Kamoo Molimo le Kreste ba Talimang Basali Kateng

RE KA utloisisa ka ho feletseng joang tsela eo Jehova Molimo a talimang basali ka eona? Tsela e ’ngoe ke ea hore re hlahlobe boikutlo le boitšoaro ba Jesu Kreste, eo e leng “setšoantšo sa Molimo ea sa bonahaleng,” ea bonahatsang ka botlalo tsela eo Molimo a talimang lintho ka eona. (Bakolose 1:15) Tsela eo Jesu a neng a sebelisana le basali ka eona mehleng ea hae e bontša hore ka sebele Jehova le Jesu ba hlompha basali le hore ha ba lumelle tsela e atileng eo basali ba hatelloang ka eona linaheng tse ngata kajeno.

Ka mohlala, nahana ka ketsahalo ea ha Jesu a ne a bua le mosali e mong selibeng. Kosepele ea Johanne ea tlaleha: “Mosali oa Samaria a tla ho kha metsi. Jesu a re ho eena: ‘Mphe metsi ke noe.’” Jesu o ne a se na bothata ba ho bua le mosali oa Mosamaria phatlalatsa, le hoja Bajuda ba bangata ba ne ba sa sebelisane le Basamaria. Ho latela The International Standard Bible Encyclopedia, Bajuda ba ne ba nka hore “ho buisana le mosali phatlalatsa e ne e le mahlabisa-lihlong a maholo.” Leha ho le joalo, Jesu o ne a hlompha basali a bile a ba nahanela ’me o ne a boetse a sa khetholle batho ka morabe kapa ho latela hore na motho ke monna kapa mosali. Ho e-na le hoo, ke ho mosali enoa oa Mosamaria moo Jesu a ileng a ipolela ka lekhetlo la pele hore ke Mesia.—Johanne 4:7-9, 25, 26.

Ketsahalong e ’ngoe, Jesu o ile a atameloa ke mosali ea neng a hlokofalitsoe ka lilemo tse 12 ke boloetse bo tlotlollang le bo fokolisang ba phallo ea mali. Ha a mo tšoara, o ile a fola hang-hang. “Jesu a reteleha ’me, ha a mo hlokomela, a re: ‘Morali, e-ba sebete; tumelo ea hao e u folisitse.’” (Matheu 9:22) Ho latela Molao oa Moshe, mosali ea boemong ba hae o ne a sa lokela ho ba ka har’a batho, re se re sa re letho ka ho tšoara ba bang. Leha ho le joalo, Jesu ha aa ka a mo jajabetsa ka bohale. Ho e-na le hoo, o ile a mo tšelisa ka qenehelo eohle ’me a mo bitsa “morali.” E tlameha ebe lentsoe leo le ile la etsa hore a khobe matšoafo hakaakang! ’Me e tlameha ebe Jesu o ile a thaba hakaakang hore a mo phekole!

Ka mor’a hore Jesu a tsosoe bafung, o ile a hlaha pele ho Maria Magdalena le ho morutuoa e mong oa hae, eo Bibele e reng ke “Maria e mong.” Jesu a ka be a ile a hlaha pele ho Petrose, Johanne, kapa e mong oa barutuoa ba hae ba banna. Ho e-na le hoo, o ile a hlompha basali ka ho ba lumella hore e be bona lipaki tsa pele tse boneng ka mahlo hore o tsositsoe bafung. Lengeloi le ile la ba laela hore ba e’o tsebisa barutuoa ba Jesu ba banna ka ketsahalo ena e makatsang. Jesu o ile a re ho basali bao: “E-eang, le tlalehele barab’eso.” (Matheu 28:1, 5-10) Ka sebele Jesu o ne a sa susumetsoe ke moea oa leeme o neng o tloaelehile ho Bajuda ba mehleng ea hae, moo basali ba neng ba ke ke ba fana ka bopaki.

Ka hona, ho e-na le hore Jesu a bontše leeme ho basali kapa ho ba khella fatše ka tsela e itseng, o ile a ba hlompha le ho ba ananela. Ho hlekefetsa basali e ne e le ntho e fapaneng ka ho feletseng le eo Jesu a neng a e ruta, ’me re ka kholiseha hore boikutlo boo ba hae bo ne bo bonahatsa ka ho phethahetseng kamoo Ntate oa hae, Jehova, a talimang lintho kateng.

Molimo o Ela Hloko Boemo ba Basali

“Ha ho kae kapa kae Mediterranean ea boholo-holo kapa Bochabela bo Hare moo basali ba neng ba fuoa bolokolohi boo ba nang le bona lichabeng tsa kajeno tsa Bophirimela. Mokhoa o tloaelehileng e ne e le hore basali e be ba ka tlaasana ho banna, joalokaha makhoba a ne a le ka tlaasana ho bao e seng makhoba, le ba banyenyane ba le ka tlaasana ho ba baholo. . . . Bana ba bashanyana ba ne ba nkoa e le ba bohlokoa ho feta ba banana, ’me ka linako tse ling masea a banana a ne a tloheloa hore a bolaoe ke serame.” Ke kamoo dikishinari e ’ngoe ea Bibele e hlalosang tsela eo basali ba neng ba nkoa ka eona mehleng ea boholo-holo. Maemong a mangata ba ne ba nkoa ba tšoana le makhoba.

Bibele e ngotsoe mehleng ea ha maikutlo ana a ne a atile. Leha ho le joalo, molao oa Molimo o boletsoeng ka Bibeleng o bontša ho hlompha basali haholo, e leng se neng se fapane haholo le maikutlo a lichaba tse ngata tsa boholo-holo.

Tsela eo Jehova a amehileng ka boiketlo ba basali ka eona e bonahala mehlaleng e mengata eo ho eona a ileng a nka khato molemong oa barapeli ba hae ba basali. O ile a kenella ka makhetlo a mabeli ho sireletsa Sara, mosali ea neng a le motle oa Abrahama, hore a se ke a silafatsoa. (Genese 12:14-20; 20:1-7) Molimo o ile a rata Lea, mosali eo Jakobo a neng a sa mo rate haholo, ’me a “bula pōpelo ea hae,” a ba le mora. (Genese 29:31, 32) Ha basali ba babeli ba neng ba hlompha Molimo ba ne ba beha bophelo ba bona kotsing e le hore ba pholose bana ba batona ba Baheberu hore ba se ke ba bolaoa ke Baegepeta, Jehova o ile a bontša kananelo ka ho “ba sitsa ka malapa.” (Exoda 1:17, 20, 21) O ile a boela a arabela thapelo e matla ea Anna. (1 Samuele 1:10, 20) Ha mohlolohali eo monna oa hae e neng e le moprofeta a ne a tjametsoe ke ho nkeloa bana hore ba etsoe makhoba kaha o ne a sitoa ho lefa molato, Jehova ha aa ka a mo lahla. Ka lerato Molimo o ile a etsa hore moprofeta Elisha a etse hore oli eo mosali eo a neng a e-na le eona e eketsehe e le hore a tsebe ho lefa molato a be a salloe ke e lekaneng bakeng sa lelapa la hae. Ka tsela eo, mosali eo o ile a pholosa lelapa la hae le ho lula a e-na le seriti.—Exoda 22:22, 23; 2 Marena 4:1-7.

Ka makhetlo, baprofeta ba ile ba nyatsa tšoaro e mpe ea basali kapa ho ba hlekefetsa ka tsela e itseng. Moprofeta Jeremia o ile a bolella Baiseraele ka lebitso la Jehova, a re: “Etsang toka le ho loka, ’me le lopolle ea tlatlapuoang letsohong la molotsana; ’me le se ke la tšoara mojaki leha e le ofe hampe, moshanyana ea se nang ntate kapa mohlolohali. Le se ke la ba ntša kotsi. Le se ke la tšolla mali leha e le afe a hlokang molato sebakeng sena.” (Jeremia 22:2, 3) Hamorao, Baiseraele ba neng ba ruile ba bile ba le matla ba ile ba nyatsuoa hobane ba ne ba lelekile basali ba bona ’me ba tšoere bana ba bona hampe. (Mikea 2:9) Molimo oa toka o-oa bona o bile o nyatsa liketso tseo tse khopo tse etsoang ho basali le bana ba bona.

“Mosali ea Nang le Bokhoni”

Mongoli oa boholo-holo oa Liproverbia o fana ka pono e nepahetseng ka mosali ea nang le bokhoni. Kaha tlhaloso ena e babatsehang ea karolo e phethoang ke mosali le boemo ba hae e kenyelelitsoe Lentsoeng la Jehova, re ka tiiseha hore Molimo oa e amohela. Ho e-na le hore a hatelloe kapa a nkoe e le ea tlaasana, mosali ea joalo oa ananeloa, oa hlomphuoa le ho tšeptjoa.

“Mosali ea nang le bokhoni” ho Liproverbia khaolo ea 31 o mahlahahlaha ebile o khothetse mosebetsing. O sebetsa ka thata nthong leha e le efe eo “matsoho a hae a e thabelang,” ke mohoebi, o bile o reka litša. O bona tšimo ’me oa e reka. O etsa liaparo tsa ka hare le ho li rekisa. O fa bo-rakhoebo mabanta. O mafolofolo mosebetsing. Ho feta moo, ba bang ba ananela haholo mantsoe a hae a bohlale le mosa oa hae o lerato. Ka lebaka lena, monna oa hae le bara ba hae ba mo nka e le oa bohlokoa haholo, empa ka holim’a tsohle, Jehova o mo nka e le oa bohlokoa.

Banna ha baa lokela ho hatella basali ka boithati e le hore ba fumane ho itseng, ba ba tšoare hampe kapa ba ba hlekefetse ka tsela leha e le efe. Ho e-na le hoo, mosali ea nyetsoeng e lokela ho ba “mothusi” ea thabileng le ea nang le bokhoni oa monna oa hae.—Genese 2:18.

Ba Abeleng Tlhompho

Ha mongoli ea bululetsoeng, Petrose, a ne a ngolla banna ba Bakreste ka tsela eo ba lokelang ho tšoara basali ba bona ka eona, o ile a khothalletsa banna hore ba etsise boikutlo boo Jehova le Jesu Kreste ba nang le bona. O ile a ngola: “Lōna banna le tsoele pele ho . . . ba abela tlhompho.” (1 Petrose 3:7) Ho abela motho tlhompho ho bontša hore motho eo o nkoa e le oa bohlokoa haholo ebile oa hlomphuoa. Ka hona, monna ea hlomphang mosali oa hae ha a mo tlotlolle, ha a mo khelle fatše, kapa ho mo hlekefetsa. Ho e-na le hoo, o bontša ka mantsoe le ka liketso—ha ba le bathong le ha ba le babeli—hore o baballa mosali oa hae le ho mo rata.

Ha monna a hlompha mosali oa hae, ka sebele sena se etsa hore lelapa e be le thabileng. Nahana ka mohlala oa Carlos le Cecilia. Ho na le nako eo bophelong ba bona ba lelapa ba neng ba lula ba ngangisana ’me ho se mohla ba lumellanang. Ka linako tse ling ba ne ba sa buisane. Ba ne ba sa tsebe hore na ba rarolle mathata a bona joang. Monna o ne a le mabifi; mosali e le motho ea sa khotsofaleng a bile a ikhohomosa. Leha ho le joalo, ha ba qala ho ithuta Bibele le ho sebelisa seo ba ithutileng sona, boemo bo ile ba qala ho ntlafala. Cecilia o re: “Kea lemoha hore lithuto tsa Jesu le mohlala oa hae li fetotse botho ba ka le ba monna oa ka. Ka lebaka la mohlala oa Jesu, ke se ke ikokobelitse ho feta pele ebile ke utloisisa maemo. Ke ithutile ho batla thuso ea Jehova ka ho rapela, joaloka Jesu. Carlos o ithutile ho ba le mamello haholoanyane ’me o se a khona ho ithiba—o ithutile ho hlompha mosali oa hae joalokaha Jehova a batla hore ho be joalo.”

Lenyalo la bona ha lea phethahala, empa ba se ba qetile lilemo tse ngata ba le ’moho. Lilemong tsa morao tjena ba ile ba tobana le bothata bo tebileng—Carlos o ile a felloa ke mosebetsi, hape ka lebaka la ho tšoaroa ke kankere o ile a lokela ho buuoa. Leha ho le joalo, mathata ana ha aa ka a fokolisa lenyalo la bona, empa ba momahane le ho feta.

Ka mor’a hore batho ba etse sebe ’me e be ba sa phethahalang, lichabeng tse ngata basali ba ’nile ba tšoaroa ka tsela e se nang tlhompho. Ba ’nile ba hlekefetsoa ’meleng, maikutlong le ka tsa thobalano. Empa ena hase tsela eo Jehova a neng a rerile hore basali ba tšoaroe ka eona. Tlaleho ea Bibele e bontša ka ho hlaka hore ho sa tsotellehe hore na ho latela moetlo batho ba tloaetse ho etsa eng, basali bohle ba lokela ho tšoaroa ka tlhompho le seriti. Ke tokelo eo Molimo a ba fileng eona.

[Setšoantšo se leqepheng la 4, 5]

Mosali oa Mosamaria

[Setšoantšo se leqepheng la 4, 5]

Mosali ea kulang

[Setšoantšo se leqepheng la 4, 5]

Maria Magdalena

[Setšoantšo se leqepheng la 6]

Jehova o ile a sireletsa Sara ka makhetlo a mabeli

[Setšoantšo se leqepheng la 7]

Lenyalo la Carlos le Cecilia le ne le le mothating oa ho senyeha

[Setšoantšo se leqepheng la 7]

Carlos le Cecilia kajeno