“Lesela Lee le Pherese le Nang le Likhutlo Tse Tharo ke la Eng?”
“MOHLANKA e mong oa ’muso ea sebetsang lekaleng la toka la Seoul, Rephabliking ea Korea o ile a ngola a re: “Matsatsing a seng makae a fetileng, ke ile ka fumana koranta ea Molula-Qhooa ho e mong oa Lipaki Tsa Jehova. Ha ke e bala, ke ile ka ithuta lintlha tse itseng ka ho hlorisoa ha Lipaki Tsa Jehova pusong ea Manazi le ea Makomonisi. Empa ke na le potso. Setšoantšong se leqepheng le ka ntle ho bonahala Lipaki Tsa Jehova li e-na le lesela le thulamisitsoeng le nang le likhutlo tse tharo le pherese ka letsohong le letšehali la liaparo tsa tsona. Lesela lee le pherese le nang le likhutlo tse tharo ke la eng?”
Nakong ea puso ea Manazi Jeremane, Lipaki Tsa Jehova li ile tsa hana ho lumelisa ka tumeliso ea Hitler, ’me li ile tsa lula li sa jele paate litsekong tsa lipolotiki le tsa sesole. Kahoo, Manazi a ile a li hlorisa ka sehlōhō, a hlahlela Lipaki tse ka bang 12- 000 lichankaneng le likampong tsa mahloriso ka linako tse sa tšoaneng. Lipaki tse ka bang 2 000 li ile tsa shoa, ’me tse makholo tsa bolaoa.
Lesela le pherese le likhutlo li tharo e ne e le pontšo ea eng? Buka e bitsoang Anatomy of the SS State, e re: “Lihlopha tse fapa-fapaneng tsa batšoaruoa ba likampo [tsa Manazi] li ne li e-na le matšoao a itseng a li khethollang. Mokhoa oa ho khetholla [batšoaruoa] o ileng oa sebelisoa pele ho ntoa o ne o akarelletsa ho rokella sekotoana sa lesela le nang le likhutlo tse tharo junifomong ea motšoaruoa e mong le e mong, ’mala oa lona o ne o itšetleha ka sehlopha sa habo: la batšoaruoa ba lipolotiki, le ne le le lefubelu, la Lipaki Tsa Jehova, le le pherese, la ba khahlanong le bokomonisi, le le letšo, la batlōli ba molao, le le letala, la basodoma, le le lepinki, la bajaki, le le leputsoa. Ntle ho lesela la ’mala le likhutlo li tharo, batšoaruoa ba Bajuda bona ba ne ba qhoaela lesela le likhutlo li tharo le lesehla le rokeletsoeng leseleng lane la ’mala le nang le likhutlo tse tharo e le hore masela ana a etse [letšoao la] Naleli ea Davida e nang le likhutlo tse tšeletseng.”
Moprofesa John K. Roth o ile a ngola bukeng ea hae e bitsoang Holocaust Politics, a re: “Haeba nakong e tlang ho tla hopoloa bohlokoa ba lona, lesela lena le pherese le nang le likhutlo tse tharo e sa ntse e ka ba thebe likoluoeng, thebe eo likhutlo tsa eona tse tharo li tla re hlokomelisa le ho re hopotsa boikarabelo ba rōna mabapi le boitšoaro bo botle boo batho ba lokelang ho bo hlompha haholo.” Lipaki Tsa Jehova li entse video e ikhapetseng moputso e bitsoang Jehovah’s Witnesses Stand Firm Against Nazi Assault. Ke hobane’ng ha u sa kōpe e mong oa Lipaki Tsa Jehova hore a u etsetse litokisetso tsa ho bona video ee?