Mefuta e sa Tšoaneng ea Lifate Tsa Moluoane

Mefuta e sa Tšoaneng ea Lifate Tsa Moluoane

KA MONGOLI OA TSOHA! CZECH REPUBLIC

MOFUTA o mong oa sefate sena o mosesaane, o molelele ’me o otlolohile. O mong oona o lepeletse ’me o kebisitse hlooho. Le hoja li bōpehile ka tsela e sa tšoaneng, ha e le hantle lifate tsena ke lesika le le leng. Ke life? Ke sefate sa popoliri le sa moluoane o makala a lepeletseng. Ka bobeli ke mofuta oa lifate tsa moluoane.

Ka tloaelo lifate tsa moluoane li fumaneha mabōpong a linōka le melatsoaneng. Mona Czech Republic, li atleha haholo mekhoabong, moo ka potlako li ntšang mahlomela a letlobo le lecha. Meluoane e ka ba bolelele ba limithara tse fetang tse 30. Meluoane e ka ’na ea e-ba le makhasi a masesaane a leketlileng ka bokhabane makaleng a malelele a masesaane. Athe mefuta e meng ea meluoane e kang e bitsoang shining willow le pussy willow, makhasi a eona a ka ’na a e-ba sephara.

Le hoja ho e-na le mefuta e fetang 350 ea meluoane le lipopoliri, o hapang mahlo ka ho fetisisa ke moluoane o makala a lepeletseng. Mofuta o mong o bitsoang goat willow, o tsebahala ka lithunthung tsa oona tse boea tse thunyang li entse masihla pele makhasi a hlaha. Hang ha lithunthung tsena li hlaha, ho ee ho thoe joale nako ea selemo e atametse.

Lesika le Leng la Eona

Lifate tsa popoliri li ngata Bohemia, e leng sebaka seo Prague, motse-moholo oa Czech, o leng ho sona. Bonyane ho na le mefuta e ka bang 35 ea lifate tsa popoliri, eo kaofela ha eona e leng mefuta ea lifate tsa moluoane. Mohlomong o tloaelehileng haholo ke oa popoliri e ntšo, e atisang ho fumanoa melatsoaneng le mohlakeng Bohemia. Mofuta o mong oa popoliri e ntšo o tsejoang e le popoliri ea Lombardy, kapa ea Italy, o na le kutu e tšesaane e nang le makala a shebileng holimo, a hōlang a iphaphathile le ’mele oa sefate. Sefate sena se bohehang se ka ba bolelele ba limithara tse 35, bolelele bo lekanang le ba mohaho o mekato e 11! Popoliri ea Italy e ka boela ea fumanoa mathōkong a litsela tse ngata, ea khabisa libaka tsa mahaeng, haholo-holo ka hoetla ha makhasi a fetola ’mala a e-ba bosehla bo khanyang.

Sefate se bitsoang aspen le sona ke mofuta oa popoliri. Ha se selelele hakaalo, ’me ntlheng ea sona se batla se le sesesaane. Sefate sa aspen se khetholleha ka ho hong hape—esita le moea o fokang hasesaane feela o se sisinya makala.

Na Bibele e Bua ka Lifate Tsa Moluoane?

U ka ’na ua nahana hore lifate tsa popoliri ha li mele libakeng tse hōle joaloka Bochabela bo Hare. Leha ho le joalo, Bibele e hlalosa Baiseraele ba fanyehile liharepa tsa bona lifateng tsa popoliri ha ba ne ba le botlamuoeng Babylona. (Pesaleme ea 137:2) Ke hobane’ng ha ba ile ba etsa joalo? Le hoja harepa e le seletsa se neng se sebelisoa ha ho rorisoa Molimo, Baiseraele ba neng ba hlomohile ba ne ba tsoafa ho letsa liharepa tsa bona nakong ena ea mahlomola. (Esaia 24:8, 9) Lentsoe la Molimo le boetse le hlalosa popoliri e le se seng sa lifate tseo makala a sona a neng a lumeletsoe hore a ka haha metlotloane nakong ea Mokete oa ho Bokella. (Levitike 23:40) Buka ea Bibele ea Jobo e hlalosa kubu e sebete e le e lulang melapong ’me e re “meluoane [kapa lipopoliri, ho latela liphetolelo tse ling] ea nōka e e kopela hare.”—Jobo 40:22, Bibele ea Sesotho.

Kajeno, lifate tsa popoliri le tsa moluoane ka bobeli li sebelisoa bakeng sa lihlahisoa tse sa tšoaneng tse rekisoang. Ka tloaelo ho sebelisoa popoliri ha ho etsoa lehong le lesesaane le manamisoang holim’a lehong la boleng bo tlaase, ha ho etsoa plywood, mabokose a mapolanka, mabokose a k’hateboto le lihlahisoa tse ling tsa pampiri. Sefate sa moluoane se boetse se nkeloa holimo ka lebaka la melemo e meng ea sona. Litsebi tsa mesebetsi ea matsoho li loha libasekete le thepa e ’ngoe ka makalana a sona a bonojoana. Ka sebele lifate tsa moluoane li mefuta-futa!