Ho Bonahatsa Lerato Kopanong ea “Thuto ea Bomolimo”

¹ Baena ba 99 ba tsoang Afrika Boroa ba bileng teng kopanong ea machaba e khethehileng Kiev, Ukraine, ba khutlile le litlaleho tse thabisang tsa kopano eo e ikhethang. Ho bile le kakaretso ea ba 7 402 ba kolobelitsoeng e leng palo e khōlō ka ho fetisisa, e fetang le ea ba kolobelitsoeng kopanong ea lefatše e neng e tšoaretsoe New York ka 1958. Baemeli ba ile ba fumana lerato le mofuthu le bontšitsoeng ke baena ba Ukraine le Russia e le le ikhethang. Le hoja puo e ne e le tšitiso ea sebele, baena ba tsoang likarolong tsa lebala la lipapali tsa ba buang Seukraine le Serussia ba ile ba etela baemeli ba tsoang linaheng tse ling likarolong tsa lebala la lipapali tseo ba lutseng ho tsona pele ho mananeo, pakeng tsa ’ona, le ka mor’a ’ona. Ba ile ba arolelana liphihlelo, ba inka litšoantšo le baemeli ba etileng, ’me ba fapanyetsana limpho tse nyenyane e le khopotso. Ke lerato la boena le lekaakang leo ba ileng ba le bontša!

² Sena se lokela ho etsa hore re tebise maikutlo. Re tla ba le baemeli ba bangata ba tsoang lefatšeng ka bophara likopanong tsa rōna tsa machaba tse khethehileng tse tlang ho tšoareloa Cape Town, Durban, Johannesburg, le Pretoria. Na re tla ba bontša lerato le mofuthu le botsoalle bo tšoanang?

³ Hape ka lilemo tse ngata joale re ’nile ra ba le tokoloho, naheng ena, ea ho thabela likopano tsa setereke tsa merabe le lipuo tse ngata. Re ’nile ra thabela ho ba ’moho, e mong le e mong a thabela ho mamela lenaneo holong kapa karolong ea lebala la lipapali eo ho eona ho buuoang puo ea habo. Joale pakeng tsa mananeo, re ’nile ra thabela lijonyana tse hlapholang ’moho ho kopanyeletsa le botsoalle bo fokolang. Empa haholo-holo re ne re lula ka holong kapa karolong ea lebala la lipapali eo ho eona ho buuoang puo ea rōna. Re ne re sa etse letho bakeng sa ho etela baena ba rōna ba buang puo e fapaneng kapa ba semelo se fapaneng sa morabe. Lihlopha tse sa tšoaneng tsa morabe le lipuo li ’nile tsa lula ’moho likarolong tsa tsona. Ka hona ka linako tse ling re ne re fetana mohoalotso feela likopanong tsena tsa Bokreste. Na re ka ntlafatsa ho see Kopanong ea “Thuto ea Bomolimo” selemong see?

⁴ Re tla ba le menyetla e metle hakaakang kopanong ea rōna, haholo-holo likopanong tse ’nè tsa machaba, ea ho pakela lefatše hore kannete re barutuoa ba Kreste ka lerato leo re nang le lona har’a rōna. (Joh. 13:35) Nakong ea hona joale Afrika Boroa, ho na le lehloeo le leholo pakeng tsa meloko le lihlopha tsa morabe tse fapaneng. Kahoo re na le monyetla o motle kopanong ea rōna oa ho paka hore re fapane, hore ha re karolo ea lefatše.—Joh. 17:16.

⁵ Likopano tsena tsa selemo le selemo ke menyetla ea hore re tsebane hamolemo. Ipotse, ‘Haeba ke moena ea buang Sezulu, ke tseba baena ba ka ba buang Senyesemane kapa Seafrikaanse hamolemo hakae? Haeba ke moena ea buang Senyesemane, ke tseba baena ba ka ba buang Sexhosa, Sesotho, kapa Sepedi hamolemo hakae?’ Empa u ka ’na ua re, ‘Ha ke tsebe puo ea bona. Nka thabela botsoalle joang le bona?’ Baena ba bangata Afrika Boroa bonyane ba tseba mantsoe a seng makae a Senyesemane, empa baena ba bangata ba Russia le Ukraine ba ne ba sa tsebe Senyesemane ho hang. Ho ile ha hlokahala hore ba kōpe ba seng bakae ba tsebang Senyesemane se fokolang hore ba ba tolokele moqoqo. E bile ho makatsang ho bona baemeli ba rōna ba buisana le baena ba moo ho sa tsotellehe tšitiso ea puo, haholo-holo ba sebelisa boitšisinyo ba ’mele.

⁶ Baena ba Russia le Ukraine, ba neng ba arohantsoe le baena ba bona ba Bakreste ka lilemo tse ngata, ba ne ba batla feela ho ba le baena ba bona ba tsoang linaheng tse ling e le ho thabela ho khothatsana. Ho hang ha baa ka ba etela baena ba bona bakeng sa ho batla liphallelo, le hoja ba bangata ho bona ba ne ba fumanehile linthong tse bonahalang. Takatso ea bona bakeng sa botsoalle ba moea ke eona e entseng hore kopano ea Kiev e be phihlelo e ke keng ea lebaloa ke ba bileng le tokelo ea ho ba ho eona. Na e mong le e mong oa rōna a ka ipehela pakane ea ho tseba bonyane lelapa le le leng kapa motho a le mong oa puo kapa morabe o mong kopanong selemong see? Ntho e ’ngoe eo ka sebele e ileng ea thusa ho qalisa moqoqo ke hore e mong le e mong o ne a qhoaetse beche. Ka hona re khothaletsa e mong le e mong ho tiisa hore o qhoaela beche ea hae ha a e-ea kopanong.

⁷ Thuto e ’ngoe e ka ithutoang ho bona ke kananelo e tebileng eo ba e bontšitseng bakeng sa lintho tsa moea. Ba ile ba bina ho tsoa lipelong hoo ho bina ha bona ho ileng ha utloahala lebaleng leo la lipapali kaofela. ’Me baena bao ba ile ba thabela haholo tokelo ea ho bina lipina tsa ’Muso phatlalatsa, hoo ba ileng ba etsa litlatse ka mor’a pina ka ’ngoe. Ba bile ba etsa litlatse ka mor’a thapelo e ’ngoe le e ’ngoe e le ho bontša kananelo ea bona! ’Me litlatse tsa bona e ne e se tse monyebe; e ne e le tsa nako e telele. Na re ka bontša kananelo e khōloanyane likopanong tsa rōna bofelong ba selemo? Joang? Tabeng ea pele, ka ho bina lipina tsa rōna tse monate ka lentsoe le phahameng le le hlakileng thorisong ea Molimo oa rōna, Jehova. Lipina tsohle tseo re tla li bina li thathamisitsoe kenyeletsong ea Tšebeletso ea Rōna ea ’Muso ea October. Iphe nako ea ho itloaetsa tsona e le hore re ka bina ho tsoa lipelong kopanong.

⁸ Hape re ka bontša kananelo ea rōna joang? Ka ho lula litulong tsa rōna le ho mamela lipuo ka hloko nakong ea mananeo ’ohle. Baemeli ba tsoang linaheng lisele ba bileng teng kopanong Kiev ba ile ba kōptjoa ho lula litulong tsa bona lenaneong lohle, le hoja boholo ba lona le ile la fanoa ka Serussia kapa Seukraine. Ke lipuo tse seng kae feela tsa litho tsa Sehlopha se Busang le litumeliso tse tsoang makaleng a mang tse bileng ka Senyesemane. Ba ile ba lula litulong tsa bona le hoja ba ne ba le lebaleng la lipapali le sa sireletsoang letsatsing le bataolang, ka hona ba behile mohlala o motle. Na le rōna re ka etsa boikemisetso bo tiileng ba ho lula litulong tsa rōna le malapa a rōna nakong ea mananeo? Jehova o re lokiselitse lenaneo le letle haholo ka mokhatlo oa hae o hlophisitsoeng. Re ke ke ra batla ho fetoa ke karolo leha e le efe ea lona.