Kamoo re Ileng ra Pholoha Tlokotsing ea ho Phalla ha Seretse se Chesang!

KA MONGOLI OA TSOHA! CONGO (KINSHASA)

KE Labobeli la la 15 January, 2002—letsatsi le bonahalang e le le tloaelehileng Afrika Bohareng. Ke fihla Goma, Kivu, Congo (Kinshasa), ke e-na le e mong oa Lipaki Tsa Jehova, ke tl’o kopana le Lipaki tsa Great Lakes.

Na Boemo Boo ha bo Tšoenye?

Le hoja thaba e foqohang seretse se chesang ea Nyiragongo (e bophahamo ba limithara tse 3 470) e le bohōle ba lik’hilomithara tse 19 ho tloha motseng oa Goma, e hapa thahasello ea rōna.a Re ka utloa ha e kirietsa ’me re ka boela ra bona ha mosi o qōba thabeng eo. Ho batho ba moo, ke ntho e tloaelehileng nakong ena ea selemo ’me ha baa tšoenyeha.

Thapameng ea letsatsi lena, re ea libokeng tsa liphutheho tse peli tsa Lipaki Tsa Jehova. Re ntse re utloa ho thothomela ha lefatše le ho kirietsa. Hoo ha ho bonahale ho tšoenya motho. Ba boholong sebakeng seo ba tsoela pele ho tiisetsa baahi hore ha ho lebaka la hore ba tšohe. Le hoja setsebi sa Congo sa ho foqoha ha seretse se chesang se ’nile sa bolela likhoeli-khoeli pele hore thaba eo e tla foqoha seretse, ha ho ea lumelang seo. Motsoalle e mong o ipuela feela tjee, o re: “Mantsiboeeng ana leholimo le tla ba lefubelu ka lebaka la ho foqoha ha seretse se chesang.”

“Re Lokela ho Baleha Hang-hang!”

Ha re khutlela moo re fihletseng teng, re bolelloa kantle ho tikatiko: “Re lokela ho baleha hang-hang!” Ho hobe. Motse o kotsing e khōlō. Lintho li fetoha ka potlako e kaakang! Pejana re ne re tšohla taba ea ho sebelisa Goma e le setsi se bohareng bakeng sa mosebetsi oa ho paka. Joale mantsiboeeng ana re bolelloa hore re balehe motseng, kaha o kotsing ea ho timetsoa!

Ha shoalane e tšoara, leholimo lea tlerefala—ka lebaka le utloahalang! Seretse se chesang se tsoang thabeng ea Nyiragongo se phallela motseng. Thaba ena e tšoana le pitsa e belang e tsapola, e tšolla se ka hare, e leng seretse sena se chesang se ripitlang sohle se tseleng ea sona. Ha re e-s’o ka re paka lisutuk’heise ka potlako e kaalo! E ka ba hora ea bosupa mantsiboea.

Matšoele-tšoele a Balehang Tseleng

Ha re e-tsoa ka potlako re baleha, ’mila o tsoelang ka ntle ho Goma oa phethesela ke boieane ba batho ba balehang ho pholosa bophelo ba bona. Ba bangata ba tsamaea ba jere thepa eo ba atlehileng ho e nka ka potlako. Ba bangata ba roetse lithōtō. Ba ’maloa ba penyane likoloing tse tletseng tsoete! Kaofela ba lebile moeling o haufi oa Rwanda. Leha ho le joalo, seretse se chesang ha se thijoe ke meeli e iketselitsoeng ke batho. Ha ho lebotho le ka se emang pele! Re bona ha masole le ’ona a baleha seretse sena se chesang ho pholosa bophelo ba ’ona. Ho thata hore likoloi li ka fetela pele. Re lokela ho tsoela pele re tsamaea ka maoto. Re har’a letšoele lena le tsamaeang ka thata la batho ba 300 000—banna, basali, bana le masea—ba balehang bohale ba seretse sena se chesang. Lefatše le tsoela pele ho kirietsa le ho thothomela ha re ntse re tsamaea.

E mong le mong oa baleha ho pholosa bophelo ba hae. ’Na le motsoalle oa ka, re le baeti motseng ona o moholo, re har’a letšoele lena, re tsamaea le Lipaki tse ’maloa tse re hlokometseng. Ho ba teng ha tsona le ho ameha ha tsona ka rōna ka ho tebileng ho ile ha re ama pelo ’me ha etsa hore re ikutloe re sireletsehile boemong bona bo sithabetsang le bo bohloko. Batho ba baleha ba nkile seo ba ka se khonang—liphahlo, lipitsa, lipane le lijonyana tse seng kae. Har’a letšoele lena, batho baa sututsana. Ba bang ba bona ba thuloa ke likoloi ha li leka ho feta, li etsa hore ba bang ba lahleheloe ke lintho tse seng kae tseo ba li tšoereng ha li oela ’me li hatakeloa. Ea khoptjoang, ha habo ke naheng. Ho lubehile, ha ho ngoana e motle. E mong le e mong o tšohile. Re leka ho ea Gisenyi, lik’hilomithara tse seng kae feela Rwanda. Re tsoela pele leetong la rōna re sa phomole.

Ho Qeta Bosiu re Sireletsehile

Re fihla ntlong ea baeti, empa ho se ho tletse. Re lokela ho khotsofalla ho lula tafoleng ka ntle jareteng. Ke ka mor’a hore re tsamaee ka thata lihora tse tharo le halofo. Re thabela hore ebe rea phela ’me re tsoile sebakeng se kotsi, le ho ba le barab’abo rōna ba Bakreste ba nkileng leeto lena le rōna. Se thabisang ke hore ha ho Lipaki tse shoeleng.

Ho hlakile hore re tla tlameha ho sesa bosiu re le ka ntle. Re le sebakeng sena se sireletsehileng, re ka bona leholimo le lefubelu holim’a motse oa Goma. Ka sebele e ne e le pono e khahlang haholo le e ntle! Letsatsi le chaba le sa hane. Ho kirietsa le ho thothomela ha lefatše ho ’nile ha tsoela pele bosiu kaofela. Ha re hopola se bohloko se etsahetseng maobane, re utloela malapa a likete bohloko a ileng a tlameha ho baleha le bana ba ’ona ba banyenyane.

Thuso e Fihla ka Potlako

Lipaki tse tsoang Kigali, motse-moholo oa Rwanda, li fihla ho rōna motšehare o moholo ka Labohlano la la 18 January. Komiti ea liphallelo e entsoeng ka barab’abo rōna ba Goma le Gisenyi e qala mosebetsi. Pakane ea pele ke ho lokisetsa baphaphathehi ba Lipaki bolulo Liholong Tsa ’Muso tse tšeletseng sebakeng seo. Sena se etsoa letsatsing lona leo. Ho hlongoa letšoao le ngotsoeng ka Sefora le ka Seswahili tseleng, le bontšang tsela e lebang Holong ea ’Muso sebakeng seo, moo baphaphathehi ba ka fumanang thuso le matšeliso. Hape hona letsatsing leo, ho fihla lithane tse tharo tsa lintho tse hlokoang Liholong Tsa ’Muso moo Lipaki li fumaneng bolulo teng. Letsatsing le hlahlamang ka Moqebelo, ho fihla teraka e tletseng lijo, likobo, liseile tsa polasetiki, sesepa le meriana li tsoa Kigali.

Ho Tšoenyeha Hoa Eketseha

Ena ke nako ea ho tšoenyeha ho hoholo. Batho baa kaofela ba tla hlokomeloa joang ka lintho tseo ba li hlokang? Ho thoe’ng ka thaba e foqohang seretse se chesang? E tla khaotsa neng? Ebe motse oa Goma o senyehile hakae? Litaba tse ntseng li fihla le ho thothomela ho tsoelang pele ha lefatše ha li fane ka tšepo. Litsebi li tšohile hore moea o tla silafatsoa ke sulfur dioxide e kotsi. Ho boetse ho na le ngongoreho ea hore metsi a Letša la Kivu a tla silafala ka lebaka la liphetoho tse itseng tsa lik’hemik’hale.

Lihoreng tse 48 ka mor’a hore ho foqohe seretse, ho ile ha jaleha litlaleho tse tšoenyang. Joale, Moqebelo thapama re utloa ka batho ba ka bang 10 000, ho akarelletsa le Lipaki tse 8 hammoho le ngoana, ba qabeletsoeng ke seretse se ba kopetseng, se bophahamo ba limithara tse peli libakeng tse ling. Ho tletse moea o chefo feela sebakeng. Re amehile ka bophelo ba bona. Boemo ha bo tšepise. Esita le cathedral ea Goma e ne e sentsoe ka ho feletseng ke seretse sena seo ho neng ho se motho ea ka se thibang. Ka nako eo ho ne ho se ea nahanang hore Goma e tla tsoha hape.

Litaba Tse Tšelisang

Ka Sontaha ka hora ea borobong hoseng, re letsetsoa ke e mong oa barab’abo rōna ba kopetsoeng ke seretse se chesang. O re bolella hore boemo boa fetoha. Lintho lia ntlafala. Pula ea na, seretse se chesang sea fola ’me hoa apoha. Le hoja seretse se ntse se chesa ’me se le kotsi, batho ba qala ho tšelela sebakeng se sireletsehileng. Motse ha oa senyeha ka ho feletseng.

Tsena ke litaba tsa pele tse monate haesale ho hlaha koluoa ena. Thaba e foqohang seretse se chesang e bonahala e se e kokobetse. Litsebi tse sebakeng seo li na le maikutlo a loantšanang. Re khona ho ikopanya le ba motseng o haufi oa Bukavu, o ka lehlakoreng le leng la Letša la Kivu. Re fumana litaba tsa hore malapa a mahlano, hammoho le bana ba bararo ba lahlehelaneng le batsoali ba bona ba fihlile Bukavu ka seketsoana. Ba tla hlokomeloa ke Lipaki tsa motseng oo.

Re ka Khutla!

Ka Mantaha oa la 21 January, re khothatsa le ho tšelisa liphofu tse Gisenyi, hammoho le ho fumana hore na li hloka eng. Re fumana hore barab’abo rōna ba behiloeng ka nakoana Liholong Tsa ’Muso tse tšeletseng ba qala ho hlophiseha. Re fumana lenane le nepahetseng la ba balehileng—batho ba 1 800 ho akarelletsa le bana.

Ho thoe’ng ka bokamoso? Ba boholong sebakeng seo ba lokisetsa ho hloma likampo tsa baphaphathehi ka potlako. Leha ho le joalo, batho ba bang ba ntse ba hopola maemo a sa thabiseng a likampong tsa baphaphathehi tse neng li hlonngoe ka mor’a ho hlasela morabe o itseng ka morero oa ho o timetsa ka 1994. Re etsa qeto ea ho khutlela Goma, ’me re fihla teng ha e se e tla ba motšehare o moholo. Hoo e ka bang karolo ea 25 lekholong ea oona e ne e ripitliloe. Joale re khona ho tsamaea holim’a seretse se hoammeng se ileng sa phallela literateng tsa motse ona. Se sa futhumetse, ’me khase e tsoang ho sona e tlala moeeng. Batho ba bangata ba ikemiselitse ho khutlela motseng.

Ka hora ea pele thapama, re kopana le baholo ba Bakreste ba 33 Holong ea ’Muso ea Phutheho ea Goma Center. Ba ba ntsoe-leng: Ba etsa qeto ea ho khutlela Goma. Ba re: “Ke ha habo rōna.” Teng haeba thaba e ka boela ea foqola seretse se chesang? Karabo e re: “Re se re e tloaetse.” Ba tšaba hore ha ba sa khutle kapele, ba tla utsoetsoa ntho e ’ngoe le e ’ngoe eo ba nang le eona. Letsatsing le hlahlamang malapa ’ohle a Lipaki a neng a balehile a khutletse Goma. Boholo ba batho ba 300 000 ba neng ba tšetse moeli le bona ba khutletse motseng ona o neng o oetsoe ke koluoa.

Beke Hamorao

Ho boetse hoa phethesela motseng. Ho hlakile hore o ke ke oa shoa. Ka potlako ho qaloa mosebetsi oa ho ala seretse sena hantle e le ho kopanya likarolo tse peli tsa motse tse neng li arotsoe ke sona. Seretse se ne se ripitlile ntho e ’ngoe le e ’ngoe e neng e le tseleng ea sona. Setsi sa khoebo le karolo e itseng ea mehaho ea ’muso e ne e senyehile. Ho hakanngoa hore karolo ea boraro ea lebala la lifofane e ne e senyehile.

Palo e nepahetseng e bontša hore malapa a 180 a Lipaki a har’a ba lahlehetsoeng ke sohle ’me a hloka bolulo. Komiti ea liphallelo e etsa litokisetso tsa ho thusa banna, basali le bana ba ka bang 5 000 hore ba fumane lijo tsa letsatsi le leng le le leng. Liseile tsa polasetiki tse nehetsoeng ke Lipaki Tsa Jehova tsa Belgium, Fora le Switzerland, li tla sebelisetsoa ho etsa bolulo ba nakoana bakeng sa ba hlokang bolulo, hammoho le libaka tseo ho kopaneloang ho tsona bakeng sa liphutheho tseo Liholo tsa tsona tsa ’Muso li senyehileng haholo kapa li ripitliloeng. Malapa a mang a Lipaki tse se nang bolulo a tla lula le Lipaki tse ling tseo mahae a tsona a sa amehang, ha a mang a tla ba sebakeng sena sa bolulo sa nakoana.

Ka Labohlano la la 25 January, matsatsi a ka bang leshome ka mor’a bosiu boo ba mahlomola, batho ba 1 846 ba tlile sebokeng se tšoaretsoeng jareteng ea sekolo Goma, ho tla mamela mantsoe a khothatsang a Mangolo. Barab’abo rōna ba leboha haholo matšeliso ao ba a fumanang hammoho le thuso ea lintho e fanoeng ke mokhatlo o hlophisitsoeng oa Jehova. Rōna baeti re angoa haholo ke boikemisetso le tumelo e matla ea barab’abo rōna ho sa tsotellehe boemo bo tepeletsang boo ba leng ho bona. Mahlomoleng a makaalo, ho thabisa hakaakang ho ba karolo ea mokhatlo oa bara ba motho ba kopaneng borapeling ba Molimo oa ’nete, Jehova, e leng eena Mohloli oa matšeliso a ka ho sa feleng!—Pesaleme ea 133:1; 2 Bakorinthe 1:3-7.

[Mongolo o botlaaseng ba leqephe]

[Limmapa tse leqepheng la 12, 13]

(Ha u batla ho bona boitsebiso bo hlophisitsoeng hantle, sheba sengoliloeng)

Moo mela ena e supileng teng ke moo seretse se chesang se neng se phalla le teng

CONGO (KINSHASA)

Thaba ea Nyiragongo

↓ ↓ ↓

Boema-fofane ba Goma ↓ ↓

↓ GOMA

LETŠA LA KIVU

RWANDA

[Litšoantšo tse leqepheng la 13]

Seretse se chesang se ile sa etsa hore baahi ba likete tse mashome ba balehe motseng oa Goma

[Tlhaloso ea Moo Setšoantšo se Nkiloeng Teng]

AP Photo/Sayyid Azim

[Litšoantšo tse leqepheng la 14, 15]

Bekeng eona eo, Lipaki li ile tsa hlophisa liboka tsa tsona tsa Bokreste