ea se nang kelello ho ea ka bothoto ba hae

E le hore u se ke oa tšoana le eena.

 5 Empa ha u araba motho ea se nang kelello, totobatsa bothoto ba hae

E le hore a se ke a nahana hore o bohlale.+

 6 Ea sieang litaba matsohong a motho ea se nang kelello

O tšoana le motho ea pomang maoto a hae ’me a itematsa.

 7 Maele melomong ea batho ba se nang kelello+

A tšoana le maoto a holofetseng.

 8 Ho rorisa motho ea se nang kelello+

Ho tšoana le ho faseletsa lejoe letjeketjaneng.

 9 Maele melomong ea batho ba se nang kelello

A tšoana le setlama-tlama se meutloa letsohong la letahoa.

10 Ea hirang motho ea se nang kelello kapa batho ba fetang ka tsela

O tšoana le motho ea sebelisang seqha, ea hlabang feela.*

11 Joalokaha ntja e khutlela mahlatseng a eona,

Ea se nang kelello le eena o pheta booatla ba hae.+

13 Ea botsoa o re: “Ho na le taoana tseleng,

Ho na le tau seterateng.”+

14 Joalokaha lemati le ea pele le morao ha le ntse le buleha le koaleha,

Ea botsoa o ntse a fetoha holim’a bethe ea hae.+

15 Ea botsoa o kentse letsoho la hae ka sekotlolong se seholo

Empa o tsoafa le ho le isa ka hanong.+

16 Ea botsoa o nahana hore o bohlale

Ho feta batho ba supileng ba fanang ka karabo e nang le kelello.

17 Mofeta-ka-tsela ea halefisoang ke* qabang eo e seng ea hae+

O tšoana le motho ea tšoarang ntja ka litsebe.

18 Joaloka lehlanya le bolaeang, le fereletsang metsu e tukang le litsenene,

19 Motho ea qhekellang* moahisani oa hae ebe o re: “Ke ne ke soasoa,”+ o joalo.

20 Ha patsi e le sieo mollo oa tima,

Ha ho se na moetselletsi khang ea fela.+

21 Joalokaha mashala a etsa hore mollo o hlene le patsi e hotetsa mollo,

Motho ea ratang likhang le eena o fehla liqabang.+

23 Mantsoe a monate a tsoang ho motho ea pelo e mpe+

A joaloka leqhetso la sejana se pshatlehileng sa letsopa se tlotsitsoeng ka silevera.

24 Motho ea lehloeo o ikhakanya ka lipuo

Empa ka pelong o patile bolotsana.

25 U se ke oa mo tšepa leha a ka bua ka bonolo

Hobane ho na le lintho tse supileng tse nyonyehang ka pelong ea hae.*

26 Le hoja a bua leshano ho pata lehloeo la hae,

Bokhopo ba hae bo tla hlahella ho batho.

27 Ea chekang sekoti o tla oela ka har’a sona

’Me ea thetang lejoe le tla khutlela ho eena le mo pilinye.+

28 Motho ea leshano o hloile bao a ba utloisitseng bohloko*

Le motho ea rorisang ho tlola o baka tšenyo.+