Na Maria o Shoele Lefu la Tlhaho?

HO LATELA koranta ea Vatican ea L’Osservatore Romano, thuto ea K’hatholike ea Nyolohelo e re: “Moroetsana ea se Nang Sekoli, ea bolokiloeng a se na letheba le le lenyenyane la sebe sa tlhaho, o ile a nkeloa khanyeng ea leholimo ka ’mele le ka moea ha bophelo ba hae ba lefatšeng bo fela.” Koranta eo e bolela hore thuto ena e entse hore baruti ba bangata ba thuto ea bolumeli ea K’hatholike ba bolele hore Maria “ha aa ka a shoa empa ka ho panya ha leihlo, o ile a phahamisoa ho tloha bophelong ba lefatšeng ho ea khanyeng ea leholimo.”a

Haufinyane tjena, Mopapa John Paul II o ile a fana ka kutloisiso e fapaneng tabeng ena. Ka la 25 June, 1997, ha a bua le Bamameli ka Kakaretso Vatican, o itse: “Testamente e Ncha ha e fane ka boitsebiso tabeng ea lefu la Maria. Ho se bue letho hona ho etsa hore motho a nahane hore le etsahetse ka mokhoa oa tlhaho, ho se na ketsahalo e khethehileng e neng e lokela ho boleloa. . . . Ho bonahala maikutlo a lakatsang ho mo arola ho ba shoeleng lefu la tlhaho a se na motheo.”

Polelo eo ea Mopapa John Paul e pepesa bofokoli bo boholo ba thuto ea Kemolo e se Nang Sekoli. Haeba ’mè oa Jesu o ne a “bolokiloe a se na letheba leha e le lefe la sebe sa tlhaho,” ke joang Maria a neng a ka shoa ‘lefu la tlhaho’ le bakiloeng ke sebe se jetsoeng ke Adama oa moetsalibe? (Baroma 5:12) Qaka ena ea thuto ea bolumeli e bakoa ke khopolo e khopameng ea Kereke e K’hatholike mabapi le ’mè oa Jesu. Ha ho makatse hore ebe ho tsohile karohano le pherekano Kerekeng e K’hatholike malebana le taba ena.

Le hoja Bibele e hlalosa Maria e le ea ikokobetsang, ea tšepahalang le ea inehetseng, ha e lebise litšoaneleho tsena ho “emoloeng ho se nang sekoli.” (Luka 1:38; Liketso 1:13, 14) Bibele e re feela: “Bohle ba entse sebe ’me ba haelloa ke khanya ea Molimo.” (Baroma 3:23) E, Maria o futsitse sebe le ho se phethahale joalokaha batho bohle ba se futsitse, ’me ha ho na bopaki bo teng ba hore o ile a shoa ka mokhoa o mong oo e seng oa tlhaho.—Bapisa le 1 Johanne 1:8-10.

[Mongolo o botlaaseng ba leqephe]