Tlhaselo ea Bapalami ba Lipere e U Amang
1 “Lengeloi la botšelela la letsa terompeta ea lona.” Ka mor’a moo, “mabotho a bapalami ba lipere” a “limiriade tse peli tsa limiriade” a ea pele ka molumo o moholo. Lena hase lebotho la sesole le tloaelehileng. “Lihlooho tsa lipere [li] joaloka lihlooho tsa litau.” Melomong ea tsona ho tsoa mollo, mosi le sebabole, ’me “mehatla ea tsona e joaloka linoha.” Tlhaselo ena ea tšoantšetso ea bapalami ba lipere e baka tšenyo. (Tšen. 9:13-19) Na ua tseba hore u ameha joang phethahatsong ea pono ee ea boprofeta e hlollang?
2 Masala a batlotsuoa le metsoalle ea ’ona ea linku tse ling, a phatlalatsa likahlolo tsa Molimo a kopane. Sena se fella ka hore ho pepesoe boemo ba Bokreste-’mōtoana ba ho shoa moeeng. A re hlahlobeng likarolo tse peli tsa pono ena ea boprofeta tse totobatsang lebaka leo ka lona tšebeletso ea bahlanka ba Molimo e atlehang hakana.
3 Ba Koetlisitsoe le ho Hlomelloa Hore ba Phatlalatse Molaetsa oa Molimo: Ka thuso ea Sekolo sa Tšebeletso sa Puso ea Molimo le liboka tse ling tsa phutheho, basebeletsi ba Molimo ba koetliselitsoe ho bolela molaetsa oa Molimo ka kholiseho. Ba etsisa Jesu le barutuoa ba hae ka ho batla ba tšoanelehang, ba bolela hohle moo batho ba ka fumanehang. (Mat. 10:11; Mar. 1:16; Luka 4:15; Lik. 20:18-20) Mokhoa ona oa ho bolela litaba tse molemo o thehiloeng Bibeleng o bonahetse o atleha hakaakang!
4 Basebeletsi ba Bakreste ba abile Libibele, libuka, libukana le limakasine tse libilione ha ba etsa mosebetsi oa ho bolela o laetsoeng ke Molimo. Lingoliloeng tsena li ngotsoe ka lipuo tse ka bang 400, ’me li bua ka litaba tse sa tšoaneng li bile li sebelisa mekhoa e sa tšoaneng e ipiletsang ho batho ba mefuta e fapaneng. Na u sebelisa lithulusi tsee ka katleho?
5 Tataiso le Tšehetso ea Leholimo: Pono ea boprofeta e boetse e hlakisa hore Molimo o tšehetsa mosebetsi o emeloang ke tlhaselo ea bapalami ba lipere ba tšoantšetso. (Tšen. 9:13-15) Mosebetsi oa ho bolela lefatšeng lohle ha o finyelloe ka bohlale kapa matla a motho, empa o finyelloa ka moea oa Molimo. (Zak. 4:6) Jehova o sebelisa mangeloi ho tsamaisa mosebetsi ona. (Tšen. 14:6) Kahoo, ho phaella boitekong ba Lipaki tsa hae, Jehova o fana ka tšehetso ea leholimo ho hulela ba bonolo ho eena.—Joh. 6:45, 65.
6 Kaha batho ba Jehova ba rupetsoe ebile ba hlomeletsoe hamolemo bakeng sa ho phatlalatsa molaetsa oa Molimo ’me ba tataisoa ke mangeloi, ba ke ke ba thibeloa ke letho. A re tsoeleng pele ho phetha karolo ea rōna phethahatsong ea pono ena ea boprofeta e hlollang.
[Lipotso Tsa Sehlooho se Ithutoang]
1, 2. Bahlanka ba Molimo ba kajeno ba ameha joang phethahatsong ea pono ea boprofeta e tlalehiloeng ho Tšenolo 9:13-19?
3. U fumane koetliso efe e le hore u phatlalatse molaetsa oa Molimo ka katleho?
4. Ke lithulusi life tseo bahoeletsi ba bangata ba nang le tsona tse ba nolofalletsang ho etsa mosebetsi oa bona?
5, 6. Ke’ng e bontšang hore Jehova o tšehetsa batho ba hae?