U ke ke Ua Rata Hore e U Fete!
U FETOE ke eng? Kopano ea Setereke ea Lipaki tsa Jehova ea “Baphethi ba Lentsoe la Molimo”! Letoto lena la likopano, le tla qala ka November karolong e ka boroa ea Afrika, le tla tšoareloa metseng e makholo lefatšeng ka bophara likhoeling tse ’maloa tse tlang. Libakeng tse ngata lenaneo le tla qala ka ’mino ka Labohlano hoseng ka 9:30.
Ka mor’a hore lenaneo la hoseng le bule ka khothatso ea ho mamela seo Lentsoe la Molimo le se bolelang, le tla tsoela pele ka puo e reng “E-bang ba Khanyang ke Molemo oa Jehova” le e reng “Tsoelang Pele le Tiile Joalokaha Eka le Bona ea sa Bonahaleng.” Joale lenaneo la hoseng le tla phetha ka puo ea sehlooho ea kopano, e nang le sehlooho se reng: “Rorisang Jehova—Mophethi oa Lintho Tse Hlollang.”
Puo ea pele lenaneong la thapama, e reng “Le se ke la Khathala ke ho Etsa se Molemo,” e tla lateloa ke neheletsano ea lipuo tse tharo tse bontšang tsela ea ho khetha molekane oa lenyalo, ho haha lelapa le matla moeeng le ho ruta bana ho rata Jehova. Puo e koalang letsatsi, e reng “Ho Boloka Mohato le Mokhatlo o Hlophisitsoeng oa Jehova” e tla hlahloba tsoelo-pele e ntseng e hōla kajeno kutloisisong ea merero ea Molimo.
Lenaneong la Moqebelo hoseng ho tla fanoa ka neheletsano ea bobeli e nang le lipuo tse tharo, tlas’a sehlooho se reng “Basebeletsi ba Lentsoe la Molimo.” Neheletsano ena e tla fana ka litlhahiso tsa hore na re ka ntšetsa pele mosebetsi oa rōna oa ho etsa barutuoa joang. Joale ho tla latela puo e amang maikutlo e reng “Ho se Bakele Molimo Lihlong.” Ka mor’a moo, ho tla latela puo ea kolobetso ’me ho fanoe ka monyetla oa hore ba tšoanelehang ba kolobetsoe.
Thapama neheletsano ea lipuo tse tharo e tla totobatsa sehlooho se reng “Sebetsa ka Thata ho Hlaolela Bomoea,” moo ho tla fanoa ka litlhahiso tse sebetsang tsa hore na bomoea bo ka hlaoleloa joang. Lenaneo le tla koala ka puo e rutang e nang le sehlooho se reng, “Ho Tsamaea Leseling le Tsoelang Pele la Lentsoe la Molimo.” E tla tšohla khaolo ea 25 le ea 26 ho Esaia ’me e hlalose kamoo re ka utloisisang buka ena ea Bibele hamolemonyana kateng.
Lenaneo la Sontaha hoseng le tla ba le neheletsano ea lipuo tse tharo tlas’a sehlooho se reng, “Boprofeta ba Sofonia bo Nang le Moelelo ho ba Etsang Thato ea Molimo.” E tla hlalosa hore na boprofeta bo ile ba phethahala joang mehleng ea khale sechabeng sa Juda le hore na bo phethahala joang mehleng ena ea rōna, haholo-holo malumeling a lefatše lena. Ka mor’a moo, u tla thabela tšoantšiso e aparetsoeng e nang le sehlooho se reng “Mehlala e Lemosang Mehleng ea Rōna,” e tšohlang boitšoaro bo bobe ba banna ba Iseraele pejana feela ho hore ba kene Naheng e Tšepisitsoeng. Karolo ea bohlokoa lenaneong le qetellang la kopano thapameng ea Sontaha e tla ba puo ea phatlalatsa e nang le sehlooho se reng, “Lebaka Leo ka Lona U Lokelang ho Ela Hloko Mesebetsi e Hlollang ea Molimo.”
Etsa litokisetso esale joale hore u tle u be teng matsatsi ao kaofela a mararo. Hore u fumane moo kopano e tla tšoareloa teng haufi le moo u lulang, e-ea Holong ea ’Muso ea Lipaki tsa Jehova e sebakeng sa heno kapa u ngolle bahatisi ba makasine ena.