KE’NG E KA RE THUSANG HO MAMELLA MATHATA?

1 | Sireletsa Bophelo ba Hao

SEO E LENG SA BOHLOKOA

Litlokotsi kapa likoluoa li ama batho ka litsela tse sa tšoaneng.

Ha ho etsahala lintho tse mpe batho ba tšoaroa ke stress. Batho ba tšoaroang ke stress nako e telele ba kula hangata.
Ha tsietsi e hlaha ho ba thata ho fumana kalafo e ntle hobane lipetlele li amohela batho ba bangata ka nako e le ’ngoe ’me seo se ka etsa hore ba se ke ba fumana meriana e lekaneng.
Ha likoluoa li hlahile ho ka ba thata hore batho ba batle lintho tsa bohlokoa tse kang lijo le meriana e lekaneng.

Seo U Lokelang ho se Tseba

Ho kula haholo le ho ba le khatello ea kelello ho ka etsa hore u etse liqeto tse fosahetseng, tse ka behang bophelo ba hao kotsing. Ka lebaka la seo u ka ’na oa kula haholo.
Haeba u sa rarolle mathata a hao a bophelo, a ka eketseha ’me a beha bophelo ba hao kotsing.
Haeba u lula u phetse hantle ’meleng, u tla etsa liqeto tse bohlale nakong ea ha u hlaheloa ke mathata.
Ho sa tsotellehe hore na u ruile kapa u futsanehile, u ka etsa lintho tse tla sireletsa bophelo ba hao.

Seo U ka se Etsang Hona Joale.

Motho ea bohlale o nahana ka likotsi tse ka etsahalang ’me o sebetsa ka thata hore a li qobe. U ka sebelisa keletso ena ho sireletsa bophelo ba hao. E le hore u fokotse menyetla ea ho kula, u lokela ho hloekisa moo u phelang teng le hore u lule u hloekile. Ho ipaballa ho molemo ho feta setlhare.

Andreasa o re: “Ha moo re phelang teng ho hloekile ’me le rona re lula re hloekile re fokotsa litšenyehelo tsa ho reka meriana.”

a Mabitso a hlahang makasineng ena a fetotsoe.

U KA THUSOA KE’NG? Lintho Tse ka U Thusang

Nakong ena eo lefatše le nang le mathata, itšireletse ka hore u latele lintlha tsena

LULA U HLOEKILE

Lula u hloekile

Seo Bibele e se buang: “Ea masene ke ea boneng tlokotsi ’me a ipata.” (Liproverbia 22:3) Leka ho nahana ka lintho tse ka behang bophelo ba hao kotsing ’me u li qobe.

Hlapa matsoho a hao khafetsa ka sesepa le metsi haholo-holo pele u tšoara lijo kapa ha u tsoa toilet.
Hloekisa ntlo ea hao kamehla haholo-holo lintho kapa libaka tse tšoaroang hangata.
Haeba ho khonahala, qoba ho ba haufi le batho ba nang le lefu le tšoaetsanoang.

E-JA LIJO TSE NANG LE PHEPO E NTLE

E-ja lijo tse nang le phepo e ntle

Seo Bibele e se buang: “Ha ho motho ea kileng a hloea nama ea hae, empa oa e fepa le ho e baballa.” (Baefese 5:29) Re bontša hore re rata ’mele ea rona ka hore re ele hloko lintho tseo re li jang le tseo re li noang.

Noa metsi a mangata.
E-ja mefuta e fapaneng ea litholoana le meroho.
Qoba ho ja lijo tse nang le mafura a mangata, letsoai le lengata le tsoekere e ngata.
Qoba ho tsuba hape u se ke oa sebelisa joala le lithethefatsi ka tsela e fosahetseng.

Carlos o re: “E le hore re se ke ra kula, re leka ho ja lijo tse nang le phepo e ntle hobane ha re sa etse joalo re ka qetella re sebelisa chelete eo re e fumanang ho ea ngakeng le ho reka meriana. Re rata ho sebelisa chelete ea rona ho reka lijo tse nang le phepo e ntle.”

IKOETLISE ’ME U PHOMOLE HANTLE

Ikoetlise

Seo Bibele e se buang: “Phomolo e tletseng letsoho e molemo ho feta mosebetsi o boima o tletseng matsoho a mabeli le ho lelekisa moea.” (Moeklesia 4:6) Re lokela ho sebetsa empa re boetse re hloka ho phomola hantle.

Lula u ikoetlisa. U ka qala ka ho lula u tsamaea khafetsa. Boikoetliso bo ka u thusa hore u lule u phetse hantle ho sa tsotellehe hore na u oa kula, u holile kapa u na le mathata a mang a itseng a bophelo.
Phomola

Phomola ka ho lekaneng. Ho se phomole ka ho lekaneng ho ka u ekelletsa stress ’me ha etsa hore u thatafalloe ke ho tsepamisa mohopolo. Haeba u sa phomole ka ho lekaneng u ka qetella u kula haholo.
Ipehele nako eo u tla robala ka eona ’me u e tšepahalle. Leka ho robala le ho tsoha ka nako e tšoanang letsatsi le leng le le leng.
Qoba ho shebella TV kapa lisebelisoa tsa elektronike ha u le ka likobong.
Qoba ho ja lijo tse ngata, caffeine le ho noa lino tse nang le tahi pele u robala.

Justin o re: “Ke ile ka hlokomela hore tsela eo ke robalang ka eona e ama bophelo ba ka. Ka linako tse ling ha ke sa robala hantle, ke tsoha ke opeloa ke hlooho hape le ’mele oa ka o ba bohloko. Empa haeba ke robetse ka ho lekaneng ke ikutloa hantle ’me ke khona ho etsa ntho e ’ngoe le e ’ngoe eo ke lokelang ho e etsa. Ke ba le matla a mangata ’me ha se hangata ke kulang.”