Bibele e Ncha ka Segerike sa Kajeno

LA 23 August, 1997, e bile letsatsi le khethehileng ho ba neng ba bokane Kopanong ea Setereke ea “Tumelo Lentsoeng la Molimo,” Greece. Qetellong ea lenaneo la motšehare oa mantsiboea, ho ile ha lokolloa Bibele e ncha—New World Translation of the Holy Scriptures ka Segerike sa kajeno. Hang-hang letšoele le hloletsoeng le ile la qala ho ntša meokho ea thabo le ho opa mahofi ka nako e telele!

Ho tloha ka 1905, Lipaki tsa Jehova li ’nile tsa sebelisa phetolelo ea Bibele ea lekholong la bo19 la lilemo e neng e fetoletsoe ke moruti oa Greek Orthodox. Bibele ena e ile ea li tsoela molemo o moholo ka lilemo tse ngata. Leha ho le joalo, e ne e se e le nako e itseng Lipaki tsa Jehova li e-na le boikutlo ba hore li hloka phetolelo ea Bibele e nepahetseng haholoanyane le e utloisisehang habonolo. Ka 1993, li ile tsa thabela ho fumana khatiso ea Segerike ea Phetolelo ea Lefatše le Lecha ea Mangolo a Segerike a Bakreste. Leha ho le joalo, joale li ile tsa thaba thabo e khaphatsehang ha li fumana Bibele e feletseng ka Segerike sa kajeno.

Paki e ’ngoe e ananelang e bitsitse New World Translation “thoko, moea o pholileng o jereng lentsoe la Jehova, eo ka lekhetlo la pele, re ka e utloisisang ka ho hlaka ka puo ea rōna.” Ba bang ba ile ba qala ho bala Libibele tsa bona tse ncha hang feela ha ba fihla malapeng. Motho e mong ea thabileng ea neng a le teng kopanong o ile a bala Bibele ea hae a sa khaotse ho fihlela ka hora ea pele hoseng, ha a qetile ho bala buka eohle ea Jobo!

New World Translation of the Holy Scriptures ka Segerike e tsoile ka mor’a lilemo tse ka bang supa tsa mosebetsi o hlokolosi le o boima. Lengolo le leng le amohetsoeng le itse: “U ka kholiseha hore New World Translation e tla re tsoela molemo o moholo ho thuseng batho ba tšepahalang ho ithuta ka Jehova.”