Ho Hlōla Mokhoa oa ho Pholla Litho Tsa Botona Kapa Tsa Botšehali ho Ikhotsofatsa

Mokhoa oa ho pholla litho tsa botona kapa tsa botšehali ho ikhotsofatsa ha o khahlise Molimo, o kenya batho maikutlo a boithati ebile o silafatsa kelello. Motho ea tloaetseng mokhoa ona a ka boetse a nka batho ba bang e le lintho feela tsa ho khotsofatsa takatso ea ho kopanela liphate. Ho eena, ho kopanela liphate ha ho tsamaisane le lerato ’me ho fetoloa mokhoa feela oa ho ikhotsofatsa ka motsotsoana le ho ikimolla ho chesoa ke takatso. Empa sena se imolla motho ka nakoana feela. Ha e le hantle, ho e-na le ho bolaea litho tsa ’mele ‘mabapi le bohlola, ho se hloeke, le takatso ea botona kapa ea botšehali e sa lokang,’ ho pholla litho tsa botona kapa tsa botšehali ho ikhotsofatsa hoa li tsosa.—Bakolose 3:5.

Moapostola Pauluse o ile a ngola a re: “Baratuoa, a re itlhatsoeng litšila tsohle tsa nama le tsa moea, re phethahatse khalalelo ka ho tšaba Molimo.” (2 Bakorinthe 7:1) Haeba u thatafalloa ke ho etsa seo mantsoe ana a se bolelang, u se ke ua felloa ke tšepo. Kamehla Jehova o “itokiselitse ho tšoarela” le ho fana ka thuso. (Pesaleme ea 86:5; Luka 11:9-13) Ka sebele, pelo ea hao e u nyatsang le boiteko ba hao ba hore u tlohele mokhoa ona—ho sa tsotellehe hore ka linako tse ling u khutlela ho oona—ke bopaki ba hore maikutlo a hao a matle. Hape, u hopole hore “Molimo o moholo ho lipelo tsa rōna ’me o tseba lintho tsohle.” (1 Johanne 3:20) Molimo ha a bone libe tsa rōna feela, o bona le seo re leng sona. Kaha o re tseba ka ho feletseng, a ka mamela ka qenehelo ha re kōpa mohau ka tieo. Kahoo, joaloka ngoana ea eang ho ntate oa hae ha a le khathatsong, u se ke ua khathala ho rapela Molimo ka boikokobetso le ka tieo. Jehova o tla u hlohonolofatsa ka letsoalo le hloekisitsoeng. (Pesaleme ea 51:1-12, 17; Esaia 1:18) Leha ho le joalo, u lokela ho etsa lintho tumellanong le lithapelo tsa hao. Ka mohlala, u tla loanela ho qoba mefuta eohle ea litšoantšo tse litšila tse tsosang takatso hammoho le metsoalle e mebe.a

Haeba bothata ba hao ba ho pholla litho tsa botona kapa tsa botšehali ho ikhotsofatsa bo sa khaotse, re kōpa hore u bue taba ena le motsoali oa Mokreste kapa motsoalle e mong ea butsoitseng moeeng le ea u tsotellang.b—Liproverbia 1:8, 9; 1 Bathesalonika 5:14; Tite 2:3-5.