Thuto ea 15

Metsoalle ea Molimo e Etsa Lintho Tse Ntle

Ha u e-na le motsoalle eo u mo ratang le eo u mo hlomphang, u leka ho tšoana le eena. Bibele e re: “Jehova o molemo ’me o lokile.” (Pesaleme ea 25:8) Hore re be metsoalle ea Molimo, re lokela ho ba batho ba molemo le ba lokileng. Bibele e re: “Le be baetsisi ba Molimo, joaloka bana ba ratoang, ’me le tsoele pele ho tsamaea leratong.” (Baefese 5:1, 2) Litsela tse ling tsa ho etsa seo ke tsena:

Thusa ba bang. “A re sebetseng se molemo ho bohle.”—Bagalata 6:10.

Sebetsa ka thata. “Ea utsoang a se ke a hlola a utsoa, empa ho e-na le hoo, a sebetse ka thata, a etsa mosebetsi o molemo ka matsoho a hae.”—Baefese 4:28.

Hloeka ’meleng le boitšoarong. “A re itlhatsoeng litšila tsohle tsa nama le tsa moea, re phethahatse khalalelo ka ho tšaba Molimo.”—2 Bakorinthe 7:1.

Tšoara litho tsa lelapa la hao ka lerato le ka tlhompho. “E mong le e mong oa lōna . . . a rate mosali oa hae joalokaha a ithata; ka lehlakoreng le leng, mosali o lokela ho ba le tlhompho e tebileng ho monna oa hae. Bana, le mamele batsoali ba lōna.”—Baefese 5:33–6:1.

Bontša ba bang lerato. “A re tsoeleng pele ho ratana, hobane lerato le tsoa ho Molimo.”—1 Johanne 4:7.

Hlompha melao ea naha. “Moea o mong le o mong o ke o ipehe tlas’a [’muso] . . . Fang bohle tse ba lokelang, ea batlang lekhetho, le mo fe lekhetho.”—Baroma 13:1, 7.