Ke Motho oa Mofuta Ofe Mahlong a Jehova?
1. Bibele e tšoana le seipone joang?
1 U icheba ka seiponeng hangata hakae? Bongata ba rōna re icheba letsatsi le leng le le leng hobane se re thusa ho bona lintho tse hlokang ho lokisoa. Bibele e ’nile ea tšoantšoa le seipone. Ho bala Lentsoe la Molimo ho re nolofalletsa ho bona seo re hlileng re leng sona, e leng seo Jehova a se bonang. (1 Sam. 16:7; Jak. 1:22-24) Lentsoe la Molimo le ka “lemoha menahano le boikemisetso ba pelo.” (Baheb. 4:12) Ho bala le ho thuisa ka Bibele letsatsi le letsatsi ho ka re thusa joang ho bona moo re ka lokisang teng e le hore re be baboleli ba atlehileng?—Pes. 1:1-3.
2. Bibele e ka re thusa joang hore re itlhahlobe?
2 Sebelisa Bibele e le Seipone: Litlaleho tsa Bibele tsa bahlanka ba Jehova ba tšepahalang li re ruta hore na ke litšobotsi life tse amohelehang ho eena. Ka mohlala, Davida o ile a bontša hore o chesehela lebitso la Molimo. (1 Sam. 17:45, 46) Ka sebete Esaia o ile a ithaopela ho bolela tšimong e thata. (Esa. 6:8, 9) Kaha Jesu o ne a rata Ntate oa hae ea leholimong haholo, seo se ile sa etsa hore a talime tšebeletso e le mohloli oa khatholoho le khotsofalo ho e-na le ho e talima e le moroalo. (Joh. 4:34) Bakreste ba lekholong la pele la lilemo ba ne ba bolela ka cheseho, ba itšetleha ka Jehova ’me ba ikemiselitse hore ba se ke ba tela. (Lik. 5:41, 42; 2 Bakor. 4:1; 2 Tim. 4:17) Ho thuisa ka mehlala e joalo ho re thusa ho icheba ka morero oa ho ntlafatsa tšebeletso ea rōna e halalelang.
3. Ke hobane’ng ha re sa lokela ho lieha ho etsa liphetoho?
3 Lokisa Liphoso: Ha e le hantle, ho icheba ka seiponeng ebe ha re lokise sekoli, ha ho re tsoele molemo. Re ka kōpa Jehova hore a re thuse ho italima ka tsela e nepahetseng le ho re thusa ho etsa liphetoho tse hlokahalang. (Pes. 139:23, 24; Luka 11:13) Kaha nako e setseng e fokotsehile ’me bophelo ba batho bo kotsing, ha rea lokela ho lieha ho etsa liphetoho tse hlokahalang.—1 Bakor. 7:29; 1 Tim. 4:16.
4. Ho etsahala’ng ka motho ea nyarelang Lentsoeng la Molimo ebe o nka khato ka seo a se bonang?
4 Seo motho a hlileng a leng sona—e leng seo Jehova a se bonang—ke sa bohlokoa ho feta tsela eo a shebahalang ka eona. (1 Pet. 3:3, 4) Ho etsahala’ng ha motho a nyarela Lentsoeng la Molimo ebe o nka khato ka seo a se hlokomelang? Hase ‘moutloi ea lebalang, empa ke moetsi oa mosebetsi, ’me o tla thaba ho o etseng ha hae.’ (Jak. 1:25) Ka sebele, re tla ba baboleli ba thabileng le ba atlehang hobane re “bonahatsa khanya ea Jehova joaloka liipone.”—2 Bakor. 3:18.