Jesu Bophelo le Tšebeletso tsa Hae

Ho Ja Le Mofarisi

HOBA Jesu a arabe basomi ba belaelang mohloli oa matla a hae a ho phekola motho ea sa tsebeng ho bua, Mofarisi e mong o mo memela lijong. Pele ba e-ja, Bafarisi ba tšoareha ka moetlo oa bona oa ho hlapa matsoho ho fihla litsoeng. Ba etsa sena pele le kamor’a lijo esita le pakeng tsa linako tsa lijo. Le hoja moetlo oo o sa loantšane le molao o ngotsoeng oa Molimo, o feteletsa seo Molimo o se hlokang tabeng ea ho boloka ka thata neano ea bohloeki.

Ha Jesu a hlōleha ho boloka neano, ea mo memmeng oa makala. Le hoja ho makala ha hae ho ka ’na ha se hlalosoe ka mantsoe, Jesu oa ho hlokomela ’me o re: “Lōna bafarisi, le hlatsoa sejana le mokeke kantle, kanthe ka hare ho Iōna ho tletse bosholu le lonya. Maoatla ting! ea entseng bokantle, na ha a ka a etsa le bokahare na?”

Jesu o hlahatsa joalo boikaketsi ba Bafarisi ba tlangoang ke moetlo ho hlatsoa matsoho a bona empa ba hlōleha ho hlatsoa bokhopo lipelong tsa bona. Oa eletsa: “Le mpe le fane ka lintho tsa Iōna, ’me lintho kaofela li tla hloeka ho Iōna.” Ho fana ha bona ho lokela ho susumetsoa ke pelo e ratang, e seng ke takatso ea ho khahlisa ba bang ka ho ikhakanya joaloka ha eka ba lokile.

Jesu o tsoelapele: “Ho malimabe Iōna, bafarisi, hobane le ntša karolo ea leshome ea koena, le ea serue, le ea meroho eohle, ’me le feta ho loka le lerato la Molimo. Anthe le ne le tšoanetse ho etsa ntho tsena, le ntse le sa tlohele ho etsa tseno.” Molao oa Molimo ho Iseraele o hloka hore ba lefe lekhetho, kapa karolo ea leshome, ea se hlahisoang ke masimo. Koena le serue ke limela tse nyenyane kapa litlama tse sebelisoang ho fa lijo tatso. Bafarisi ba lefa ka hloko esita le karolo ea leshome ea litlama tsena tse se nang thuso, empa Jesu o ba nyatsa bakeng sa ho hlokomoloha tlhokahalo ea bohlokoa haholoanyane ea ho bontša lerato, ho etsa ka mosa, le ho ba bonolo.

Ha a tsoelapele ho ba nyatsa, Jesu o re: “Ho malimabe Iōna, bafarisi, hobane le rata litulo tse kapele masynagogeng, le ho lumelisoa mapatlelong. Ho malimabe Iōna, . . . hobane le joale ka mabitla a sa bonahaleng, ao batho ba a hatang ba sa tsebe.” Ho se hloeke ha bona ha hoa totobala. Bolumeli ba Bafarisi bo na le ponahalo ea kantle empa kahare ha bo na thuso! Bo theiloe boikaketsing.

Ha a mametse nyatso e joalo, ’muelli e mong oa molao, e mong oa ba rutehileng Molaong oa Molimo, oa ipelaetsa: “Moruti, ha u bua joalo, ua re omanya le rōna.”

Jesu o nka litsebi tsena tsa Molao le tsona li ikarabella, a re: “Ho malimabe le Iōna, baruti ba molao; hobane le jarisa batho liphahlo tse ba imelang, ’me Iōna, le hana ho ama liphahlo tseo leha e le ka o mong oa menoana ea Iōna. Ho malimabe lōna, hobane le haha mabitla a baprofeta ba bolailoeng ke bo-ntat’a lōna.”

Liphahlo tseo Jesu a buang ka tsona ke lineano tse boleloang ka molomo, empa baruti bana ba molao ba ne ba ke ke ba felisa le o mong oa melaoana e menyenyane ho nolofaletsa batho. Jesu o senola hore ba bile ba lumela le polaong ea baprofeta, ’me oa lemosa: “Mali a baprofeta bohle a tšolotsoeng, ha e sa le lefatše le theoa, a batloe ho moloko ona, ho qala ka mali a Abele, ho qetella ka mali a Zakaria, ea bolailoeng mahareng a aletare le tempele. E, ke rialo ho lōna, ke re: A tla batloa ho moloko ona.”

Lefatše la batho ba ka lopolloang le qalile ka ho tsoaloa ha bana ba Adama le Eva; ka hona, Abele o phetse nakong ea ha “lefatše le theoa.” Kamorao ho polao e sehlōhō ea Zakaria, lebotho la Syria le ile la siea Juda e le lesupi. Empa Jesu o bolela e sa le pele ho siuoa lesupi ho hobe ka ho fetisisa ha moloko oa habo ka baka la bokhopo bo boholoanyane ba oona. Ho siuoa lesupi hona ho etsahetse ho e ka bang lilemo tse 38 hamorao, ka 70 C.E.

Ha a tsoelapele ho ba nyatsa, Jesu o re: “Ho malimabe lōna, baruti ba molao, hobane le nkile senotlolo sa tsebo; ka sebele sa Iōna, ha lea ka la kena; hape, le thibetse le ba kenang.” Ke mosebetsi o tlamang litsebi tsa Molao ho hlalosetsa batho Lentsoe la Molimo, ho notlolla bohlokoa ba lona. Empa ba hlōloa ho etsa sena ’me hape ba amoha batho monyetla oa kutloisiso.

Bafarisi le litsebi tsa molao ba halefela Jesu ka ho ba hlahatsa. Ha a tloha ntlong eo, ba qala ho mo hanyetsa ka matla le ho mo hlasela ka lipotso. Ba leka ho mo tšoasa ka hore a bue ho hong ho tla etsa hore ba etse hore a tšoaroe. Luka 11:37-54; Deuteronoma 14:22; Mikea 6:8; 2 Likronike 24:20-25.

◆ Ke hobane’ng ha Jesu a ile a nyatsa Bafarisi le litsebi tsa Molao?

◆ Ke liphahlo life tseo babuelli ba molao ba li jarisang batho?

◆ ‘Lefatše ha le theoa’ ke ne’ng?