Bofelo ba Lefatše Mohlomong bo ka Tsela eo u sa e Nahaneng

NTLE le lintho tseo batho ba li buang tse bontšang ho felloa ke tšepo, liketsahalo tse boletsoeng lihloohong tse fetileng tse mabapi le ho fela ha lefatše, li tšoana ka lintlha tse tharo. Ntlha ea pele, li thehiloe maikutlong a batho, ’me batho ba na le tlaleho ea ho hlōleha ho bolela bokamoso ka tsela e nepahetseng. Ntlha ea bobeli, li bolela hore ho na le monyetla o fokolang oa hore batho ba tla pholoha. Ntlha ea boraro, li re batho ba tla pholoha bofelo ba lefatše, ba tla hula ka thata e le hore ba lule ba phela.

Ho fapana le hoo, Bibele e bua ntho e utloahalang ka bokamoso. Bibele e tiisa hore ho na le phetoho e khōlō e tlang. Empa e bolela hore ho tla pholoha batho bohle ba etsang thato ea Molimo. Ho feta moo, Bibele ha e bolele hore lefatše le tla felisoa ka ho phatloloa kapa le bate ka ho fetelletseng hoo batho ba ke keng ba khona ho phela ho lona. Le tla fetoloa paradeise.

Leha ho le joalo, batho ba bangata ba thatafalloa ho amohela lintho tseo tse boletsoeng esale pele ka Bibeleng. Batho ba nang le lipelaelo bona ba nka hore lintho tseo Bibele e li rutang ka mahlomola a maholo, Armagedone, puso ea lilemo tse sekete le Paradeise ke litoro feela. Litsebi tsa thuto ea bolumeli li ’nile tsa tšohla likhopolo tse joalo ka makhetlo, tsa ngangisana le ho li hlalosa ho ea ka maikutlo a tsona. Li na le maikutlo a sa tšoaneng ebile lia tsekisana. Ha a bua ka nako ea bofelo, mongoli Bruce A. Robinson o re: “E ka ’na eaba ho na le likhopolo tse ngata tse ngotsoeng tse sa hlakang ho feta tsa lithuto leha e le life tsa Bokreste-’mōtoana.” See se felletse ka eng? Pherekano.

Leha ho le joalo, Mangolo ha a pate letho. Bibele ke molaetsa o tsoang ho Molimo, ’me ha a batle hore re be lefifing mabapi le lintho tse tla etsahala ka moso. Ak’u nahane ka lipotso tse ling tse botsoang khafetsa, le seo Bibele e se buang. Haeba u batla ho ithuta ka ho eketsehileng ka taba ena, u ka kōpa buka ea Ha e le Hantle ke Eng Seo Bibele e se Rutang? e hatisitsoeng ke Lipaki Tsa Jehova.

Na lefatše le batho ba tla felisoa?

“Ba lokileng ba tla rua lefatše, ba tla lula ho lona ka ho sa feleng.”—Pesaleme ea 37:29.

Na ho na le batho ba tla timetsoa?

“Etsoe ba lokileng ke bona ba tla lula lefatšeng, ’me ba sa tšoauoeng phoso ke bona ba tla sala ho lona. Ha e le ba khopo, ba tla felisoa lefatšeng; ha e le ba bolotsana, ba tla tlosoa ho lona.”—Liproverbia 2:21, 22.

Na Molimo o ile a ahlola batho ba sa mo tšabeng nakong e fetileng?

Molimo ha aa ka “a ithiba ho faneng ka kotlo ho lefatše la boholo-holo, empa a sireletsa Noe, ’moleli oa ho loka, hammoho le ba bang ba supileng ha a tlisa moroallo holim’a lefatše la batho ba se nang bomolimo; ’me ka ho fetola metse ea Sodoma le Gomora molora a e ahlola, a behela batho ba se nang bomolimo mohlala oa lintho tse tlang ho tla.”—2 Petrose 2:5, 6.

Na re ka khona ho tseba letsatsi leo Molimo a tla tlisa kahlolo ka lona?

“Malebana le letsatsi leo le hora eo ha ho ea tsebang, leha e le mangeloi a maholimo kapa Mora, haese Ntate feela. Etsoe feela kamoo matsatsi a Noe a neng a le kateng, ho ba teng ha Mor’a motho ho tla ba joalo. Etsoe joalokaha matsatsing ao pele ho moroallo, ba ne ba ja ’me ba noa, banna ba nyala ’me basali ba nyalisoa, ho fihlela letsatsing leo Noe a ileng a kena ka arekeng ka lona; ’me ba se ke ba elelloa ho fihlela moroallo o tla ’me o ba hohola bohle, ho ba teng ha Mor’a motho ho tla ba joalo.”—Matheu 24:36-39.

Na ho na le pontšo ea hore bofelo bo tla tla haufinyane?

“Empa tseba sena, hore matsatsing a ho qetela ho tla ba le linako tse mahlonoko tseo ho leng thata ho sebetsana le tsona. Etsoe batho e tla ba baithati, ba ratang chelete, ba ikhopolang ho tlōla, ba ikhohomosang, banyefoli, ba sa mameleng batsoali, ba se nang teboho, ba sa tšepahaleng, ba se nang lerato la tlhaho, ba sa bulehelang tumellano leha e le efe, baetselletsi, ba hlokang boitšoaro, ba bohale bo tšosang, ba hlokang lerato la se molemo, baeki, ba hlooho li thata, ba ikhohomosang ka boikakaso, ba ratang menyaka ho e-na le ho rata Molimo, ba nang le ponahalo ea boinehelo ba bomolimo empa ba se na ’nete matleng a bona.”—2 Timothea 3:1-5.

Bokamoso ba batho ke bofe?

Molimo “o tla hlakola meokho eohle mahlong a bona, lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.”—Tšenolo 21:4.

Le hoja Mangolo a re bolella lintlha tse ’maloa feela ka bokamoso, a re tiisetsa hore bokamoso ba batho boa khanya. Bokamoso bo tla ba molemo ho feta kamoo re ka nahanang kateng. Kholiseha hore seo ke ’nete, ’me u tiisehe hore ntho leha e le efe eo Jehova Molimo a e tšepisang, o tla boela a e phethahatse.