4. Na Molimo O Ne A Rerile Hore Re Utloe Bohloko?

Re Lokela ho Tseba Karabo

Karabo ea potso ena e ama tsela eo re bonang bophelo ka eona.

Nahana ka Taba Ena

Na ke ntho e utloahalang hore ebe Molimo a ka etsa lefatše le letle hakaale ebe o re bakela mathata?

Ha batho bao e seng balumeli ba bona lintho tse bohloko li etsahala, ba belaella tsela eo Molimo a etsang lintho ka eona hape ba belaella hore o teng. Ba lumela hore re etsahalloa ke lintho tse bohloko hobane (1) Molimo ha a na matla a ho li thibela (2) Molimo ha a batle ho li thibela kapa (3) Molimo ha a eo.

Na mabaka ao a nepahetse?

Bibele e Re’ng?

Molimo o ne a sa re bopela hore re utloe bohloko.

O batla hore re thabele bophelo.

“Ha ho letho le molemo . . . ho feta ho thaba le ho etsa se molemo nakong ea bophelo ba motho, le hore motho e mong le e mong a je ’me a noe le ho bona se molemo bakeng sa mosebetsi oohle oa hae o thata. Ke mpho ea Molimo.”​—MOEKLESIA 3:​12, 13.

Molimo o ne a file batho ba babeli ba pele ntho e ’ngoe le e ’ngoe eo ba neng ba e hloka e le hore ba lule ba se na mathata.

Ha a ne a bopa batho o ne a sa rera hore ba utloe bohloko.

“Molimo a re ho bona: ‘Atang le ngatafale le tlale lefatše ’me le le buse.’ ”​—GENESE 1:28.

Batho ba pele ba ile ba khetha ho se mamele Molimo.

Khetho ena ea bona e ile ea ba bakela mathata hammoho le bana ba bona.

“Sebe se ile sa kena lefatšeng ka motho a le mong le lefu la kena ka sebe, ’me kahoo lefu la namela ho batho bohle hobane kaofela ba ne ba entse sebe.”​—BAROMA 5:​12.a

Molimo ha a bopa batho ba e-na le bokhoni ba ho ipusa.

Feela joalokaha batho ba sa bopeloa ho phela ka metsing, batho ha baa bopeloa ho ipusa.

“Ha ho matleng a motho ea tsamaeang hore a tsamaise mehato ea hae.”​—JEREMIA 10:23.

Molimo ha a batle ha re utloa bohloko.

O batla hore re qobe mathata ka hohle kamoo re ka khonang.

“Hoja u ka ela litaelo tsa ka hloko! Joale khotso ea hao e ne e tla tšoana le noka.”​—ESAIA 48:18.