Ezekiele
31 Jehova a boela a bua le ’na ka letsatsi la pele la khoeli ea boraro, ka selemo sa bo11 a re: 2 “Mor’a motho, e-re ho Faro morena oa Egepeta le ho mabotho a hae,+
‘Ke mang ea matla joaloka uena?
3 Ho ne ho e-na le Moasiria ea joaloka sefate sa kedare sa Lebanone,
Se ne se le selelele, se e-na le makala a matle a etsang moriti o moholo.
Karolo ea sona e ka holimo e ne e fihla marung.
4 Metsi a ile a etsa hore se be seholo le hore se be selelele.
Ho ne ho e-na le linokana moo se lenngoeng teng,
Li ne li nosetsa lifate tsohle tsa naha.
5 Ke ka lebaka leo se ileng sa ba selelele ho feta lifate tse ling tsohle tsa naha.
Makala a sona a ile a ba mangata, a ba malelele
Ka lebaka la metsi a mangata a tsoang linokaneng.
6 Linonyana tsohle li ne li hahela makaleng a sona,
Liphoofolo tsohle tse hlaha li ne li tsoalla tlas’a sona,
Le batho ba lichaba tsohle ba lula tlas’a moriti oa sona.
7 E ile ea e-ba sefate se seholo, se setle, se nang le makala a malelele
Hobane metso ea sona e ne e le ka har’a metsi a mangata.
8 Ho ne ho se na lifate tse ling tsa kedare tse tšoanang le sona serapeng sa Molimo,+
Ho se na lifate tsa junipere tse nang le makala a tšoanang le a sona
Ebile ho se na lifate tsa poleini tse nang le makala a tšoanang le a sona.
Ha ho na sefate se neng se le setle joaloka sona serapeng sa Molimo.
9 Ke se entse hore se be setle, se be le makhasi a mangata
Ebile lifate tse ling tsohle tse neng li le Edene serapeng sa Molimo oa ’nete, li ne li se monela.’
10 Jehova ’Musi oa Lintho Tsohle o re: ‘Kaha se* ile sa e-ba selelele sa ba sa fihla marung, se ile sa ikhohomosa ka lebaka la bolelele ba sona. 11 Ke tla se fa ’musi ea matla oa lichaba.+ O tla se ahlola ’me ke tla se lahla ka lebaka la bokhopo ba sona. 12 Balichaba ba sehloho ka ho fetisisa ba tla se khaola, ba se lahlele lithabeng. Makhasi a sona a oele likhohlong le makala a sona a robehe, a oele linokaneng tsohle tsa naha.+ Batho bohle lefatšeng ba tla se lahla ebile ba ke ke ba hlola ba lula tlas’a moriti oa sona. 13 Linonyana tsohle li tla lula holim’a sefate seo se oeleng le liphoofolo tsohle tse hlaha li lule makaleng a sona.+ 14 Ntho ena e tla etsahala e le hore sefate leha e le sefe se botleng moo metsi a leng mangata, se se ke sa e-ba selelele kapa karolo ea sona e ka holimo e fihle marung. Kaofela li tla shoa, li patoe joaloka batho ba patoang mabitleng.’
15 Jehova ’Musi oa Lintho Tsohle o re: ‘Letsatsing leo se theohelang Lebitleng,* ke tla etsa hore batho ba lle. Ke tla thiba metsi a mangata, ke thibe le linokana hore li se ke tsa phalla. Ke tla etsa hore Lebanone e be lefifi ka lebaka la sona ebile lifate tsohle tsa naha li tla omella. 16 Ke tla etsa hore ha se oa, molumo oa sona o thothometse lichaba. Ke tla se theolela Lebitleng* hammoho le batho bohle ba eang lebitleng. Lifate tsohle tsa Edene+ e leng lifate tse ntle tsa Lebanone tse botleng moo metsi a leng mangata, li tla tšeliseha ha li se bona Lebitleng. 17 Li theoletsoe Lebitleng* ho bohle ba bolailoeng ka sabole.+ Li theohetse teng hammoho le ba mo tšehetsang, ba neng ba lula tlas’a moriti oa hae.’+
18 Jehova ’Musi oa Lintho Tsohle o re: ‘Ha ho na sefate se neng se tšoana le uena ka boholo le matla Edene.+ Leha ho le joalo, u tla isoa lebitleng hammoho le lifate tsa Edene. U tla robatsoa le batho ba bolailoeng ka sabole ba sa bollang. Lintho tsena li tla etsahalla Faro le sechaba sa hae.’”