Mokhoa oo Sekolopata sa Leoatleng se Tsebang Tsela ka Oona

Na o Entsoe?

● Bafuputsi ba hlalosa hore ha sekolopata sa leoatleng se falla moo se jellang teng ’me se ea moo se behellang teng lebōpong la leoatle, ena “ke e ’ngoe ea lintho tse hlollang ka ho fetisisa tse etsoang ke liphoofolo.” Ba ’nile ba hlolloa ke sehahabi sena ka lilemo tse mashome.

Ak’u nahane: Ka mor’a lilemo tse peli ho isa ho tse ’nè, sekolopata se setšehali se ea lebōpong ho ea behela mahe—a ka bang lekholo sebakeng se le seng—’me se a pata lehlabatheng. Kapele ka mor’a hore a qhotsoe, malinyane a sekolopata a leba leoatleng. Joale a kena leetong le hlollang, leo ka kakaretso e ka bang lik’hilomithara tse 12 900. Lilemo hamorao, likolopata tse tšehali, tseo joale li seng li le khōlō, li khutlela lebōpong leo li qhotselitsoeng ho lona ho ea behela mahe!

Likolopata tsa leoatleng li tseba tsela joang? Kenneth Lohmann, eo e leng setsebi sa baeloji Univesithing ea North Carolina, United States, eo mantsoe a hae a qotsitsoeng ho National Geographic News, o re: “Ho bonahala eka li hlaha li e-na le ’mapa o tsamaisanang ka tsela e itseng le matla a lefatše a khoheli.” Liphuputso li bontša hore e ka ’na eaba sekolopata sena se khona ho tseba moo se leng teng ka hore se lemohe sekhutlo sa matla a lefatše a khoheli le sebaka seo a fihlang ho sona. Bokhoni bo hlollang ba malinyane ana a se nang mokhoa oa ho itšireletsa, bo a nolofalletsa hore a tsamaee sebaka se bolelele ba lik’hilomithara tse 12 900 ho potoloha Leoatle la Atlantic, ’me Lohmann o re, “a itsamaela a le mang, a sa sale likolopata tse ling morao.”

U nahana’ng ka see? Na bokhoni ba sekolopata sa leoatleng ba ho tseba tsela bo bile teng ka tšohanyetso, kapa na bo entsoe?

[Lebokose le leqepheng la 25]

LINTLHA TSE THAHASELLISANG

● Ha sekolopata se setšehali se qeta ho behela, se siea mahe a sona hona moo.

● Lelinyane le qhotsoang le pshatla khaketla ka leino le khethehileng le bitsoang caruncle, ebe ka mor’a moo lea tsoa.

● Likolopata tsena li qeta karolo ea 90 lekholong ea bophelo ba tsona li le ka leoatleng.

[Tlhaloso ea Moo Setšoantšo se Nkiloeng Teng e leqepheng la 25]

© Masa Ushioda/WaterF/age fotostock