LIPOTSO TSA BIBELE LIA ARAJOA

Ke hobane’ng ha re lokela ho rapela?

Jehova Molimo o batla hore re ikutloe re lokolohile hore re ka bua le eena nako e ’ngoe le e ’ngoe ka lintho tse re tšoenyang. (Luka 18:1-7) Oa re mamela hobane oa re thahasella. Kaha ka mosa Ntate oa rōna oa leholimo o re mema hore re rapele, ke hobane’ng ha re lokela ho amohela memo ea hae?—Bala Bafilipi 4:6.

Thapelo hase feela tsela ea ho kōpa thuso. Empa e re thusa hore re atamele haufi le Molimo. (Pesaleme ea 8:3, 4) Ha re tšollela lipelo tsa rōna ho Molimo kamehla, re theha setsoalle se tiileng le eena.—Bala Jakobo 4:8.

Re lokela ho rapela joang?

Ha re rapela, Molimo ha a batle hore re sebelise mantsoe a mponeng kapa re pheta-phete lithapelo tse ka hloohong. Hape ha rea lokela ho ema ka tsela e itseng feela. Jehova o re mema hore re mo rapele ho tsoa pelong. (Matheu 6:7) Ka mohlala, Iseraeleng ea boholo-holo, Anna o ile a rapella mathata a lelapa la hae a neng a mo imetse. Hamorao, ha mesarelo e fetoha thabo, o ile a leboha Molimo ka thapelo e tsoang botebong ba pelo.—Bala 1 Samuele 1:10, 12, 13, 26, 27; 2:1.

Re na le tokelo e babatsehang hakaakang! Re ka bolella ’Mōpi mathata a rōna. Hape re ka mo rorisa ra ba ra mo leboha ka lintho tseo a re etselitseng tsona. Ha ho tika-tiko hore ha rea lokela ho hlokomoloha tokelo ena e babatsehang.—Bala Pesaleme ea 145:14-16.