Khaolo ea 37
Jesu o Leleka Mahlomola a Mohlolohali
NAKOANA ka mor’a hore a phekole mohlanka oa molaoli oa sesole, Jesu o ea Naine, motse o lik’hilomithara tse 32 ka boroa-bophirimela ho Kapernauma. Barutuoa ba hae le letšoele la batho ba tsamaea le eena. Mohlomong e se e batla e le ka shoalane ha ba fihla mathōkong a Naine. Mona ba teana le mokoloko oa batho ba eang mabitleng. Ho jeroe setopo sa mohlankana ho ea se epela ka ntle ho motse.
Boemo ba ’mè ke bo otlang pelo ka ho khethehileng, kaha ke mohlolohali ’me enoa ke ngoana ea ’notši oa hae. Ha monna oa hae a e-shoa, o ne a ka tšelisoa ke ’nete ea hore o na le mora oa hae. Tšepo ea hae, litakatso tsa hae le taba-tabelo ea hae li ile tsa lohelloa bokamosong ba hae. Empa joale ha ho eo a ka hlolang a fumana matšeliso ho eena. Mahlomola a hae a maholo ha batho ba motse ba mo felehetsa ho ea mabitleng.
Ha Jesu a bona mosali enoa, pelo ea hae e angoa ke masoabi a hae a maholo. Ka hona ka bonolo, empa e le ka tieo e kholisang, o re ho eena: “Se lle.” Mokhoa oa hae le tsela eo a ileng a etsa ka eona tsa hapa tlhokomelo ea letšoele. Ka hona ha a atamela ’me a ama mojaro oa mofu, ba jereng mofu ba ema tlekelele! Bohle ba tlameha ba be ba ipotsa hore na o tla etsa eng.
Ke ’nete hore ba tsamaeang le Jesu ba ’nile ba mo bona a phekola ka mohlolo mafu a batho ba bangata. Empa ho hlakile hore ha ba e-s’o ’mone a tsosa mang kapa mang bafung. Na a ka etsa ntho e joalo? Ha a bua le setopo, Jesu oa laela: “Mohlankana, ke re ho uena: Tsoha!” Eaba monna eo oa lula! O qala ho bua, ’me Jesu a mo nea ’m’ae.
Ha batho ba bona hore kannete mohlankana oa phela, ba qala ho re: “Moprofeta e moholo o hlahile har’a rōna.” Ba bang ba re: “Molimo o etetse sechaba sa oona.” Litaba tsa ketso ena e hlollang tsa jaleha kapele Judea le mathōkong ’ohle a eona.
Johanne Mokolobetsi o ntse a le teronkong, ’me o batla ho ithuta ka ho eketsehileng ka mesebetsi eo Jesu a tsebang ho e etsa. Barutuoa ba Johanne ba ’molella lintho tsena tsohle. Karabo ea hae ke efe? Luka 7:11-18.
▪ Ho etsahala’ng ha Jesu a atamela Naine?
▪ Jesu o ameha joang ke seo a se bonang, ’me o etsa’ng?
▪ Batho ba arabela joang mohlolong oa Jesu?