Lepheo la Serurubele

MAPHEO a serurubele a bobebe hoo lerole le lenyenyane kapa marotholi a metsi a ka se thatafalletsang ho fofa. Leha ho le joalo, mapheo a sona a lula a hloekile a bile a omme. Se thusoa ke’ng?

Ak’u nahane: Bafuputsi ba Univesithing ea Ohio ba ithutang ka serurubele se bitsoang Giant Blue Morpho (Morpho didius) ba fumane hore le hoja re ka ’na ra bona eka mapheo a serurubele sena a boreleli, empa a koahetsoe ke makhakhapha a manyenyane haholo a palamaneng joaloka lithaele tse rulelang ntlo. Esita le mela e bapileng e makhakhapheng ao, e etsa hore litšila le marotholi a metsi a thelle habonolo feela. Baenjiniere ba batla ho etsisa tsela eo lepheo la serurubele le bōpehileng ka eona, ha ba etsa pente e sa silafaleng le e ke keng ea senyeha ha e utloa metsi ba sebelisa theknoloji e phahameng.

Lepheo la serurubele ke o mong oa mehlala e bontšang kamoo bo-rasaense ba lekang ho etsisa tsela eo lintho tse phelang li entsoeng ka eona. Mofuputsi e mong ea bitsoang Bharat Bhushan o re: “Lintho tsa tlhaho li entsoe ka tsela e hlollang, ho tloha ho makhakhapha a manyenyane haholo ho isa ho a maholo, ’me li ’nile tsa susumetsa batho ho li etsisa ka lilemo tse makholo.”

U nahana’ng ka see? Na lepheo la serurubele le bile teng ka ho iphethola ha lintho? Kapa na le entsoe?