Lithapelo tsa Hao Li na le Moelelo Hakae?
“Ke bitsa ho uena ka pelo ea ka eohle: u nkarabe, Jehova.”—PESALEME EA 119:145.
1, 2. (a) Ke papiso efe ea Jesu e sebetsanang le thapelo? (b) Jesu o ile a fihlela qeto efe lithapelong tseo tse peli, ’me hoo ho lokela ho re bontša eng?
’MŌPI, Jehova Molimo, o utloa lithapelo tsa mofuta ofe? Papiso eo Jesu Kreste a e boletseng e bontša bo bong ba maemo a motheo ba hore Molimo o arabele lithapelo. Jesu o boletse hore banna ba babeli ba ne ba rapela tempeleng Jerusalema. E mong e ne e le Mofarisi ea hlomphuoang haholo, e mong e le molekhetho ea nyatsehang. Mofarisi o ile a rapela: “Molimo, kea u leboha ha ke se joale ka batho ba bang, . . . le joale ka mo-lekhetho enoa. Ke itima lijo habeli ka veke; ke ntša karolo ea leshome ea ntho tsohle tseo ke li ruang.” Empa molekhetho ea tlasana “a mpa a iteta sefuba, a re: Molimo, nkhauhele, ’na ke leng moetsalibe.”—Luka 18:9-13.
2 Ha a hlalosa ka lithapelo tsena tse peli, Jesu o itse: “Kea le bolella, enoa [molekhetho] o theohetse tlung ea hae a beiloe ea lokileng ho feta oa pele [Mofarisi]. Hobane e mong le e mong ea ikhōlisang o tla kokobetsoa; empa ea ikokobetsang o tla hōlisoa.” (Luka 18:14) Ka ho hlakileng, Jesu o bontšitse hore ho rapela Ntate oa rōna oa leholimo feela ha hoa lekana. Tsela eo re rapelang ka eona—boikutlo ba rōna ba kelello ke ba bohlokoa.
3. (a) Bolela melao e meng ea motheo e tsamaisang thapelo. (b) Thapelo e ka nka libopeho life?
3 Ka sebele, thapelo ke tokelo ea bohlokoa, e nang le boikarabelo, e tebileng, ’me Bakreste bohle ba nang le tsebo e ntle ba tloaelane le melao ea motheo e e tsamaisang. Lithapelo li tlameha ho lebisoa ho Molimo o le mong oa ’nete, Jehova. Li tlameha ho etsoa ka lebitso la Mora oa hae, Jesu Kreste. Hore li tle li amohelehe, li tlameha ho etsoa ka tumelo. E, “ea atamelang Molimo e ka khona a lumele hobane o teng.” Ho feta moo, lithapelo tsa motho li tlameha ho lumellana le thato ea Molimo. (Ba-Heberu 11:6; Pesaleme ea 65:2; Mattheu 17:20; Johanne 14:6, 14; 1 Johanne 5:14) ’Me mehlaleng ea Mangolo, re ithuta hore lithapelo li ka ba ka sebopeho sa thoriso, teboho, kōpo le thapeli.—Luka 10:21; Ba-Efese 5:20; Ba-Filippi 4:6; Ba-Heberu 5:7, NW.
Mehlala ea Lithapelo tse Nang le Moelelo
4. (a) Moshe le Joshua ba ile ba fana ka mehlala efe ea thapelo e nang le moelelo? (b) Davida le Morena Ezekiase ba fane ka mehlala efe? (c) Ke tšobotsi efe e tšoanang eo lithapelo tse ’maloa ho tsee li bileng le eona?
4 Ha ho tlameha ho tobanoa le mathata a boima, ha ho hlokahala liqeto tse tebileng, ha ho entsoe liphoso tse tebileng, kapa bophelo ba rōna bo tšosoa, lithapelo tsa rōna e ba tsa pelo eohle le tse nang le moelelo ka ho khethehileng. Ka lebaka la hobane Baiseraele ba ile ba qala bofetoheli kamor’a ho utloa tlaleho e fosahetseng ea lihloela tse leshome tse sa tšepahaleng, Jehova o ile a bolella Moshe hore batho bana ba lokeloa ke ho felisoa. Ka thapelo ea pelo eohle le e nang le moelelo, Moshe o ile a kōpa Jehova hore a se ke a nka bohato bona kaha ho ne ho ameha lebitso la Hae. (Numere 14:11-19) Ha Iseraele e hlōloa Ai ka lebaka la meharo ea Akane, Joshua o ile a bua ka kōpo e nang le kameho e matla haholo le teng e le ka lebaka la lebitso la Jehova. (Joshua 7:6-9) Lipesaleme tse ngata tsa Davida li ka sebopeho sa lithapelo tsa pelo eohle, mohlala o totobetseng haholo e le Pesaleme ea 51. Thapelo ea Morena Ezekiase nakong ea ha Morena Sankeribe oa Assyria a futuhela Juda ke mohlala o mong o motle oa thapelo e nang le moelelo, le mona ho ne ho ameha lebitso la Jehova.—Esaia 37:14-20.
5. Re na le mehlala efe e meng ea lithapelo tse nang le moelelo tse boletsoeng ke bahlanka ba bang ba Jehova?
5 Ho ne ho ka ’na ha thoe buka ea Lillo tsa Jeremia ke thapelo e telele le ea pelo eohle ea Jeremia molemong oa batho ba habo, hobane mono ho bitsoa Jehova khafetsa. (Lillo tsa Jeremia 1:20; 2:20; 3:40-45, 55-66; 5:1-22) Esdrase le Daniele le bona ba ile ba nehela lithapelo tse nang le moelelo le tsa pelo eohle molemong oa batho ba habo bona, ba bolela liphoso tsa sechaba sa habo bona ’me ba kōpa tšoarelo. (Esdrase 9:5-15; Daniele 9:4-19) Hape re ka tiisa hore thapelo ea Jonase eo a e entseng ha a le ka mpeng ea tlhapi e kholo e ne e le ea pelo eohle le e nang le moelelo.—Jonase 2:1-9.
6. (a) Jesu o re file mehlala efe ea lithapelo tse nang le moelelo? (b) Ho hlokahala ntlha efe ea motheo ho etsa hore lithapelo tsa rōna li be le moelelo?
6 Pele a khetha baapostola ba 12, Jesu o ile a qeta bosiu bohle a rapela e le hore ho ka etsoa thato ea Ntate oa hae ha a khetha. (Luka 6:12-16) Ho boetse ho na le thapelo e nang le moelelo ea Jesu bosiung boo a ekiloeng ka bona, joalokaha e tlalehiloe ho Johanne khaolo ea 17. Lithapelo tsena kaofela li fana ka bopaki bo hlakileng ba kamano e ntle le Jehova Molimo e ileng ea thabeloa ke ba li entseng. Ntle ho pelaelo, hona e tlameha ho ba ntlha ea motheo lithapelong tsa rōna hore li tle li be le moelelo. ’Me ho hlokahala hore e be tsa pelo eohle hape li be le moelelo hore li tle li be le “matla” ho Jehova Molimo.—Jakobo 5:16.
Mefokolo ka Lebaka la ho se Phethahale ha Botho
7. Re ka ’na ra botsa lipotso life mabapi le lithapelo tsa rōna?
7 Joalokaha re hlokometse, tlas’a maemo a hatellang lithapelo tsa rōna e ka ’na ea e-ba tsa pelo eohle le tse nang le moelelo haholoanyane. Empa ho thoe’ng ka lithapelo tsa rōna tsa letsatsi ka leng? Na li fana ka bopaki ba kamano e mofuthu le e haufi-ufi eo re ikutloang re e-na le eona le Ntate oa rōna oa leholimo, Jehova Molimo? Ho boletsoe hantle hore: “Thapelo e tlameha ho bolela ho hong ho rōna hore e tle e be le seo e se bolelang ho Molimo.” Na re nahana lithapelo tsa rōna le ho tiisa hore li hlile li tsoa lipelong tsa rōna tsa tšoantšetso?
8. Lithapelo tsa rōna li ka ’na tsa ba le mefokolo efe ka lebaka la ho se phethahale ha botho?
8 Ho bonolo ho tlohella hore lithapelo tsa rōna li fokole lintlheng tsena. Ka lebaka la litšekamelo tsa rōna tseo re li futsitseng tsa ho se phethahale, lipelo tsa rōna li ka re thetsa habonolo, tsa amoha lithapelo tsa rōna boemo bo botle boo li lokelang ho ba le bona. (Jeremia 17:9) Mabakeng a mangata, ntle le hore re khefutse le ho nahana pele re rapela, re ka ’na ra fumana hore tšekamelo ke hore lithapelo tsa rōna li fetoha tseo motho a pheremetsang mantsoe feela, tse lebang ’nģa e le ’ngoe le tloaelo. Kapa li ka ’na tsa fetoha pheta-phetane, e leng ho re hopotsang seo Jesu a se buileng ka tsela e fosahetseng eo ‘batho ba lichaba ba rapelang ka eona.’ (Mattheu 6:7, 8) Kapa lithapelo tsa rōna li ka ’na tsa sebetsana le lintho tse akaretsang feela ho e-na le litaba tse tobileng kapa batho ba tobileng.
9. Ke likotsi life tse ling tse ka hlahang mabapi le lithapelo tsa rōna, ’me ha ho pelaelo hore lebaka le leng la likotsi tsee ke lefe?
9 Ka linako tse ling re ka ’na ra sekamela ho potlaka lithapelong tsa rōna. Empa ntho ea bohlokoa ke ena e hlokometsoeng: “Haeba u phathahane haholo hore u ka rapela, u hlile u phathahane haholo.” Ha rea lokela ho rata ho tseba mantsoe a itseng ka hlooho ebe joale re a pheta nako le nako ha re rapela; leha e le hore hoa hlokahala hore Paki ea Jehova e bale thapelo ea eona, joaloka sebokeng sa phatlalatsa. Ha ho pelaelo hore likotsi tsena kaofela li hlahisoa, har’a tse ling, ke ’nete ea hore re ke ke ra bona Jehova Molimo ka seqo, Eo re mo rapelang. Leha ho le joalo, re ke ke ra lebella hore a khahlisoe ke lithapelo tse joalo, leha e le hore re rua molemo ka ho li etsa.
Ho Hlōla Mefokolo
10. (a) Ke boikutlo bofe bo tla bontša ho haelloa ke kananelo bakeng sa bohlokoa ba thapelo? (b) Ke ketsahalo efe ea Mangolo e hlokomeloang?
10 Re tla khona ho itebela khahlanong le likotsi tse boletsoeng kaholimo ho ea boholeng boo re ananelang bohlokoa ba lithapelo tsa rōna letsatsi ka leng le ho ba le kamano e ntle le Ntate oa rōna oa leholimo. Ka lebaka le le leng, kananelo e joalo e tla re thusa ho itebela khahlanong le ho potlaka ha re rapela joalokaha eka re ne re hloka ho fihla linthong tse ling tsa bohlokoa haholoanyane. Ha ho letho leo e ka bang la bohlokoa ho feta ho bua le Morena oa Bokahohleng, Jehova Molimo. Ke ’nete, ho ka ’na ha e-ba le makhetlo ao nako e leng nyenyane. Ka mohlala, ha Morena Artaxerxese a botsa moqhatsetsi oa hae Nehemia, “Kōpo ea hao u kōpa’ng?” Nehemia ‘a rapela Molimo oa maholimo hang-hang.’ (Nehemia 2:4) Kaha morena o ne a lebelletse karabelo kapele, Nehemia o ne a ke ke a rapela nako e telele. Empa re ka ’na ra tiisa hore e ne e e-na le moelelo ’me e tsoa pelong ea hae hobane Jehova o ile a mo arabela ka potlako. (Nehemia 2:5, 6) Leha ho le joalo, ka ntle ho makhetlo a joalo a tlang seoelo, re lokela ho nka nako bakeng sa lithapelo tsa rōna ’me re behelle lintho tse ling kathōko. Haeba re tloaetse ho potlaka ha re rapela, ha re ananele bohlokoa ba thapelo ka botlalo.
11. Ke kotsi efe e ’ngoe eo ho hlokahalang re itebele ho eona, hona ke mohlala ofe o motle oo Jesu a o beileng ntlheng ee?
11 Kotsi e ’ngoe eo ho ka ’nang ha hlokahala hore re e qobe ke eo ea ho pheta lintho tse akaretsang. Lithapelo tse joalo li boetse ha li tšoanele tokelo ea bohlokoa ea thapelo. Thapelong ea hae ea mohlala, Jesu o re beetse mohlala o motle ntlheng ena. O boletse likōpo tse supileng tse ikhethang: tse tharo li sebetsana le ho hlōla ha ho loka, e ’ngoe le litlhoko tsa nama tsa letsatsi le letsatsi, le tse tharo tsa bophelo ba rōna ba moea.—Mattheu 6:9-13.
12. Pauluse o fana ka mehlala efe e metle mabapi le ho toba taba lithapelong tsa rōna?
12 Moapostola Pauluse le eena o re beetse mohlala o motle ntlheng ena. O ile a kōpa hore ba bang ba mo rapelle ‘hore a fuoe matla a ho bua ka sebete.’ (Ba-Efese 6:18-20) Lithapelong tsa hae o ne a toba taba molemong oa ba bang. Pauluse o itse: “Seo ke se kōpang, ke hore lerato la lōna le ’ne le eketsehe ka mehla, ka tsebo le ka kelello eohle; le tle le tsebe ho lemoha litaba tse fetisang ka molemo, le ’ne le hloeke, ’me le se ke la khopjoa, letsatsi la Kreste le be le chabe; le ntse le tletse litholoana tsa ho loka, tse beoang ka Jesu Kreste, hore e be khanya le poko ho Molimo.”—Ba-Filippi 1:9-11.
13. Re ka etsa lithapelo tse nang le moelelo joang mabapi le mefuta ea rōna e sa tšoaneng ea tšebeletso ho Jehova?
13 E, lithapelo tsa rōna li lokela ho sebetsana le lintho tse tobileng, ’me hona ho hloka hore re nahane lithapelo tsa rōna. (Bapisa Liproverbia 15:28.) Ha re le tšebeletsong ea tšimo, re ka ’na ra kōpa Molimo hore o re hlohonolofaletse boiteko ba rōna empa hape le hore o re fe bohlale, masene, sebete, ho bua ka bolokolohi kapa thuso bakeng sa bofokoli bofe kapa bofe bo ka ’nang ba kena-kenana le ho atleha ha rōna bopaking. Ho feta moo, na re ke ke ra kōpa Molimo hore o re tataisetse ho ba lapetseng le ba nyoretsoeng ho loka? Pejana re fana ka puo ea phatlalatsa kapa re ba le karolo Sebokeng sa Tšebeletso kapa Sekolong sa Tšebeletso sa Puso ea Molimo, re ka kōpa Jehova hore moea oa hae o halalelang o lule ho rōna ka bongata. Hobane’ng? E le hore re ka ba le tšepo le ho lekalekana, re ka ’na ra bua ka pelo eohle le ka ho kholiseha, e le hore re ka tlisa tlhompho lebitsong la Molimo le ho haha baena ba rōna. Lithapelo tsohle tse joalo le tsona li tlatsetsa hore re be le khopolo e ntle ha re bua.
14. Boikutlo ba rōna e lokela ho ba bofe mabapi le mefokolo ea nama eo ho leng thata ho e hlōla?
14 Na re na le bofokoli ba nama bo loantšanang le bomoea ba rōna le boo ho bonahalang ho le thata ho bo hlōla? Re lokela ho batla ho sebetsana le bona ka ho toba lithapelong tsa rōna. ’Me hore re tle re se ke ra nyahama ho hang, le kamohla re se ke ra khathala ho kōpa Molimo ka boikokobetso le ka pelo eohle hore o re thuse le ho re tšoarela. E, tlas’a maemo a joalo, re lokela ho batla ho ea ho Jehova joalokaha ngoana a ea ho ntate oa hae ha a le khathatsong, ho sa tsotellehe hore na ke hangata hakae re rapelang Molimo ka bofokoli bo tšoanang. Haeba re tiile, Jehova o tla re thusa, hape re tla bona hore o re tšoaretse. Tlas’a maemo a joalo, re ka boetse ra fumana matšeliso ho ipoleleng ha moapostola Pauluse hore o na le bothata.—Ba-Roma 7:21-25.
Lithuso tsa ho Etsa Lithapelo tse Nang le Moelelo
15. Re lokela ho atamela Jehova Molimo ka thapelo ka boikutlo bofe ba kelello?
15 Hore lithapelo tsa rōna li tle li hle li be le moelelo, re tlameha ho etsa boiteko ba ho leleka menahano eohle ea tse kantle le ho bea maikutlo tabeng ea hore re itlhahisa pel’a Molimo o Moholo, Jehova. Ho hlokahala re mo atamele ka tlhompho e tebileng, re ananela boholo ba hae. Joalokaha Jehova a boleletse Moshe, ha ho motho ea ka bonang Molimo ’me a phela. (Exoda 33:20) Kahoo ho hlokahala re atamele Jehova ka boikokobetso bo lokelang le boitlhompho bo lokelang, e leng ntlha eo Jesu a ileng a e hatisa papisong ea hae ea Mofarisi le molekhetho. (Mikea 6:8; Luka 18:9-14) Jehova e tlameha ho ba motho oa sebele haholo ho rōna. Re tlameha ho ba le boikutlo bo tšoanang le boo Moshe a bileng le bona. ‘O ne a tiea joale ka hoja a bona ea sa bonoeng.’ (Ba-Heberu 11:27) Litšobotsi tse joalo li bea bopaki ba hore re na le kamano e ntle le Ntate oa rōna oa leholimo.
16. Lipelo tsa rōna li ba le karolo efe ha re etsa lithapelo tse nang le moelelo?
16 Lithapelo tsa rōna li tla boetse li ba le moelelo haeba re tla ho Jehova ka lipelo tse tletseng lerato le kameho ho eena. Ka mohlala, mopesaleme Davida o bontšitse kananelo e kaakang ho Jehova Molimo le lerato le lekaakang ho eena ho Lipesaleme tsa 23 le 103! Ha ho pelaelo hore Davida o ne a e-na le kamano e ntle le Molisa oa hae e Moholo, Jehova Molimo. Sekolong sa Tšebeletso sa Puso ea Molimo, re eletsoa hore re bue ka mofuthu le ka boikutlo. Hona e lokela ho ba ’nete le ha re bala mangolo hape ho be joalo haholoanyane ha re rapela Ntate oa rōna oa leholimo. E, re batla ho ikutloa joaloka Davida ha a rapela: “Nketse hore ke tsebe litsela tsa hao, oho Jehova; nthute litsela tsa hao. Nketse hore ke tsamaee ’neteng ea hao ’me u nthute, hobane u Molimo oa ka oa poloko.” Mantsoe a mang a bontšang mokhoa oo re lokelang ho ikutloa ka oona ke ana a mopesaleme e mong: “Ke bitsa ho uena ka pelo ea ka eohle: u nkarabe, Jehova.”—Pesaleme ea 25:4, 5, NW; Ps 119:145.
17. Re ka boloka lithapelo tsa rōna hore li se ke tsa e-ba pheta-phetane joang?
17 Hore re boloke lithapelo tsa rōna li e-na le moelelo le ho qoba ho pheta-pheta, re etsa hantle ha re fetola seo li se fupereng. Temana ea Bibele bakeng sa letsatsi leo kapa khatiso e ’ngoe ea Bokreste eo re neng re ntse re e bala e ka ’na ea fana ka khopolo. Sehlooho sa thuto ea Molula-Qhooa, sa puo ea phatlalatsa, kapa sa kopano eo re eang ho eona se ka ’na sa sebeletsa morero o joalo.
18. Hore lithapelo tsa rōna li be le moelelo haholoanyane, re ka ’na ra etsa eng tumellanong le mantsoe a Bibele le mehlala ea eona?
18 Ho re thusa ho eketsa ho hong moeeng oa thapelo le ho etsa hore lithapelo tsa rōna li be le moelelo haholoanyane, ke hantle ha re fetola boemo ba rōna ba ’mele. Bakeng sa lithapelo tsa phatlalatsa, ka tlhaho re inamisa lihlooho tsa rōna. Empa bakeng sa lithapelo tsa botho, ba bang ba ho fumane ho le molemo ho khumama ka pel’a Jehova ha motho ka mong a rapela kapa e le lelapa hobane ba hlokometse hore boemo boo bo tlatsetsa hore ba be le boikutlo ba kelello ba boikokobetso. Ho Pesaleme ea 95:6 rea phehelloa: “Tlong, re khumameng, re inameng, re oe ka mangole pel’a Jehova, ’Mōpi oa rōna.” Salomone o ile a khumama ha a rapela ha ho nehelanoa ka tempele ea Jehova, ’me Daniele o ne a itloaelitse ho khumama ha a rapela.—2 Likronike 6:13; Daniele 6:10.
19. Ba nang le boikarabelo bakeng sa lithapelo tsa phatlalatsa ba ne ba tla etsa hantle ho hopola lintlha life?
19 Ha ho talingoa bohlokoa ba thapelo, baholo ba khethiloeng ba lokela ho ahlola hantle hore na ba khetha mang hore a etse thapelo ea phatlalatsa molemong oa phutheho. Monna ea kolobelitsoeng ea emelang phutheho e lokela ho ba mosebeletsi ea hōlileng tsebong oa Mokreste. Thapelo ea hae e lokela ho senola hore o na le kamano e ntle le Molimo. ’Me ba filoeng tokelo ea ho etsa lithapelo tse joalo ba lokela ho nahana ka ho utluoa, hobane ha ba ithapelle e le bona feela empa ba boetse ba rapela molemong oa phutheho eohle. Ho seng joalo, phutheho eohle e ka kopanela joang hore “amen” qetellong ea thapelo eo? (1 Ba-Korinthe 14:16) Ha e le hantle, bakeng sa hore bohle ba tle ba khone ho re “amen” e nang le moelelo, ba tlameha ho mamela ka hloko, ba sa lumelle hore likelello tsa bona li lelere empa kannete ba etsa thapelo eo ea bona. Keletso e ’ngoe e ka akheloang ke hore kaha lithapelo tse joalo li lebisoa ho Jehova Molimo, ha lia lokela ho sebelisoa e le phephi ea ho ruta bamameli kapa ho hlahisa likhopolo tseo e leng tsa botho ka ho feletseng.
20. Kaha lithapelo tse nang le moelelo tse builoeng ka lentsoe le phahameng li fetisetsa tlhohonolofatso ho ba li utloang, ho etsoa tlhahiso efe?
20 Ha lithapelo tsa rōna tse entsoeng ka lentsoe le phahameng li e-na le moelelo kannete, li fetisetsa tlhohonolofatso ho ba li utloang. Kaha hona ho joalo, banyalani le malapa ba ne ba tla etsa hantle hore bonyane letsatsi le leng le le leng ba be le thapelo e kopanetsoeng. Ho eona, motho a le mong, ea kang hlooho ea lelapa, o tla buella ba bang kapa bohle.
21. Hore lithapelo tsa rōna li tle li be le moelelo, ke taba efe e ’ngoe e hlokang ho hlahlobjoa?
21 Bakeng sa hore lithapelo tsa rōna li be le moelelo e le kannete, ho sa boetse ho e-na le taba e ’ngoe eo ho hlokahalang re e hlokomele. Ena ke ntlha ea hore re tlameha ho tsitsa mabapi le lithapelo tsa rōna, hona ho bolela eng? Hore re phele tumellanong le lithapelo tsa rōna ’me re sebeletse seo re se rapellang. Ntlha ena ea lithapelo tsa rōna e tla hlahlobjoa sehloohong se hlahlamang.
U Arabela Joang?
◻ Lithapelo tse ling tse nang le moelelo tse tlalehiloeng ka Mangolong ke life?
◻ Ka lebaka la ho se phethahale ha botho, lithapelo tsa rōna li ka ’na tsa e-ba le mefokolo joang?
◻ Re ka hlōla mefokolo e meng joang lithapelong tsa rōna?
◻ Tse ling tsa lithuso ha re etsa lithapelo tse nang le moelelo ke life?