Lintlha-khōlō Tsa Tšebeletso ea Tšimo

Mosebetsi oa boboleli o hatela pele hantle Lesotho. Ho tloha ka September 2012, ho kolobelitsoe barutuoa ba bacha ba 126. Ka December bahoeletsi ba 3 900 ba ile ba tlaleha tšebeletso ea bona ea tšimo, e leng se bontšang keketseho ea 7 lekholong ka holimo ho palo ea selemo se fetileng. Ba ile ba khanna lithuto tsa Bibele tse 6 347, e leng se bontšang hore masimo a loketse ho kotuloa. Re thaba hammoho le barab’abo rōna ba Lesotho ka lebaka la batho ba bangata ba tšepahalang ba phallelang thabeng ea Jehova ea borapeli ba ’nete.—Esa. 2:1-4.