Moeklesia

6 Ho na le tlokotsi e ’ngoe eo ke e boneng lefatšeng* ’me e tloaelehile har’a batho: 2 Molimo oa ’nete o fa motho maruo, matlotlo le tlhompho e le hore a se ke a hloka letho la lintho tseo a li batlang.* Leha ho le joalo, Molimo oa ’nete ha a mo lumelle hore a li thabele empa o lumella motho osele feela hore a li thabele. Hona ke lefeela ’me ke bomalimabe bo boholo. 3 Haeba monna a ka ba le bana ba lekholo, a phela lilemo tse ngata ho fihlela a tsofala empa a sa thabele lintho tsa hae tse molemo pele a shoa, ngoana ea hlahileng a khathetse* o molemo ho mo feta.+ 4 Etsoe ha ho na thuso ea hore ebe ngoana eo o hlahile. O shoeletse lefifing ’me lebitso la hae le koahetsoe ke lefifi. 5 Le hoja ho se mohla a kileng a bona letsatsi kapa a tseba ntho leha e le efe, o ntse a le molemo* ho feta monna eo.+ 6 Thuso ea hore motho a phele lilemo tse likete tse peli empa a sa thaba ke efe? Etsoe bohle ba ea sebakeng se le seng.+

7 Motho o etsa mosebetsi o boima e le hore a tlatse mpa ea hae+ empa ha ho mohla a khotsofalang. 8 Etsoe ke joang motho ea bohlale a leng molemo ho feta motho ea se nang kelello?+ Kapa ho thusa’ng hore ebe mofutsana o tseba mokhoa oa ho phela?* 9 Ho molemo hore motho a thabele seo mahlo a hae a se bonang ho feta hore a lakatse lintho tseo a ke keng a li fumana. Hoo le hona ke lefeela, ke ho lelekisa moea.

10 Eng kapa eng e teng e se e fuoe lebitso. Hape ho tsebahala hantle hore na motho ke’ng. Motho ha a khone ho pheha khang le* motho ea matla ho mo feta. 11 Ha mantsoe a le mangata, ha a na thuso.* A tlisetsa motho molemo ofe? 12 Ke mang ea tsebang hore na ke’ng e molemo eo motho a ka e etsang bophelong ba hae? Bophelo ba hae bo se nang thuso bo tšoana le moriti ’me bo tla fela.+ Etsoe ke mang ea ka bolellang motho hore na ho tla etsahala’ng lefatšeng* ha a se a shoele?