Monyaka oa ho Boha Linonyana

LEFATŠE e ne e tla ba le fapaneng hakaakang ha linonyana li ne li ka ba sieo! Ho lla ha tsona, ho bina ha tsona, mebala-bala ea tsona le ho fofa ha tsona—kaofela li tlatsetsa ho fapa-fapaneng ho hotle ha bophelo. Empa re ema hangata hakae hore re li mamele le ho li shebella? Haeba u lula motseng o moholo o pota-potiloeng ke lerata le ho potlaka ha bophelo ba letsatsi le letsatsi hammoho le melumo ea sephethephethe, u ka ’na ua se ke ua lemoha linonyana tse sebakeng seo u lulang ho sona. Esita le haeba u lula mahaeng, ho bonolo ho li hlokomoloha. Empa na u ka rata ho bonela linonyana tsa sebakeng sa heno haufinyane?

U ka etsa joalo ka ho beha sekotloloana sa lijo tsa ho fepa linonyana ka mor’a ntlo, u se behe haufi le fensetere. Joale, seo u se hlokang feela ke sebonela-hōle le k’hamera e nang le lense e khonang ho atametsa ntho e nkoang setšoantšo haufi—hammoho le mamello e itseng! E-ba malala-a-laotsoe ka lifilimi tse ngata tse nkang ntho e lebelong le phahameng hammoho le buka e nang le litšoantšo e fanang ka boitsebiso ka linonyana. Joale shebella, u mamele ’me u nyakalle!