“Bo-diabolose ba Lintja”?

LITLHASELO tsa lintja tsa mofuta oa pit-bull Canada, Engelane, le United States li ’nile tsa phatlalatsoa ka ho pharalletseng lilemong tse ’maloa tse fetileng. Litsi tsa Taolo ea Mafu tsa U.S. li tlaleha hore karolo ea 42 lekholong ea mafu a 157 a bakiloeng ke ho longoa ke lintja ao ho nang le bopaki ba hore a hlahile United States mahareng a 1979 le 1988 e amana le ho longoa ke li-pit bull. Brithani khaso e ile ea bitsa li-pit-bull tse bohale “Bodiabolose ba Lintja.” Makasine oa Equinox o bitsa ntja ena “mochine o moholo ka ho fetisisa oa ho bolaea.”

Papaling e sa lumelloang ka molao ea ho qabanya lintja, pit bull e nkoa e le “’Mampoli oa lintja tse bolaeang,” ka lebaka la matla a eona, mahlaha-hlaha a eona le bohale ba eona. The Globe and Mail ea Toronto, Canada, e bolela hore ‘li-pit bull li ruiloe ka morero oa ho bolaea lintja tse ling.’

The Toronto Star e re: “Mehlahare ea eona e kang vise e ka lematsa liphoofolo tse ling esita le batho hampe, haholo-holo bana ba sa tsebeng ho itšireletsa.” Litlaleho tse sehlōhō li kopanyelletsa tlhaselo ea ngoanana ea lilemo li robong eo ho ileng ha hlokahala lihora tse hlano tsa mokhoa oa ho lokisa letlalo o bitsoang plastic surgery ka mor’a hore a longoe ke pit bull sefahlehong. Mocha ea lilemo li 13 o ile a lokela ho okoa maqeba a ho longoa sefahlehong, ’meleng, leotong le maraong. ’Motlelara o mong o lilemo li 21 o bile le mengoapo e mebe ka ho fetisisa sefahlehong hoo o ileng oa hloka hore o rokoe li-stitch tse ka bang 70 ha pit bull ea bo-motsoalle oa oona e ne e o loma ha o ne o leka ho e aka. Monna oa Engelane ea lilemo li 54 o ile a lematsoa ke “Bo-diabolose ba Lintja” tse peli ’me li ile tsa mo khaola nko.

Ka nako e ’ngoe, motsamaisi e moholo oa Mokhatlo oa Tlhokomelo ea Liphoofolo oa Toronto, Kathleen Hunter, o kile a lumela hore ha pit bull e ka koetlisoa hantle, e ka tšoana le ntja e efe kapa efe e thapileng. Leha ho le joalo, hona joale o lumela hore “pit bull e na le molao oa tšebetso ea lik’hemik’hale liseleng tsa eona o e etsang hore ho se tsejoe esale pele hore na e tla itšoara joang tlas’a maemo a itseng. Ka sebele ke ntja e bohale . . . , e ruiloeng bakeng sa ho hlasela e sa qholotsoa.”a Motsamaisi kakaretso oa litšebeletso tsa thlokomelo ea liphoofolo oa lekala la Toronto la Lefapha la Bophelo bo Botle, Jim Bandow oa hlokomela: “Pit bull ke bomo e laoloang ka nako. U ke ke oa tseba hantle hore na e tla phatloha neng.”

Baetsi ba melao ba leka ho rarolla bothata bona ka ho hlomamisa melao le ho tiisa litaelo tse fapa-fapaneng. Edmonton, Canada beng ba li-pit-bull ba tlangoa ho lefa liranta tse 1 375 000 bakeng sa insurance le ho lefa khafa ea liranta tse 275. Winnipeg, Canada, ha ho li-pit bull tse ncha tse lumelletsoeng literateng tsa motse ’me beng ba tsona ba lokela ho li fasa le ho li kenya lithibelo tsa molomo le ho fana ka bopaki ba chelete ea insurance ea liranta tse 825 000. Palamente ea Brithane e entse molao o tšoanang o tlamang bakeng sa beng ba li-pit-bull. Ho se utloe molao ona ho ka fella ka kotlo ea ho lefisoa chelete le ho koalloa teronkong.

Ho latela Molao oa Molimo ho Iseraele ea boholo-holo, liphoofolo tse kotsi li ne li tlameha ho lebeloa. Haeba phoofolo e kotsi e ne e ka lokolloa, mong’a eona o ne a ikarabella kotsing eo phoofolo eo e e bakileng. Haeba phoofolo eo e ne e ka bolaea motho, mong’a eona o ne a tla ba le molato oa mali, ’me seo se ne se ka etsa hore le eena a bolaoe. (Exoda 21:29) Ka baka la se boleloang Molaong oa Molimo, e tla ba ntho e bohlale hore Bakreste ba nke mehato e hlokahalang ho boloka lintja tse bohale le tseo ba sa tsebeng hore na li tla itšoara joang tlas’a maemo a itseng tlas’a taolo kapa ba etse qeto ea hore ba se be le tsona.

[Mongolo o botlaaseng ba leqephe]