Ke Buka ea Khale Empa e Ntse e na le Thuso
Batho ba bangata ba rata Bibele hobane ba re ea halalela. Leha ho le joalo, ha e bue ka litaba tsa bolumeli feela. Empa e na le likeletso tse ka re thusang kamehla bophelong.
Utloa hore na batho ba bang ba re’ng ha ba bua kamoo Bibele e ba thusitseng kateng ha ba e bala ebile ba sebelisa likeletso tsa eona.
Fiona o re: “Hona joale bophelo ba ka bo betere haholo hobane ke hlaphohetsoe kelellong le ’meleng. Ebile ke thabile haholo ho feta pele.”
Gnitko o re: “Ka mor’a hore ke ithute Bibele, ke se ke tseba hantle hore na ke phelela’ng.”
Andrew o re: “Bophelo ba ka bo fetohile haholo. Hona joale ke se ke qeta nako e ngata le ba lelapa la ka, ho e-na le ho lula ke le mosebetsing.”
Ho na le batho ba bangata ba ikutloang ka tsela e tšoanang le ea batho bana. Lefatšeng lohle, ba bangata ba hlokometse hore Bibele e na le likeletso tse ka ba thusang bophelong.
Bibele e ka re thusa hore . . .
Re phele hantle ’meleng
Re laole maikutlo
Re be le metsoalle le malapa a thabileng
Re sebelise chelete hantle
Re rate Molimo
Lihlooho tse ka har’a makasine ena li tla u bontša hore Bibele ke buka e tsoang ho Molimo ebile e ka u thusa ka linako tsohle bophelong.