Litelu Tsa Katse

LlKATSE tsa lapeng hangata li tsamaea bosiu. Litelu tsa tsona li li thusa hore li tsebe moo phofu ea tsona e leng teng le ho e tšoara, haholo-holo ha letsatsi le likela.

Ak’u Nahane: Litelu tsa katse li letlalong le nang le methapo ea kutlo e mengata. Methapo ena ea kutlo e utloa esita le moea o fokang hasesaane. Kahoo, likatse tsena li khona ho tseba moo phofu ea tsona e leng teng le hoja e sa li bone, e leng ntho e li thusang haholo ha ho le lefifi.

Likatse li sebelisa litelu ha li tsoma ho lekanyetsa hore na phofu ea tsona e hokae le ho utloa ha e sisinyeha. Litelu tsa eona li boetse li li thusa ho lekanya bophara ba lesoba la ntho e itseng pele li leka ho kena ka ho lona. Encyclopædia Britannica e re “batho ba ntse ba sa utloisise ka ho feletseng hore na litelu tsa katse li sebetsa joang; leha ho le joalo, hoa tsebahala hore ha li ka kutoa, seo se ka e thatafaletsa bophelo.”

Bo-rasaense ba entse liroboto tse kentsoeng lisebelisoa tse sebetsang joaloka litelu tsa katse ho li thusa hore li qobe litšitiso. Ali Javey, ea sebetsang lefapheng la bo-rasaense Univesithing ea California, Berkeley, o re: Lisebelisoa tsena tse bitsoang e-whiskers, “li lokela ho sebetsa hantle e le hore li ka sebelisoa ha ho etsoa liroboto tse tsoetseng pele, liroboto tse laoloang ke batho le thutong ea baeloji.”

U nahana’ng ka see? Na litelu tsa katse li bile teng ka ho iphetola ha lintho? Kapa na li entsoe?