Kamoo Bana ba ka Rutoang ka Molimo—Ke Mekhoa Efe e Atlehang?

“Mantsoe ana ao ke u laelang ’ona kajeno a be pelong ea hao; u a rute mora oa hao ka ho pheta-pheta ’me u bue ka ’ona ha u lutse ka tlung ea hao le ha u tsamaea tseleng le ha u robetse le ha u tsoha.”—DEUTERONOMA 6:6, 7.

KA LINAKO tse ling batsoali ba ka ’na ba nka mosebetsi oa ho rupela bana e le boikarabelo bo boima haholo. Ho ntse ho le joalo, ha ba batla keletso ba ka ’na ba ferekanngoa le ho feta ke litlhahiso tse ngata tse sa tšoaneng tseo ba li utloang kapa ba li balang. Hangata beng ka bona le metsoalle ba potlakela ho fana ka likeletso. Libuka, limakasine le Inthanete le tsona li fa batsoali letoto la likeletso tseo ka linako tse ling le tsona li hanyetsanang.

Ka lehlakoreng le leng, Bibele eona e fa batsoali keletso eo ba ka e tšepang ea hore na ba rute bana ba bona eng haesita le hore na ba ba rute joang ka tsela e atlehang. Joalokaha litemana tsa Bibele tse ka holimo li bontša, letsatsi le letsatsi batsoali ba lokela ho fumana mekhoa e itseng ea ho buisana le bana ba bona ka Molimo. Mona ka tlaase, ho fanoe ka litlhahiso tse ’nè feela tse thehiloeng Bibeleng tse seng li thusitse batsoali ba likete-kete tabeng ea ho ruta bana ba bona ka Molimo.

1. Ba thuse hore ba ithute linthong tsa tlhaho. Moapostola Pauluse o ile a ngola, a re: “Litšobotsi tsa [Molimo] tse sa bonahaleng li bonoa ka ho hlaka ho tloha pōpong ea lefatše ho ea pele, hobane li lemohuoa ka lintho tse entsoeng, esita le matla le Bomolimo ba hae ba ka ho sa feleng.” (Baroma 1:20) Batsoali ba ka thusa bana haholo hore ba nke Molimo e le oa sebele ho bona ka ho ba ruta ka mesebetsi ea Molimo ea pōpo ’me ba ba thuse ho lemoha hore na pōpo eo e bonahatsa litšobotsi life tsa Molimo.

Jesu o ile a sebelisa mokhoa ona ha a ne a ruta barutuoa ba hae. Ka mohlala, o ile a re: “Talimang linonyana tsa leholimo ka hloko, hobane ha li jale peō leha e le ho kotula kapa ho bokellela matlong a polokelo; ho ntse ho le joalo Ntat’a lōna oa leholimo oa li fepa. Na ha le ba bohlokoa ho li feta?” (Matheu 6:26) Mona Jesu o ne a totobatsa litšobotsi tsa Jehova, e leng lerato le kutloelo-bohloko. Empa o ile a etsa ho fetang hoo. O ile a thusa barutuoa ba hae hore ba utloisise hore na Molimo o bonahalitse litšobotsi tseo joang molemong oa bana ba hae.

Morena Solomone ea bohlale o ile a bua ka bohlale ba tlhaho boo Molimo a bo fileng bohloa ’me a sebelisa libōpuoanyana tsena e le ho hatisa thuto ea bohlokoa. O ile a re: “E-ea ho bohloa, uena ea botsoa; bona litsela tsa bona ’me u hlalefe. Le hoja bo se na molaoli, motsamaisi kapa ’musi, bo lokisa lijo tsa bona lehlabula; bo bokeletse phepelo ea bona ea lijo ha ho kotuloa.” (Liproverbia 6:6-8) Oo e bile mokhoa o matla hakaakang oa ho re ruta ho ipehela lipakane tsa bohlokoa ebe re sebelisa matla ao Molimo a re fang ’ona ho li finyella!

Batsoali ba ka etsisa mekhoa ena e atlehang ea ho ruta eo Jesu le Solomone ba ileng ba e sebelisa ka ho etsa sena: (1) Ba botse bana ba bona hore na ba rata limela le liphoofolo life. (2) Ba ithute ho eketsehileng ka limela le liphoofolo tseo. (3) Ba ba thuse hore na ba ka ithuta eng ka Molimo linthong tseo tsa tlhaho.

2. E-ba le boikutlo boo Jesu a neng a e-na le bona bathong bao a neng a ba ruta. Bathong bohle ba kileng ba phela, Jesu o ne a e-na le lintho tse ngata tsa bohlokoa ka ho fetisisa tseo a neng a ka li ruta. Empa, nako e ngata o ne a lula a botsa lipotso. O ne a thahasella haholo tsela eo batho bao a neng a ba ruta ba neng ba nahana ka eona le eo ba neng ba ikutloa ka eona. (Matheu 17:24, 25; Mareka 8:27-29) Ka tsela e tšoanang, ho na le lithuto tse ngata tsa bohlokoa tseo batsoali ba ka li rutang bana ba bona. Leha ho le joalo, e le hore ba atlehe, ba lokela ho etsisa Jesu ’me ba khothalletse bana hore ba itlhalose ka bolokolohi hore na ba ikutloa joang.

Joale ho thoe’ng haeba bana ba e-na le boikutlo bo bobe kapa ba lieha ho tšoara lithuto tse ling tsa bohlokoa? Ak’u hlokomele tsela eo Jesu a ileng a sebelisana le barutuoa ba hae ka eona. Ka linako tse ling barutuoa ba ne ba ngangisana haholo ’me seo se ile sa etsa hore ba liehe ho ithuta melemo ea ho ikokobetsa. Leha ho le joalo, Jesu o ne a sa ba felle pelo ’me a lula a bua le bona kamoo ho ikokobetsa e leng habohlokoa kateng. (Mareka 9:33, 34; Luka 9:46-48; 22:24, 25) Haeba batsoali ba etsisa Jesu ba tla tataisa bana ba bona ka mamello ’me haeba ho hlokahala, ba tla lula ba pheta-pheta thuto e le ’ngoe ho fihlela e thopothela likelellong tsa bona.a

3. Ba rute ka ho beha mohlala. Batsoali ba etsa hantle haeba ba mamela keletso eo moapostola Pauluse a ileng a e fa Bakreste ba neng ba lula Roma. O ile a re ho bona: “Leha ho le joalo, na uena ea rutang e mong, ha u ithute? Uena ea bolelang hore ‘U se ke ua utsoa,’ na ua utsoa?”—Baroma 2:21.

Keletso eo ke eona hantle e loketseng kaha se lulang likelellong tsa bana haholo ke seo batsoali ba bona ba se etsang ho feta seo ba se buang. Ha e le hantle, haeba batsoali ba phetha seo ba se rutang bana, hangata ho ba bonolo hore bana ba bona ba ba utloe.

4. Qalella ba sa le banyenyane. Moromuoa-’moho le moapostola Pauluse, e leng Timothea, o ne a e-na le botumo bo botle har’a batho ba habo. (Liketso 16:1, 2) Lebaka le leng ke hore o ne a ile a rutoa “lingoliloeng tse halalelang” “ho tloha boseeng.” ’Mè oa Timothea hammoho le nkhono oa hae, ba ne ba sa mo balle Mangolo feela empa hape ba ne ba mo thusa hore a khone ho utloisisa linnete tseo tse ngotsoeng Mangolong.—2 Timothea 1:5; 3:14, 15.

Moo U ka Fumanang Thuso Teng

Lipaki Tsa Jehova li hlahisa lingoliloeng tse ngata tseo ka ho khetheha li thusang batsoali hore ba rute bana ba bona ’nete ka Molimo. Tse ling tsa tsona li ngoletsoe ho thusa bana ba banyenyane. Tse ling tsona li ka thusa batsoali le bana ba bona ba lilemong tsa bocha hore ba lule ba buisana ka bolokolohi.b

Ha e le hantle, pele batsoali ba ka ruta bana ba bona ka Molimo, ba lokela ho tseba likarabo tsa lipotso tse ling tse thata tseo bana ba ka li botsang. Ka mohlala, u ne u tla araba lipotso tsee tse latelang joang: Ke hobane’ng ha Molimo a lumeletse mahlomola? Morero oa Molimo ke ofe ka lefatše? Bafu ba hokae? Lipaki Tsa Jehova li ka u thusa hore u fumane likarabo tsa lipotso tseo hammoho le tse ling tse kang tseo e le hore uena le ba lelapa la hao le ka atamela haufi le Molimo.—Jakobo 4:8.

[Mongolo o botlaaseng ba leqephe]